Rajkot: 3.2ની તીવ્રતાનો ભૂકંપનો આંચકો, 7 કિમી દૂર કેન્દ્ર બિંદુ

Dipti Solanki રાજકોટLast Updated: માર્ચ 24, 2026

1 minute read

Rajkot Earthquake: સૌરાષ્ટ્રના આર્થિક પાટનગર ગણાતા રાજકોટ શહેરમાં આજે સાંજે 5.41 વાગ્યે ભૂકંપનો આંચકો અનુભવાતા નાગરિકોમાં ભારે ગભરાટ ફેલાયો હતો. રિક્ટર સ્કેલ પર આ આંચકાની તીવ્રતા 3.2 નોંધવામાં આવી છે. જોકે આ તીવ્રતા સામાન્ય ગણાય, પરંતુ ભૂકંપનું કેન્દ્રબિંદુ શહેરની અત્યંત નજીક હોવાને કારણે સ્થાનિકોએ આંચકો સ્પષ્ટપણે અનુભવ્યો હતો અને લોકો સાવચેતીના ભાગરૂપે ઘરની બહાર દોડી આવ્યા હતા.

સાંજે 5:41 કલાકે ધરા ધ્રૂજી

ગાંધીનગર સ્થિત ભૂકંપ સંશોધન કેન્દ્ર (ISR) ના જણાવ્યા અનુસાર, રાજકોટમાં આ ભૂકંપનો આંચકો સાંજે 5:41 કલાકે નોંધાયો હતો. આ આંચકાની સૌથી નોંધપાત્ર અને ચિંતાજનક બાબત એ છે કે તેનું કેન્દ્રબિંદુ રાજકોટ શહેરથી માત્ર 7 કિલોમીટર દૂર નોંધાયું છે. કેન્દ્રબિંદુ આટલું નજીક હોવાને કારણે જ 3.2ની ઓછી તીવ્રતા હોવા છતાં તેની અસર શહેરના મોટાભાગના વિસ્તારોમાં વર્તાઈ હતી. ખાસ કરીને બહુમાળી ઇમારતોમાં રહેતા લોકોએ પંખા અને અન્ય ઘરવખરી હલતી હોવાનો અનુભવ કર્યો હતો.

જાનમાલનું નુકસાન નહીં

અત્યાર સુધી પ્રાપ્ત થયેલી પ્રાથમિક માહિતી અનુસાર, આ ભૂકંપના આંચકાને કારણે કોઈ પણ પ્રકારની જાનહાનિ કે મોટી મિલકતને નુકસાન થયાના સમાચાર નથી. જોકે, ભૂતકાળમાં આવેલા મોટા ભૂકંપોની યાદ તાજી થતા લોકોમાં થોડો સમય માટે ડરનો માહોલ જોવા મળ્યો હતો.