મુંબઈની વિચિત્ર ઘટના: 10માં માળેથી મહિલા પડી, ઝાડની ડાળીઓમાં ફસાઈ જતાં જીવ બચી ગયો

મુંબઈ: ભાંડુપ વિસ્તારમાં ગુરુવારે એક ચોંકાવનારી ઘટના સામે આવી હતી. સનશાઇન SRA બિલ્ડિંગની 10મા માળેથી એક મહિલા નીચે પટકાઈ ગઈ હતી. જોકે મહિલા સીધી જમીન પર પડવાના બદલે બિલ્ડિંગની નીચે આવેલા મોટા વૃક્ષની ડાળીઓમાં ફસાઈ ગઈ હતી, જેના કારણે તેનો જીવ બચી ગયો.

ઘટના બનતા જ આસપાસના વિસ્તારમાં અફરાતફરી મચી ગઈ હતી. વૃક્ષની ઊંચી ડાળીઓમાં મહિલાને ફસાયેલી જોઈ સ્થાનિક લોકો એકત્ર થઈ ગયા હતા અને તરત જ પોલીસ તથા ફાયર બ્રિગેડને જાણ કરવામાં આવી હતી.

ફાયર બ્રિગેડે ચલાવ્યું રેસ્ક્યૂ ઓપરેશન

માહિતી મળતાં જ પોલીસ અને ફાયર બ્રિગેડની ટીમ ઘટનાસ્થળે પહોંચી હતી. મહિલા ઊંચાઈ પર વૃક્ષની ડાળીઓ વચ્ચે ફસાયેલી હોવાથી રેસ્ક્યૂ ઓપરેશન અત્યંત સાવચેતીપૂર્વક હાથ ધરવામાં આવ્યું હતું.

ફાયર બ્રિગેડના જવાનો મહિલાને વધુ કોઈ ઈજા ન પહોંચે તેની કાળજી રાખીને તેની નજીક પહોંચ્યા હતા. ભારે જહેમત બાદ મહિલાને વૃક્ષની ડાળીઓમાંથી સુરક્ષિત રીતે બહાર કાઢી નીચે ઉતારવામાં આવી હતી.

વૃક્ષની ડાળીઓએ બચાવ્યો જીવ

સ્થાનિક લોકોના જણાવ્યા મુજબ, 10મા માળેથી પડ્યા બાદ મહિલા સીધી જમીન પર પટકાઈ હોત તો અકસ્માતનું પરિણામ અત્યંત ગંભીર બની શક્યું હોત. પરંતુ વચ્ચે આવેલા મોટા વૃક્ષની ડાળીઓમાં અટવાઈ જતાં તેના પડવાની ગતિ અને સીધી અથડામણ બંને અટકી ગયા હતા.

આ ઘટનામાં મહિલાને કેટલી ઈજા પહોંચી છે તે અંગે હજી વિગતવાર માહિતી સામે આવી નથી.

મહિલા 10મા માળેથી કેવી રીતે પડી?

ઘટના બાદ હવે સૌથી મોટો સવાલ એ છે કે મહિલા બિલ્ડિંગની 10મા માળેથી નીચે કેવી રીતે પડી. તે અકસ્માતે પડી કે ઘટનાની પાછળ અન્ય કોઈ કારણ છે, તે હજુ સ્પષ્ટ થયું નથી.

પોલીસે સમગ્ર મામલે તપાસ શરૂ કરી છે. મહિલાનું નિવેદન, ઘટનાસ્થળની પરિસ્થિતિ અને અન્ય ઉપલબ્ધ પુરાવાઓના આધારે તે નીચે પડવા પાછળનું ચોક્કસ કારણ શોધવાનો પ્રયાસ કરવામાં આવી રહ્યો છે.

આ પણ વાંચો: અમદાવાદ: મોરૈયા ગામની સીમમાં આવેલા ગોડાઉનમાંથી લાખો રુપિયાનો દારુ ઝડપાયો, 4ની ધરપકડ થઈ