અમદાવાદગુજરાતટોપ ન્યૂઝટ્રેન્ડિંગ
અમદાવાદમાં સાયબર માફિયાઓનો નવો કિમિયો: ટ્રાફિક ઈ-ચલણના નામે લિંક મોકલી ₹65 હજાર ઉઠાવી લીધા
અમદાવાદ 20 જુલાઈ, 2025: અમદાવાદમાં સાયબર ગુનેગારોએ ટ્રાફિક ઈ-ચલણ ભરવાના નામે નવી રીતે ઠગાઈ કરવાનું શરૂ કર્યું છે. શહેરના પાલડી વિસ્તારમાં રહેતા ખાનગી કંપનીના કલેક્શન મેનેજર અંકિત પટેલને એમ. પરિવહન એપ્લિકેશનમાં ઈ-ચલણ ભરવા માટે એક લિંક મળી હતી. આ લિંક ખોલતાં જ તેમનો ફોન હેક થઈ ગયો, અને ફોન સ્વિચ ઓફ કરી ફરી ચાલુ કરતાં તેમના બેંક ખાતામાંથી ₹65,000 ઉપડી ગયા હતા.
આ ઘટનાથી સાયબર ગુનાઓની નવી રીત સામે આવી છે, જેમાં ગુનેગારો ટ્રાફિક ચલણના નામે નકલી લિંક મોકલીને લોકોના ફોન અને બેંક ખાતાઓને નિશાન બનાવે છે. અંકિત પટેલે આ અંગે પાલડી પોલીસ સ્ટેશનમાં ફરિયાદ નોંધાવી છે. પોલીસે જણાવ્યું કે આવા સાયબર ફ્રોડમાં વપરાતી લિંક ઓપન કરવાથી માલવેર ફોનમાં ઇન્સ્ટોલ થઈ શકે છે, જે બેંકની વિગતો ચોરી લે છે.
પાલડી પોલીસે ફરિયાદના આધારે તપાસ શરૂ કરી છે અને સાયબર ક્રાઈમ સેલની મદદથી આરોપીઓને શોધવાની કાર્યવાહી હાથ ધરી છે. પોલીસે નાગરિકોને અજાણી લિંક ન ખોલવા અને ઈ-ચલણ ભરવા માટે માત્ર સરકારી વેબસાઈટ કે એપ્લિકેશનનો ઉપયોગ કરવા અપીલ કરી છે. આ ઘટનાએ શહેરમાં સાયબર સુરક્ષા અંગે ચેતવણીનો સંદેશો આપ્યો છે.
