કોમી એકતાનું ઉત્કૃષ્ઠ ઉદાહરણ; માતાજીના ગરબા કંડારે છે મુસ્લિમ કુંભાર પરિવાર

Muslim Potter Family: આપણા ગુજરાતીઓ માટે નવરાત્રિ એટલે ભક્તિ, ગરબા અને ઉત્સાહનો પર્વ. ભુજમાં આ પર્વની તૈયારીઓ શરૂ થાય તે પહેલાં જ એક મુસ્લિમ કુંભાર પરિવારના ઘરે નવરાત્રિનો માહોલ જોવા મળે છે. અબ્દુલ રહેમાન અલી મહમદ અને તેમનો પરિવાર વર્ષોથી માટીના પરંપરાગત ગરબા બનાવીને નવરાત્રિના પર્વ સાથે જોડાય છે. પરિવારનું કહેવું છે કે ધર્મ અલગ હોવા છતાં માતાજીના ગરબા બનાવવામાં તેમને આનંદ મળે છે. તેમના માટે આ કામ માત્ર રોજગારીનું સાધન નથી, પરંતુ લોકોના તહેવાર સાથે જોડાવાનો એક અલગ અનુભવ પણ છે.
એક મહિના પહેલાંથી શરૂ થાય છે તૈયારીઓ
નવરાત્રિ શરૂ થાય તેના લગભગ એક મહિના પહેલાંથી પરિવાર ગરબા બનાવવાની તૈયારીઓ શરૂ કરી દે છે. માટીને આકાર આપવાથી લઈને ગરબાને અલગ-અલગ ડિઝાઇનમાં તૈયાર કરવા સુધીની કામગીરી પરિવારના સભ્યો મળીને કરે છે. પરિવાર સમય પ્રમાણે ગરબામાં નવી ડિઝાઇન અને નવું કારીગરી કામ પણ ઉમેરે છે. રંગીન ગરબા, કટવર્ક ડિઝાઇન અને વિવિધ શુભ પ્રતીકોવાળા ગરબા તૈયાર કરવામાં આવે છે.
યુવતીઓ પણ કારીગરીમાં આપે છે સાથ
ગરબાની સજાવટમાં પરિવારની યુવતીઓ પણ મહત્વની ભૂમિકા ભજવે છે. તેઓ ગરબા પર કોન વર્ક, લેસ, અરીસા અને ડાયમંડ લગાવીને તેને વધુ આકર્ષક બનાવે છે. હાથની ઝીણવટભરી કારીગરીથી તૈયાર થતા આ ગરબા નવરાત્રિ દરમિયાન લોકોના ઘરો સુધી પહોંચે છે. એક જ પરિવારના અનેક સભ્યો સાથે મળીને કામ કરતા હોવાથી નવરાત્રિ પહેલાં જ તેમના વિસ્તારમાં ઉત્સવ જેવો માહોલ સર્જાઈ જાય છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
કળા સાથે જોવા મળે છે સાંસ્કૃતિક જોડાણ
ભુજના આ પરિવારની કારીગરીમાં માટી સાથે જોડાયેલી પરંપરા અને નવરાત્રિના પર્વ પ્રત્યેનો ઉત્સાહ બંને જોવા મળે છે. ગરબા બનાવવાની આ પ્રક્રિયા પરિવારની પેઢીથી ચાલી આવતી કુંભારકામની કળા સાથે પણ જોડાયેલી છે. નવરાત્રિ નજીક આવતાં પરિવારના ઘરમાં દિવસ-રાત ગરબા તૈયાર કરવાની કામગીરી ચાલે છે. અલગ-અલગ ડિઝાઇનમાં તૈયાર થતા આ માટીના ગરબા તેમની કારીગરીની સાથે તહેવારની રંગત પણ વધારી રહ્યા છે.











