સાબરમતી નદી બે કાંઠે અમદાવાદના આ વિસ્તારમાંથી લોકોનું સ્થળાંતર કરાવ્યું

અમદાવાદ 7 સપ્ટેમ્બર 2025: અમદાવાદમાં છેલ્લા 24 કલાકથી અવિરત વરસાદ અને સાબરમતી નદીમાં પાણીના વધતા સ્તરને કારણે બે મોટી આફતોની સ્થિતિ સર્જાઈ છે. શહેરના સૌથી નીચાણવાળા વિસ્તારોમાં પાણી ઘુસવાનું શરૂ થઈ ગયું છે, જેના કારણે રહેવાસીઓમાં ભયનો માહોલ છે. હવામાન વિભાગની આગાહી મુજબ, આગામી 24 કલાકમાં ભારે વરસાદ ચાલુ રહેવાનો છે, જે પરિસ્થિતિને વધુ જટિલ બનાવી શકે છે.

ઉપરવાસમાં પડેલા ભારે વરસાદને કારણે ધરોઈ ડેમમાંથી 25 હજાર ક્યુસેક પાણી છોડવામાં આવ્યું છે, જે વાયા સંત સરોવર અને વાસણા બેરેજમાંથી પસાર થઈ રહ્યુ છે. આ પાણીથી સાબરમતી નદી બે કાંઠે વહી રહી છે અને રિવરફ્રન્ટના વોક વે પણ  પાણીમાં ગરકાવ થઈ ગયા છે. વાસણા બેરેજના 27 દરવાજા 6 ફૂટ ખોલીને 32,410 ક્યુસેક પાણી છોડવામાં આવી રહ્યું છે. આના કારણે નદીનું રૌદ્ર સ્વરૂપ જોવા મળી રહ્યું છે અને નીચાણવાળા વિસ્તારોમાં પાણીનો પ્રવાહ વધ્યો છે.

અમદાવાદ મ્યુનિસિપલ કોર્પોરેશન (એએમસી)એ પરિસ્થિતિને ધ્યાનમાં રાખીને તાત્કાલિક પગલાં લીધા છે. શહેરના નીચાણવાળા વિસ્તારોમાં રહેતા લોકોને સુરક્ષિત જગ્યાઓ પર લઈ જવાની કામગીરી ચાલુ છે. વિશેષ રીતે વાડજ અને પરિક્ષિત નગર બેટ જેવા વિસ્તારોમાં પાણી ઘુસવાનું શરૂ થયું હોવાથી, 40 પરિવારોનું સ્થળાંતર કરવામાં આવ્યું છે. એએમસીની ટીમો 24 કલાક ડ્યુટી પર છે અને પ્રભાવિત વિસ્તારોમાં રાહત કાર્યો કરી રહી છે. જિલ્લા કલેક્ટરે લોકોને નદી કિનારે ન જવા અને સાવચેતી રાખવાની અપીલ કરી છે. સુભાષબ્રિજ પર વ્હાઇટ સિગ્નલ એલર્ટ જાહેર કરાયું છે, જેના કારણે ટ્રાફિક ડાયવર્શન કરવામાં આવ્યું છે.

આગામી દિવસોમાં પાણી વધવાની શક્યતાઓ વધુ છે, કારણ કે ઉપરવાસમાં વરસાદનું રેડ એલર્ટ જારી છે. ધરોઈ ડેમનું સ્તર 617.28 ફૂટ પર પહોંચ્યું છે અને 82.27 ટકા ભરાયું છે. સંત સરોવરમાંથી પણ 22,000 ક્યુસેક પાણી છોડાયું છે. આના કારણે મહેસાણા, સાબરકાંઠા, ગાંધીનગર, અમદાવાદ, ખેડા અને આણંદ જિલ્લાના 28થી વધુ ગામોને એલર્ટ કરાયા છે. ખેડા જિલ્લામાં 22 બસો દ્વારા લોકોનું સ્થળાંતર કરવામાં આવ્યું છે. હવામાન નિષ્ણાત અંબાલાલ પટેલે ‘મેઘ તાંડવ’ની આગાહી કરી છે, જેમાં ભારેથી અતિભારે વરસાદની શક્યતા છે.

એએમસી અને વહીવટી તંત્રે ડિઝાસ્ટર મેનેજમેન્ટ પ્લાન અનુસાર કાર્યવાહી શરૂ કરી છે. લોકોને વરસાદી વાતાવરણમાં બહાર ન નીકળવા અને હેલ્પલાઇન 1077 પર સંપર્ક કરવાની સલાહ આપવામાં આવી છે. આ પરિસ્થિતિમાં તંત્રની તત્પરતા અને જનજાગૃતિ જરૂરી છે, જેથી જાનમાલનું નુકસાન ટાળી શકાય.

આ પણ વાંચો: ગુજરાતમાં સતત અનરાધાર વર્ષા, સિઝનનો 100% વરસાદ થતા ખેડૂતોમાં ખુશી