ઓડિશામાં ‘અર્નબ’ વાવાઝોડાનો કહેર: ગંજમનાં 300 ગામો જળબંબાકાર, હજારો લોકો ફસાયા

Cyclone Arnab Odisha: ઓડિશામાં ‘અર્નબ’ વાવાઝોડાના કારણે પડી રહેલા મૂશળધાર વરસાદે ભારે તબાહી મચાવી છે. ખાસ કરીને ગંજમ જિલ્લામાં પૂરની સ્થિતિ અત્યંત ગંભીર બની છે. આશરે 300 ગામો પૂરના પાણીમાં ગરકાવ થઈ જતાં અનેક લોકો મુશ્કેલીમાં મુકાયા છે. પૂરગ્રસ્ત વિસ્તારોમાં ફસાયેલા લોકોને સુરક્ષિત બહાર કાઢવા માટે રાજ્ય સરકાર હવે એરલિફ્ટ દ્વારા બચાવ કામગીરી હાથ ધરવાની તૈયારી કરી રહી છે. આ માટે કેન્દ્રીય ગૃહ મંત્રાલય સાથે પણ સતત સંપર્ક કરવામાં આવી રહ્યો છે. જોકે, ખરાબ હવામાન અને આકાશમાં છવાયેલાં ઘેરાં વાદળોને કારણે હેલિકોપ્ટર દ્વારા રેસ્ક્યૂ ઓપરેશનમાં મુશ્કેલી ઊભી થવાની શક્યતા છે.

ઋષિકુલ્યા નદીના જળસ્તરમાં વધારો, અનેક વિસ્તારોમાં પૂરની સ્થિતિ

ગંજમ જિલ્લામાં છેલ્લા ત્રણ દિવસથી સતત પડી રહેલા ભારે વરસાદના કારણે ઋષિકુલ્યા નદીના જળસ્તરમાં નોંધપાત્ર વધારો થયો છે. નદીના પાણી આસપાસનાં ગામો અને શહેરી વિસ્તારોમાં ફરી વળતાં જનજીવન અસ્તવ્યસ્ત થઈ ગયું છે.

ખાસ કરીને સોરડા વિસ્તારમાં પૂરની સૌથી વધુ અસર જોવા મળી રહી છે. જ્યારે અસ્કા વિસ્તારમાં પણ ઋષિકુલ્યા નદી ખતરાના નિશાન નજીક વહી રહી છે. આગામી કલાકોમાં વરસાદ ચાલુ રહેશે તો પરિસ્થિતિ વધુ ગંભીર બની શકે છે.

300 ગામો સંપર્કવિહોણાં, બચાવ કામગીરી સામે મોટો પડકાર

પૂરના પાણીથી આશરે 300 ગામો ઘેરાઈ જતાં અનેક રસ્તાઓ પાણીમાં ગરકાવ થઈ ગયા છે. પરિણામે આ ગામોનો અન્ય વિસ્તારો સાથેનો સંપર્ક તૂટી ગયો છે. NDRF અને સ્થાનિક બચાવ ટીમોને અસરગ્રસ્ત લોકો સુધી પહોંચવામાં ભારે મુશ્કેલીઓનો સામનો કરવો પડી રહ્યો છે.

જે વિસ્તારોમાં રસ્તા મારફતે પહોંચવું અશક્ય બન્યું છે, ત્યાં હવાઈ માર્ગે લોકોને સુરક્ષિત સ્થળે પહોંચાડવાની તૈયારી કરવામાં આવી રહી છે. રાજ્ય સરકાર આ માટે કેન્દ્ર સરકારની મદદ માગી રહી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ખરાબ હવામાનને કારણે હેલિકોપ્ટર રેસ્ક્યૂમાં વિલંબની શક્યતા

ઓડિશાનાં મુખ્ય સચિવ અનુ ગર્ગના જણાવ્યા અનુસાર, સરકારની સૌથી મોટી પ્રાથમિકતા પૂરમાં ફસાયેલા લોકોને સુરક્ષિત સ્થળે ખસેડવાની છે. જોકે, સતત વરસાદ અને આકાશમાં છવાયેલાં ઘેરાં વાદળોને કારણે હેલિકોપ્ટર ઉડાડવામાં જોખમ ઊભું થઈ શકે છે.

આથી હવામાનની સ્થિતિનું મૂલ્યાંકન કર્યા બાદ તબક્કાવાર હવાઈ બચાવ કામગીરી હાથ ધરવામાં આવશે. બીજી તરફ, ગંજમ જિલ્લા વહીવટીતંત્ર નદીના જળસ્તર, વરસાદની સ્થિતિ અને પૂરગ્રસ્ત વિસ્તારો પર સતત નજર રાખી રહ્યું છે.

સરકારની પ્રાથમિકતા લોકોનો જીવ બચાવવાની

ગંજમ જિલ્લામાં સર્જાયેલી પૂર જેવી ગંભીર પરિસ્થિતિને ધ્યાનમાં રાખીને વહીવટીતંત્ર દ્વારા રાહત અને બચાવ કામગીરીને પ્રાથમિકતા આપવામાં આવી રહી છે. 300 જેટલાં ગામોમાં ફસાયેલા લોકોને સુરક્ષિત બહાર કાઢવા માટે તમામ સંભવિત વિકલ્પો પર વિચારણા થઈ રહી છે. હવે હવામાન કેટલું અનુકૂળ બને છે તેના પર હવાઈ બચાવ કામગીરીનો આધાર રહેશે.

આ પણ વાંચો: મુંબઈમાં ત્રણ ગુજરાતી ભાઈ-બહેનનાં શંકાસ્પદ સામૂહિક આપઘાતથી ચકચાર