મે મહિનામાં રિટેલ મોંઘવારી દર વધીને 3.93% થયો, સામાન્ય માણસના ખિસ્સા પર વધ્યો બોજ

Retail Inflation in India: દેશમાં મોંઘવારી ફરી એકવાર ચિંતાજનક સ્તરે પહોંચી રહી છે. સરકારી આંકડા અનુસાર, મે 2026માં ભારતનો રિટેલ મોંઘવારી દર (CPI) વધીને 3.93% થયો છે. જોકે આ આંકડો બજારના 4.0%ના અંદાજ કરતાં થોડો ઓછો રહ્યો છે, તેમ છતાં ખાદ્યપદાર્થો અને ઈંધણના સતત વધી રહેલા ભાવોને કારણે સામાન્ય લોકોના ઘરખર્ચ પર વધુ બોજ પડ્યો છે.

શુક્રવારે જાહેર કરાયેલા સરકારી આંકડા મુજબ, મે મહિનામાં ભારતમાં રિટેલ મોંઘવારી દર વધીને 3.93% થઈ ગયો છે. તેનું મુખ્ય કારણ ખાદ્યપદાર્થો અને ઈંધણના વધતા ભાવ છે. આ ઉપરાંત, મધ્ય પૂર્વમાં ચાલી રહેલા સંઘર્ષને કારણે પણ કિંમતો પર દબાણ વધ્યું છે, જેના કારણે આગામી મહિનાઓમાં મોંઘવારી અંગેની અનિશ્ચિતતા યથાવત્ રહી છે. તેમ છતાં, મે મહિનાનો આંકડો RBIના મધ્યમ ગાળાના મોંઘવારી લક્ષ્યની નજીક રહ્યો છે.

મોંઘવારીના આ આંકડા એવા સમયે સામે આવ્યા છે જ્યારે સરકારી ઇંધણ કંપનીઓએ મે મહિનામાં જ ચાર વખત ઇંધણના ભાવમાં વધારો કર્યો છે, જેના કારણે પરિવહન ખર્ચમાં વધારો થયો છે. બીજી તરફ, ખાદ્યપદાર્થોનો મોંઘવારી દર મે મહિનામાં વધીને 4.78% થઈ ગયો છે, જે ગયા વર્ષના નીચલા સ્તર અને એપ્રિલ મહિનાના 4.20%ના દર કરતાં વધુ છે.

પરિવહન ક્ષેત્રની મોંઘવારીમાં પણ નોંધપાત્ર ઉછાળો જોવા મળ્યો છે. એપ્રિલમાં 0.01%ના ઘટાડા બાદ મે મહિનામાં આ દર વધીને 1.75% થયો છે, જે ઇંધણના વધેલા રિટેલ ભાવોની અસર દર્શાવે છે. આ વચ્ચે, ઊંચા ક્રૂડ ઓઈલના ભાવ અને નબળા ચોમાસાની સંભાવનાઓને ધ્યાનમાં રાખીને RBIએ ચાલુ નાણાકીય વર્ષ માટે મોંઘવારીનો અંદાજ 4.6%થી વધારીને 5.1% કર્યો છે. સાથે જ રૂપિયાના મૂલ્યમાં ઘટાડો અને ચાલુ ખાતાની ખાધ વધવાની આશંકાએ અર્થવ્યવસ્થા સામે નવા પડકારો ઊભા કર્યા છે.

મોંઘવારીમાં થયેલો આ વધારો આગામી મહિનાઓમાં સામાન્ય લોકોના બજેટ પર વધુ દબાણ લાવી શકે છે અને સરકાર તેમજ RBI માટે કિંમતોને નિયંત્રણમાં રાખવું મોટો પડકાર બની શકે છે.

આ પણ વાંચો: દુનિયાના પ્રથમ ખરબપતિ બનશે એલન મસ્ક, તાઈવાનના GDP જેટલી નેટવર્થ થઈ