પાકિસ્તાન આર્મીનું Mi-17 હેલિકોપ્ટર PoK માં ક્રેશ, ટેક-ઓફ વખતે સર્જાઈ દુર્ઘટના; તમામ સૈનિકોના મોત
International News: પાકિસ્તાન આર્મી એવિએશનનું એક Mi-17 હેલિકોપ્ટર બુધવારે મોટી દુર્ઘટનાનો શિકાર બન્યું છે. આ અકસ્માત પાકિસ્તાનના કબજા હેઠળના કાશ્મીરની (PoK) રાજધાની મુઝફ્ફરાબાદ નજીક ટેક-ઓફ દરમિયાન થયો હતો. પાકિસ્તાની અખબાર ‘ડૉન’ એ ઇન્ટર-સર્વિસીસ પબ્લિક રિલેશન્સને (ISPR) ટાંકીને પુષ્ટિ કરી છે કે હેલિકોપ્ટરમાં સવાર તમામ સૈન્ય કર્મચારીઓના મોત થયા છે.
સૈન્ય નિવેદન અનુસાર, પ્રારંભિક તપાસમાં અકસ્માતનું મુખ્ય કારણ ટેકનિકલ ખામી હોવાનું બહાર આવ્યું છે. હેલિકોપ્ટરે મુઝફ્ફરાબાદ પાસેથી ઉડાન ભરી કે તરત જ તે કોઈ યાંત્રિક ગરબડનો શિકાર બન્યું હતું અને નિયંત્રણ ગુમાવીને નીચે તૂટી પડ્યું હતું. અકસ્માતની ખબર મળતા જ સેનાની રેસ્ક્યુ ટીમો તાત્કાલિક ઘટનાસ્થળે પહોંચી ગઈ હતી અને રાહત કાર્ય શરૂ કર્યું હતું. અકસ્માતના ચોક્કસ ટેકનિકલ કારણો શોધવા માટે સેનાએ ‘બોર્ડ ઓફ ઈન્ક્વાયરી’ ના આદેશ આપ્યા છે. જોકે, હેલિકોપ્ટરમાં કુલ કેટલા લોકો સવાર હતા તેની સત્તાવાર સંખ્યા હજુ જાહેર કરવામાં આવી નથી.
જાણો શું છે Mi-17 હેલિકોપ્ટર અને તેની ખાસિયતો
પાકિસ્તાનમાં Mi-17 હેલિકોપ્ટર ક્રેશ થવાની આ પહેલી ઘટના નથી, આ પહેલા પણ આ મોડેલ સાથે અનેક અકસ્માતો થઈ ચૂક્યા છે. Mi-17 એ મૂળ રશિયા દ્વારા ઉત્પાદિત મીડિયમ-લિફ્ટ ટ્રાન્સપોર્ટ હેલિકોપ્ટર છે. તેને રશિયાના ‘મિલ મોસ્કો હેલિકોપ્ટર પ્લાન્ટ’ દ્વારા વિકસાવવામાં આવ્યું હતું, જે જૂના Mi-8 હેલિકોપ્ટરનું એડવાન્સ અને અપગ્રેડેડ વર્ઝન છે. તેની મુખ્ય ખાસિયતો નીચે મુજબ છે:
ક્ષમતા (Capacity): આ ખૂબ જ શક્તિશાળી હેલિકોપ્ટર છે, જે સંપૂર્ણ હથિયારોથી સજ્જ 30 સૈનિકોને એકસાથે લઈ જઈ શકે છે. ઈમરજન્સીની સ્થિતિમાં તેમાં 12 સ્ટ્રેચર પણ લોડ કરી શકાય છે.
* વજન ઉઠાવવાની ક્ષમતા (Payload): તે તેના કેબિનની અંદર અંદાજે 4000 કિલોગ્રામ (4 ટન) સુધીનો સામાન લઈ જઈ શકે છે. આ ઉપરાંત, નીચે લાગેલા એક્સટર્નલ સ્લિંગ (દોરડા/હૂક) દ્વારા તે હવામાં 3000 કિલોગ્રામ (3 ટન) સુધીનું વધારાનું વજન ઉઠાવી શકે છે.
* એન્જિન (Engine): તે બે ક્લિમોવ TV3-117 (Klimov TV3-117) ટર્બોશાફ્ટ એન્જિનથી સજ્જ છે, જે તેને પહાડી અને દુર્ગમ વિસ્તારોમાં પણ ઉડાન ભરવાની તાકાત આપે છે.
* ઝડપ (Speed): આ હેલિકોપ્ટર હવામાં 250 કિલોમીટર પ્રતિ કલાકની મહત્તમ ઝડપે ઉડી શકે છે.
બહુઉપયોગી પરંતુ જૂનો થઈ રહેલો કાફલો
ભારત અને પાકિસ્તાન સહિત વિશ્વભરની સેનાઓ સૈનિકોના પરિવહન, રેશન અને સામગ્રી પહોંચાડવા, રાહત-બચાવ કાર્યો અને સૈન્ય અભિયાનો માટે Mi-17 હેલિકોપ્ટરનો વ્યાપક ઉપયોગ કરે છે. પરંતુ છેલ્લા કેટલાક વર્ષોમાં, આ હેલિકોપ્ટર જૂના થવાને કારણે અને પ્રોપર મેન્ટેનન્સના અભાવે ક્રેશ થવાની ઘટનાઓમાં સતત વધારો થઈ રહ્યો છે.
આ પણ વાંચોઃ ‘નેહરુના સમયમાં અને આજે ઘણો ફરક છે’, પીએમ મોદીની સિદ્ધિ પર રાઘવ ચઢ્ઢાનું નિવેદન
આ પણ વાંચોઃ રશિયા સાથેની મિત્રતા ભારે પડી, EUએ ભારત-ચીનની કંપનીઓ પર પ્રતિબંધ મુક્યા
અમારી WhatsApp ચેનલમાં જોડાવા આ લિંક પર ક્લીક કરો
