પ્રધાનમંત્રી નરેન્દ્ર મોદી દ્વારા દેશવાસીઓને એક વર્ષ સુધી સોનાની ખરીદી ટાળવાની અપીલ કર્યા બાદ દેશભરમાં ચર્ચાનો માહોલ સર્જાયો છે. ભારતમાં સોનું માત્ર આભૂષણ કે રોકાણ નથી, પરંતુ પરંપરા, લગ્ન અને પરિવારની બચત સાથે જોડાયેલું મહત્વપૂર્ણ પ્રતિક માનવામાં આવે છે. આવા સમયમાં PM મોદીની આ અપીલ પાછળનું આર્થિક કારણ શું છે અને તેની સોનાના બજાર પર કેવી અસર પડી શકે તે મુદ્દે ચર્ચા તેજ બની છે.
અહેવાલો મુજબ, પશ્ચિમ એશિયામાં વધી રહેલા તણાવ અને તેનાથી આંતરરાષ્ટ્રીય ક્રૂડ ઓઇલના ભાવમાં થયેલા ભારે વધારાને કારણે ભારતની અર્થવ્યવસ્થાની ચિંતાઓ વધી રહી છે. છેલ્લા કેટલાક અઠવાડિયામાં કાચા તેલના ભાવ લગભગ 70 ડોલર પ્રતિ બેરલથી વધીને 120 ડોલરથી વધુ પહોંચી ગયા છે. ભારત પોતાની જરૂરિયાતનું મોટાભાગનું ક્રૂડ ઓઇલ આયાત કરે છે અને તેની ચુકવણી ડોલરમાં કરવી પડે છે. આવી સ્થિતિમાં વિદેશી ચલણના ભંડાર પર ભારે દબાણ ઉભું થઈ રહ્યું છે.
ભારત વિશ્વના સૌથી મોટા સોનાના આયાતકાર દેશોમાંથી એક છે. દેશમાં લગ્ન, તહેવારો અને રોકાણ માટે મોટા પાયે સોનાની ખરીદી થાય છે. સરકારનું માનવું છે કે જો લોકો થોડો સમય સોનાની ખરીદી ઘટાડે તો દેશમાંથી ડોલરની બહાર જતી રકમમાં ઘટાડો થશે અને રૂપિયાને મજબૂતી મળી શકે છે. અર્થશાસ્ત્રીઓનું કહેવું છે કે તેલ જેવી જરૂરિયાતની વસ્તુની આયાત ટાળી શકાતી નથી, પરંતુ સોનાની ખરીદી થોડા સમય માટે મુલતવી રાખી શકાય છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
PM મોદીએ લોકોને માત્ર સોનાની ખરીદી ટાળવા જ નહીં, પરંતુ પેટ્રોલ-ડીઝલનો ઓછો ઉપયોગ કરવા, વર્ક ફ્રોમ હોમ અપનાવવા અને બિનજરૂરી વિદેશ પ્રવાસ ટાળવા પણ અપીલ કરી હતી. સરકારનું માનવું છે કે આ પગલાંથી વિદેશી ચલણ બચાવવામાં મદદ મળશે અને આર્થિક દબાણ થોડું ઓછું થઈ શકે છે.
PM મોદીની અપીલ બાદ શેરબજારમાં જ્વેલરી કંપનીઓના શેરોમાં પણ ઘટાડો નોંધાયો હતો. રોકાણકારોમાં એવી આશંકા જોવા મળી રહી છે કે જો સોનાની માંગ ઘટશે તો જ્વેલરી ઉદ્યોગ પર તેની સીધી અસર પડશે. કેટલાક નિષ્ણાતોનું માનવું છે કે ભવિષ્યમાં સરકાર સોનાની આયાત પર ડ્યૂટીમાં વધારો કરી શકે છે, જોકે હાલ સરકાર તરફથી આવી કોઈ સત્તાવાર જાહેરાત કરવામાં આવી નથી.
વિશેષજ્ઞોનું કહેવું છે કે જો લોકો મોટા પ્રમાણમાં સોનાની ખરીદી ઘટાડશે તો ટૂંકા ગાળામાં સોનાના સ્થાનિક ભાવમાં નરમાઈ જોવા મળી શકે છે. જોકે ભારતમાં સોનાને લઈને લાગણીશીલ જોડાણ ખૂબ મજબૂત હોવાથી લાંબા ગાળે માંગમાં મોટો ઘટાડો થવાની શક્યતા ઓછી માનવામાં આવી રહી છે.
આ પણ વાંચો: કેદારનાથથી પરત ફરતી મહિલા ટ્રેનમાંથી ગાયબ, બિહારથી સલામત મળી આવી
