ટોપ ન્યૂઝનેશનલ

જમ્મુ-કાશ્મીર : કુલગામમાં સુરક્ષાદળોની મોટી કાર્યવાહી, આતંકી ઉમર નિસાર ઠાર

National News : સોમવારે (16 નવેમ્બર) દક્ષિણ કાશ્મીરના કુલગામમાં સુરક્ષા દળોએ એક આતંકવાદીને ઠાર માર્યો હતો. માર્યા ગયેલા આતંકવાદીની ઓળખ ઉમર નિસાર ડાર તરીકે થઈ છે. એવું જાણવા મળ્યું છે કે ઉમર તાજેતરમાં જ આતંકવાદી સંગઠન લશ્કર-એ-તૈયબા (LeT)માં જોડાયો હતો. તે લશ્કર-એ-તૈયબા કમાન્ડર લતીફ અહેમદ ભટનો સહયોગી હતો. તેની પાસેથી એક AK47 પણ મળી આવી હતી.

સ્થાનિક આતંકવાદી ઉમર નિસાર ડાર ઠાર

માહિતી અનુસાર, સુરક્ષા દળોને ત્યાં બે આતંકવાદીઓ છુપાયેલા હોવાની માહિતી મળી હતી. ત્યારબાદ, સર્ચ ઓપરેશન શરૂ કરવામાં આવ્યું હતું. એન્કાઉન્ટર દરમિયાન, સ્થાનિક આતંકવાદી ઉમર નિસાર ડાર માર્યો ગયો હતો. તે કુલગામ નૌપુરા CRPF હુમલામાં સામેલ આતંકવાદી લતીફ ભટનો સહયોગી હતો.

CRPFને બનાવ્યું નિશાન

11 નવેમ્બરના રોજ, જમ્મુ અને કાશ્મીરના કુલગામ જિલ્લાના નૌપુરા મીર બજારમાં બે ભારે હથિયારોથી સજ્જ આતંકવાદીઓએ સેન્ટ્રલ રિઝર્વ પોલીસ ફોર્સ (CRPF) ચોકી પર ગોળીબાર કર્યો હતો. હુમલામાં ત્રણ CRPF જવાનો ઘાયલ થયા હતા.

હુમલા પહેલા રેકી હાથ ધરવામાં આવી હતી

10 નવેમ્બરના રોજ, ઉમર નિસાર ડારે લશ્કર-એ-તૈયબા (LeT)/TRF કમાન્ડર લતીફ ભટ સાથે મળીને મીર બજાર, અખરાન, હબ્લિશ અને કિલમ સહિત અનેક સ્થળોની રેકી (નિરીક્ષણ) કરી હતી, જેથી સુરક્ષા દળો પર હુમલાઓનું આયોજન કરી શકાય અને લક્ષ્યોને ઓળખી શકાય. 11 નવેમ્બરના રોજ, ઉમર નિસાર ડારે લતીફ ભટ સાથે મળીને હુમલો કર્યો અને પછી ભાગી ગયો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સીસીટીવી ફૂટેજમાં આતંકવાદીઓ કેદ

10 અને 11 નવેમ્બરના સીસીટીવી ફૂટેજની તપાસ કરતી વખતે, સુરક્ષા એજન્સીઓએ શોધી કાઢ્યું કે ઉમર નિસાર ડાર અને લશ્કર કમાન્ડર લતીફ ભટ સ્થળોએ લગાવેલા અનેક સીસીટીવી કેમેરામાં કેદ થયા હતા. ફૂટેજમાં તેમની ગતિવિધિઓ દેખાઈ હતી: પહેલા રેકી કરવી અને પછી અખરાન હુમલા પછી ભાગી જવું.

લશ્કર કમાન્ડર લતીફ ભટને આશ્રય આપ્યો

ઉમર નિસાર ડાર ગુમ થયા પછી, તેના પરિવારે કુલગામ પોલીસ સ્ટેશનમાં ગુમ વ્યક્તિનો રિપોર્ટ નોંધાવ્યો. તપાસ દરમિયાન, એજન્સીઓને જાણવા મળ્યું કે ઉમર છેલ્લા 5-6 મહિનાથી લશ્કર કમાન્ડર લતીફ ભટને આશ્રય અને ટેકો આપી રહ્યો હતો. તપાસમાં એ પણ બહાર આવ્યું છે કે, ઉમર નિસાર ડાર અખરાન ઘટના પછી તરત જ TRF સંગઠનમાં જોડાયો હતો.

હુમલાના સ્થળેથી ભાગી ગયા બાદ, સુરક્ષા દળોએ ગઈકાલે લારૂમાં ઉમર નિસાર ડાર અને લતીફ ભટને ઘેરી લીધા હતા. ત્યારબાદ થયેલી એન્કાઉન્ટરમાં ઉમર નિસાર ડાર માર્યો ગયો. લશ્કર કમાન્ડર લતીફ ભટની શોધ ચાલુ છે. વિસ્તારમાં સર્ચ ઓપરેશન ચાલી રહ્યું છે અને સમગ્ર વિસ્તારને ઘેરી લેવામાં આવ્યો છે.

આ પણ વાંચો : અસમમાં એક જ પરિવારના ત્રણ સભ્યોની હત્યા, બંધ ઘરમાંથી પતિ-પત્ની અને દીકરીના મૃતદેહ મળ્યા

Back to top button