ટ્રેન્ડિંગનેશનલ

ઓપરેશન સિંદૂરમાં પાકિસ્તાનની પડખે કેમ ઊભું રહ્યું હતું ચીન? અમેરિકી રિપોર્ટમાં મોટો ખુલાસો

Operation Sindoor:  અમેરિકી કોંગ્રેસની એક પેનલના વાર્ષિક રિપોર્ટમાં ઘણા મોટા દાવા કરવામાં આવ્યા છે. આ રિપોર્ટ મુજબ, ‘ઓપરેશન સિંદૂર’ દરમિયાન ચીને પાકિસ્તાનને સૈન્ય અને ટેકનિકલ મદદ પૂરી પાડીને ભારતના વધતા પ્રભાવને રોકવાનો પ્રયાસ કર્યો હતો. ચીન વાસ્તવિક નિયંત્રણ રેખા (LAC) પાસે સૈન્ય સુવિધાઓ વધારવાની સાથે સાથે આર્થિક મોરચે પણ ભારત પર સતત દબાણ બનાવી રહ્યું છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ઓપરેશન સિંદૂર દરમિયાન ચીને પાકિસ્તાનની મદદ કેમ કરી હતી? શું આની પાછળ માત્ર પાકિસ્તાન સાથેની તેની દોસ્તી હતી કે પછી કોઈ મોટી રણનીતિ? અમેરિકી કોંગ્રેસની એક પેનલના તાજા રિપોર્ટમાં આ સવાલનો જવાબ આપવામાં આવ્યો છે.

રિપોર્ટ મુજબ, ચીને ઓપરેશન સિંદૂર દરમિયાન પાકિસ્તાનને સૈન્ય મદદ આપીને ભારતની વધતી તાકાતને રોકવાનો પ્રયાસ કર્યો હતો. ચીનની આ રણનીતિ માત્ર સૈન્ય મદદ પૂરતી સીમિત નથી. તે સરહદ પર દબાણ બનાવવાની સાથે-સાથે ભારતને આર્થિક મોરચે પણ ઘેરવામાં લાગેલું છે.

અમેરિકી પેનલે પોતાના વાર્ષિક રિપોર્ટમાં કહ્યું છે કે ચીન એશિયામાં ભારતના વધતા વર્ચસ્વને પોતાના માટે એક મોટો પડકાર માને છે. આ જ કારણે તે અનેક મોરચે ભારતને રોકવાનો પ્રયાસ કરી રહ્યું છે. રિપોર્ટમાં ભારત અને અમેરિકા વચ્ચે સંરક્ષણ, ગુપ્તચર માહિતી, દરિયાઈ સુરક્ષા અને વેપાર સાથે જોડાયેલા સહયોગને વધુ મજબૂત કરવાની જરૂરિયાત પર પણ ભાર મૂકવામાં આવ્યો છે.

ઓપરેશન સિંદૂરમાં પાકિસ્તાનની કેવી રીતે મદદ કરી?

અમેરિકી પેનલના જણાવ્યા અનુસાર, મે 2025માં ભારત અને પાકિસ્તાન વચ્ચે ત્રણ દિવસ સુધી ચાલેલા સંઘર્ષે ચીનની અસલી રણનીતિને ઉજાગર કરી દીધી હતી. ચીને સીધી રીતે યુદ્ધમાં ભાગ લીધો ન હતો, પરંતુ સંકટના સમયે પાકિસ્તાનને મજબૂત કરવામાં મદદ કરી હતી. આ રિપોર્ટમાં કહેવામાં આવ્યું છે કે ચીન અને પાકિસ્તાનની વધતી સૈન્ય ભાગીદારી ભારત માટે બે મોરચે (Two-Front War) યુદ્ધનો પડકાર વધારી શકે છે.

આ પહેલા ચીને પ્રથમ વખત જાહેરમાં સ્વીકાર્યું હતું કે તેણે ઓપરેશન સિંદૂર દરમિયાન પાકિસ્તાનને ટેકનિકલ મદદ આપી હતી. ચીની સરકારી મીડિયાને આપેલા એક ઈન્ટરવ્યુમાં એન્જિનિયર ઝાંગ હેંગે જણાવ્યું હતું કે તેઓ એ ટીમનો હિસ્સો હતા, જેણે પાકિસ્તાની વાયુસેનાને ટેકનિકલ સહાય પૂરી પાડી હતી.

ઝાંગે જણાવ્યું હતું કે તેમની ટીમનો મુખ્ય ઉદ્દેશ્ય પાકિસ્તાની વાયુસેનાના ઉપકરણોને તેમની પૂરી ક્ષમતા સાથે કામ કરવા લાયક બનાવવાનો હતો. તેઓ પાકિસ્તાન પાસે રહેલા J-10CE ફાઈટર જેટની વાત કરી રહ્યા હતા. આ અગાઉ લેફ્ટનન્ટ જનરલ રાહુલ સિંહે પણ કહ્યું હતું કે ચીને સંઘર્ષ દરમિયાન પાકિસ્તાનને ભારતની સૈન્ય તૈનાતી સાથે જોડાયેલી રિયલ-ટાઈમ માહિતી પૂરી પાડી હતી.

આ પણ વાંચોઃ સેવિંગ એકાઉન્ટમાં મેળવો FD વાળું વ્યાજ! શાનદાર છે આ સ્કીમ

સરહદ પર પણ ભારત પર દબાણ બનાવી રહ્યું છે ચીન

આ રિપોર્ટમાં જણાવવામાં આવ્યું છે કે ચીન માત્ર પાકિસ્તાનની મદદ કરવા પૂરતું સીમિત નથી, પરંતુ તે ભારતીય સરહદ નજીક પોતાની સૈન્ય તાકાત પણ વધારી રહ્યું છે. અરુણાચલ प्रदेशના ઘણા વિસ્તારોમાં ચીની સૈનિકો સાથે ઘર્ષણ ચાલુ હોવાની વાત પણ સામે આવી છે.

ભારત અને ચીન વચ્ચે 2024માં પૂર્વી લદ્દાખમાં ચાર વર્ષથી ચાલી રહેલા સૈન્ય ગતિરોધને ખતમ કરવા પર સહમતિ બની હતી. ત્યારબાદ બંને દેશોના સંબંધોમાં સુધારાના પ્રયાસો થયા, પરંતુ સરહદ પર તણાવ હજુ સંપૂર્ણપણે ખતમ થયો નથી.

અમેરિકી પેનલ મુજબ, ચીન વાસ્તવિક નિયંત્રણ રેખા (LAC) પાસે એરફિલ્ડ, રેલવે અને અન્ય જરૂરી માળખાગત સુવિધાઓ વિકસાવી રહ્યું છે. જેથી જરૂર પડ્યે તે પોતાના સૈનિકો અને સૈન્ય સામાનને ઝડપથી સરહદ સુધી પહોંચાડી શકે. આ ઉપરાંત ચીન હિંદ મહાસાગરમાં પણ પોતાની નૌસેનાની હાજરી અને જાસૂસી પ્રવૃત્તિઓ વધારી રહ્યું છે.

ભારતને આર્થિક મોરચે ઘેરવાનો પણ પ્રયાસ

અમેરિકી રિપોર્ટમાં કહેવામાં આવ્યું છે કે ચીન ભારત પર દબાણ લાવવા માટે પોતાની આર્થિક તાકાતનો પણ ઉપયોગ કરી રહ્યું છે. તે જરૂરી ઔદ્યોગિક સામાન, ટેકનોલોજી અને મશીનરીના સપ્લાયને પ્રભાવિત કરી રહ્યું છે. રિપોર્ટ મુજબ, ચીને ભારતને કેટલીક મહત્વપૂર્ણ વસ્તુઓની નિકાસ અટકાવી દીધી છે. તેણે ઈલેક્ટ્રોનિક્સ મેન્યુફેક્ચરિંગ સાથે જોડાયેલા એન્જિનિયરોને પરત બોલાવી લીધા છે અને ઉપકરણોનો પુરવઠો પણ રોકી દીધો છે.

રિપોર્ટમાં દવા બનાવવાના કામમાં વપરાતા કાચા માલ (API) નો પણ ઉલ્લેખ છે. ચીને તેની કિંમતો ઘણી ઘટાડી દીધી છે, જેના કારણે ભારતીય કંપનીઓ માટે બજારમાં ટકી રહેવું અને મુકાબલો કરવો મુશ્કેલ બની રહ્યો છે. બેટરી ટેકનોલોજીની નિકાસ પર ચીનના નિયંત્રણને પણ ભારત માટે એક મોટા પડકાર તરીકે ગણાવવામાં આવ્યું છે, જેની અસર દેશમાં ક્લીન એનર્જી સાથે જોડાયેલા પ્રોજેક્ટ્સ પર પડી શકે છે.

ચીનને જવાબ આપવા ભારત-અમેરિકા સહયોગ પર ભાર

અમેરિકી પેનલે સ્વીકાર્યું છે કે ભારત પોતાની સૈન્ય તાકાત અને ઘરેલું ઉત્પાદન ક્ષમતા ઝડપથી વધારી રહ્યું છે, તેમજ સંવેદનશીલ ક્ષેત્રોમાં ચીની કંપનીઓની ભૂમિકા પણ સીમિત કરવામાં આવી રહી છે. આમ છતાં, ભારતનો ઉદ્યોગ હજુ પણ ઘણા ચીની મશીનો અને સ્પેરપાર્ટ્સ પર નિર્ભર છે.

રિપોર્ટ મુજબ, ભારતને પોતાની સપ્લાય ચેઈન મજબૂત કરવા માટે મોટા રોકાણ, નવી ટેકનોલોજી અને સમયની જરૂર પડશે. આ જ કારણોસર અમેરિકી પેનલે ભારત સાથે સહયોગ વધારવાની ભલામણ કરી છે, જેમાં સંરક્ષણ ટેકનોલોજી, દરિયાઈ સુરક્ષા, ગુપ્તચર માહિતી અને મેન્યુફેક્ચરિંગ જેવા ક્ષેત્રો સામેલ છે.

રિપોર્ટનો સ્પષ્ટ સંદેશ છે કે એશિયામાં ચીનને સંતુલિત કરવામાં ભારતની ભૂમિકા અત્યંત મહત્વપૂર્ણ છે, અને આ જ કારણે ચીન ભારતની સૈન્ય અને આર્થિક તાકાતને વધતી અટકાવવાના સતત પ્રયાસો કરી રહ્યું છે.

આ પણ વાંચોઃ કેનેડાની મોસ્ટ વોન્ટેડ યાદીમાં ગોલ્ડી બરાડ પ્રથમ ક્રમે, ધરપકડ માટે 2.33 કરોડનું ઇનામ

Back to top button