શેરબજારમાં સતત ચોથા દિવસે તેજી! સેન્સેક્સ 347 અંક ઉછળ્યો, નિફ્ટી 24,085ની ઉપર બંધ
Stock Market: ભારતીય શેરબજારમાં તેજીનો માહોલ યથાવત રહ્યો છે. બુધવાર, 17 જૂનના કારોબારમાં સતત ચોથા ટ્રેડિંગ સેશનમાં બજાર લીલા નિશાન સાથે બંધ થયું હતું. મેટલ, PSU બેંક, પાવર અને કેપિટલ ગુડ્સ સેક્ટરમાં જોરદાર ખરીદીના કારણે બજારને મજબૂત સપોર્ટ મળ્યો હતો.
દિવસના અંતે BSE સેન્સેક્સ 347.14 અંક અથવા 0.45 ટકાની વૃદ્ધિ સાથે 77,155.62ના સ્તરે બંધ થયો હતો. જ્યારે NSE નિફ્ટી 96.55 અંક અથવા 0.40 ટકાના વધારા સાથે 24,085.70ના સ્તરે બંધ રહ્યો હતો. બજારની આ સતત તેજી રોકાણકારોના વિશ્વાસને વધુ મજબૂત બનાવે છે.
નિફ્ટી-50માં ટ્રેન્ટ, ભારત ઇલેક્ટ્રોનિક્સ (BEL), હિન્ડાલ્કો ઇન્ડસ્ટ્રીઝ, ઇટર્નલ અને ટાટા સ્ટીલ સૌથી વધુ વધનાર શેરોમાં સામેલ રહ્યા હતા. બીજી તરફ ટાટા મોટર્સ, સિપ્લા, બજાજ ફિનસર્વ, ONGC અને એક્સિસ બેંકના શેરોમાં નબળાઈ જોવા મળી હતી.
મિડકેપ અને સ્મોલકેપનું પણ સારું પ્રદર્શન
મિડકેપ અને સ્મોલકેપ શેરોએ પણ મુખ્ય ઇન્ડેક્સ કરતાં વધુ સારું પ્રદર્શન કર્યું હતું. નિફ્ટી મિડકેપ-100 ઇન્ડેક્સમાં લગભગ 0.5 ટકાનો વધારો નોંધાયો હતો, જ્યારે નિફ્ટી સ્મોલકેપ-100 ઇન્ડેક્સ 0.8 ટકા સુધી ચઢ્યો હતો.
સેક્ટરલ ઇન્ડેક્સની વાત કરીએ તો કેપિટલ ગુડ્સ સેક્ટરે સૌથી સારું પ્રદર્શન કર્યું અને તેમાં 2 ટકાનો ઉછાળો નોંધાયો હતો. કન્ઝ્યુમર ડ્યુરેબલ્સ, મેટલ, પાવર અને PSU બેંક ઇન્ડેક્સમાં પણ 1 ટકાથી વધુનો વધારો જોવા મળ્યો હતો. જોકે ઓટો અને રિયલ્ટી સેક્ટરમાં નફાવસૂલીના કારણે આશરે 0.5 ટકાનો ઘટાડો નોંધાયો હતો.
રેલી યથાવત રહેશે
માર્કેટ નિષ્ણાતોના મતે નિફ્ટી માટે 23,940થી 23,960નો ઝોન મહત્ત્વપૂર્ણ સપોર્ટ તરીકે કામ કરી શકે છે, જ્યારે 24,190થી 24,210નો વિસ્તાર તાત્કાલિક રેઝિસ્ટન્સ માનવામાં આવી રહ્યો છે. જો નિફ્ટી 24,210ની ઉપર ટકી રહે તો આગામી દિવસોમાં 24,400 સુધીની રેલી જોવા મળી શકે છે.
બજારના વ્યાપક ચિત્ર પર નજર કરીએ તો 2,117 શેરોમાં વધારો નોંધાયો હતો, જ્યારે 1,737 શેરોમાં ઘટાડો થયો હતો અને 159 શેરોમાં કોઈ ખાસ ફેરફાર જોવા મળ્યો નહોતો. આ આંકડા દર્શાવે છે કે બજારમાં ખરીદદારોનું પ્રભુત્વ યથાવત રહ્યું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
રોકાણકારો માટે આગામી દિવસોમાં વૈશ્વિક બજારોના સંકેતો, વ્યાજદર સંબંધિત નિર્ણયો અને વિદેશી રોકાણકારોની પ્રવૃત્તિઓ મહત્ત્વપૂર્ણ રહેશે. હાલ માટે ભારતીય શેરબજારમાં તેજીનો ટ્રેન્ડ યથાવત હોવાનું જણાઈ રહ્યું છે.
