ગાઝિયાબાદની પોલીસ ચોકીમાં મોડી રાત્રે જોરદાર ધડાકો! બારીઓના કાચ તૂટ્યા, ડિલિવરી બોય ઘાયલ

દિલ્હીને અડીને આવેલા ઉત્તર પ્રદેશના ગાઝિયાબાદમાં શુક્રવારે મોડી રાત્રે ચોંકાવનારી ઘટના સામે આવી છે. અહીં વસુંધરા પોલીસ ચોકીમાં અચાનક જોરદાર ધડાકો થતાં સમગ્ર વિસ્તારમાં અફરાતફરી મચી ગઈ હતી. ધડાકો એટલો પ્રચંડ હતો કે પોલીસ ચોકીની બારીઓના કાચ તૂટી ગયા હતા. આ ઘટનામાં એક ડિલિવરી બોય ઘાયલ થયો છે, જેને સારવાર માટે હોસ્પિટલમાં દાખલ કરવામાં આવ્યો છે. સદનસીબે, ધડાકો થયો ત્યારે પોલીસ ચોકીમાં વધુ પોલીસકર્મીઓ હાજર નહોતા, જેના કારણે મોટી જાનહાનિ ટળી હતી.

ધડાકાના અવાજથી વિસ્તારમાં મચી અફરાતફરી

મળતી માહિતી મુજબ, શુક્રવારે મોડી રાત્રે ગાઝિયાબાદની વસુંધરા પોલીસ ચોકીમાં અચાનક જોરદાર વિસ્ફોટ થયો હતો. વિસ્ફોટના કારણે પોલીસ ચોકીની બારીઓના કાચ તૂટીને વેરવિખેર થઈ ગયા હતા.

ઘટનાની જાણ થતાં જ પોલીસ વિભાગમાં દોડધામ મચી ગઈ હતી. એડિશનલ સીપી રાજ કરણ નાયર, ઇન્દિરાપુરમના એસીપી સૂર્યબલી મૌર્ય સહિતના ઉચ્ચ પોલીસ અધિકારીઓ ઘટનાસ્થળે પહોંચી ગયા હતા. આ ઉપરાંત ફોરેન્સિક ટીમને પણ તપાસ માટે બોલાવવામાં આવી હતી.

#WATCH | Ghaziabad, Uttar Pradesh: Additional CP Raj Karan Nayar, Indirapuram ACP Suryabali Maurya, along with the forensics team, arrive at the Vasundhara police outpost, where an explosion was reported last night https://t.co/dXzqM74qxI

— ANI (@ANI) November 7, 2026

ફટાકડાના કારણે ધડાકો થયો હોવાની આશંકા

પ્રાથમિક તપાસમાં પોલીસ ચોકીની અંદર રાખવામાં આવેલા ફટાકડાના કારણે વિસ્ફોટ થયો હોવાની આશંકા વ્યક્ત કરવામાં આવી રહી છે. જોકે, પોલીસ અધિકારીઓએ ફટાકડાના કારણે જ આ ઘટના બની હોવાની વાતને સમર્થન આપ્યું નથી.

પોલીસનું કહેવું છે કે વિસ્ફોટ કઈ વસ્તુમાં અને કયા કારણોસર થયો તેની તપાસ કરવામાં આવી રહી છે. ફોરેન્સિક ટીમ ઘટનાસ્થળેથી જરૂરી પુરાવા એકત્ર કરી રહી છે. તપાસ પૂર્ણ થયા બાદ જ ધડાકા પાછળનું સાચું કારણ જાણી શકાશે.

કાચના ટુકડા વાગતાં ડિલિવરી બોય ઘાયલ

આ સમગ્ર ઘટનામાં એક ડિલિવરી બોય ઘાયલ થયો છે. ઇન્દિરાપુરમના એસીપી સૂર્યબલી મૌર્યના જણાવ્યા અનુસાર, ધડાકો થયો ત્યારે પોલીસ ચોકીમાં એક સબ-ઇન્સ્પેક્ટર અને એક ડિલિવરી બોય હાજર હતા. ડિલિવરી બોય પોલીસ ચોકીમાં કેટલીક વસ્તુઓ પહોંચાડવા આવ્યો હતો.

વિસ્ફોટને કારણે બારીઓના કાચ તૂટી ગયા હતા અને કાચના ટુકડા ડિલિવરી બોયને વાગતાં તે ઘાયલ થયો હતો. ત્યારબાદ તેને તાત્કાલિક હોસ્પિટલમાં સારવાર માટે ખસેડવામાં આવ્યો હતો.

પોલીસ અને ફોરેન્સિક ટીમ તપાસમાં લાગી

ઘટનાની ગંભીરતાને ધ્યાનમાં રાખીને પોલીસ અધિકારીઓએ તપાસ તેજ કરી છે. ફોરેન્સિક ટીમ દ્વારા વિસ્ફોટના સ્થળેથી પુરાવા એકત્ર કરવામાં આવી રહ્યા છે. પોલીસ એ પણ તપાસ કરી રહી છે કે પોલીસ ચોકીની અંદર કઈ વસ્તુના કારણે આટલો મોટો ધડાકો થયો હતો.

હાલમાં આ ઘટનાને લઈને અનેક સવાલો ઊભા થયા છે. જોકે, વિસ્ફોટનું ચોક્કસ કારણ સામે આવ્યું નથી. પોલીસ તપાસના અહેવાલ બાદ જ સમગ્ર ઘટનાની હકીકત સ્પષ્ટ થશે.

આ પણ વાંચો: પેટ્રોલમાં 20%ની મર્યાદાની ઐસીતૈસી: તપાસમાં 31.2% સુધી ઇથેનોલનું મિશ્રણ મળ્યાનો કર્ણાટક સરકારનો મોટો દાવો