દૂધ, ઘી, પનીર, અથાણું… બધું હવે સસ્તું થશે, મધર ડેરીએ ભાવ ઘટાડ્યા, GST ઘટાડાની અસર
નવી દિલ્હી 16 સપ્ટેમ્બર 2025: સરકાર દ્વારા GST સુધારાની જાહેરાત બાદ, તેની મોટી અસર જોવા મળી છે. ગ્રાહકોને રાહત આપવા માટે મધર ડેરીએ દૂધના ભાવમાં ઘટાડો કર્યો છે. 22 સપ્ટેમ્બરથી નવા GST દરો લાગુ થવા જઈ રહ્યા છે, પરંતુ તે પહેલાં જ કંપનીએ તેના પેકેજ્ડ દૂધના ભાવમાં પ્રતિ લિટર 2 રૂપિયા સુધીનો ઘટાડો કર્યો છે. મધર ડેરીએ તેના 1 લિટર ટોન્ડ ટેટ્રા પેક દૂધના ભાવ 77 રૂપિયાથી ઘટાડીને 75 રૂપિયા કરી દીધા છે.
સરકારે ૩ સપ્ટેમ્બરના રોજ GST સુધારાની જાહેરાત કરી હતી અને તમામ આવશ્યક ચીજવસ્તુઓ પર કર ઘટાડા અંગે માહિતી શેર કરી હતી. નાણામંત્રીએ કહ્યું હતું કે નવા GST દર ૨૨ સપ્ટેમ્બરથી લાગુ થશે અને દૂધ, ચીઝથી લઈને AC-TV સુધીની દરેક વસ્તુ સસ્તી થશે. તેમના અમલીકરણ પહેલા જ, મધર ડેરીએ તેના દૂધના ઉત્પાદનોના ભાવ ઘટાડી દીધા છે, જેનાથી ગ્રાહકોને મોટી રાહત મળી છે.
મધર ડેરીએ નવા ધોરણો સાથે ગ્રાહકોને તમામ ઉત્પાદનો પર 100% કર લાભ આપવા માટે આ મોટું પગલું ભર્યું છે. એ નોંધનીય છે કે કંપનીનો સમગ્ર ઉત્પાદન પોર્ટફોલિયો કાં તો શૂન્ય GST અથવા 5% ના સૌથી ઓછા સ્લેબ હેઠળ આવે છે.
આ પણ વાંચો: એકસાથે આઠ મંત્રીઓએ રાજીનામું આપ્યું; મુખ્યમંત્રી રાજ્યપાલને મળ્યા
