Bank Stock: 25 રુપિયાનો સ્ટોક બન્યો રોકેટ, લેવા માટે રોકાણકારો તૂટી પડ્યા
Yes Bank Share: ભારતીય શેરબજારમાં બેંકિંગ સેક્ટરના શેરોમાં તેજી વચ્ચે યસ બેંક (Yes Bank) ફરી એકવાર રોકાણકારોના ધ્યાનનું કેન્દ્ર બની છે. બુધવારે બેંકના શેરમાં જોરદાર ખરીદી જોવા મળી હતી, જેના કારણે શેરમાં સતત ચોથા ટ્રેડિંગ સેશનમાં વધારો નોંધાયો હતો. દિવસ દરમિયાન યસ બેંકનો શેર લગભગ 6 ટકા સુધી ઉછળીને ₹25.45ના સ્તરે પહોંચ્યો હતો, જે તેનો છેલ્લા 52 સપ્તાહનો સૌથી ઊંચો ભાવ છે.
છેલ્લા માત્ર ચાર ટ્રેડિંગ સેશનમાં જ યસ બેંકના શેરે લગભગ 14.5 ટકાનો જોરદાર ઉછાળો નોંધાવ્યો છે. શેરમાં આવેલી આ તેજીના કારણે રોકાણકારોમાં ઉત્સાહ જોવા મળી રહ્યો છે. ખાસ કરીને ટ્રેડિંગ વોલ્યુમમાં થયેલો વધારો બજારમાં વધતા વિશ્વાસની સાબિતી માનવામાં આવી રહ્યો છે.
બેન્ક નિફ્ટીમાં યસ બેન્કનું સૌથી શાનદાર પ્રદર્શન
બુધવારે NSE અને BSE બંને એક્સચેન્જ પર મળીને યસ બેંકના લગભગ 26 કરોડ શેરનું ખરીદ-વેચાણ થયું હતું. આ આંકડો છેલ્લા એક સપ્તાહના સરેરાશ 14 કરોડ શેરના વોલ્યુમની સરખામણીએ લગભગ બમણો છે. ભારે ટ્રેડિંગ વોલ્યુમને કારણે બજાર નિષ્ણાતો પણ આ શેર પર નજર રાખી રહ્યા છે.
બેંક નિફ્ટી ઇન્ડેક્સમાં પણ યસ બેંક સૌથી વધુ વધતો શેર રહ્યો હતો. તેની સાથે કેનેરા બેંક, બેંક ઓફ બરોડા, HDFC બેંક અને IDFC ફર્સ્ટ બેંક જેવા મોટા બેંકિંગ શેરોમાં પણ ખરીદી જોવા મળી હતી. આ તમામ શેરોના સકારાત્મક પ્રદર્શનના કારણે બેંક નિફ્ટી ઇન્ડેક્સમાં દિવસ દરમિયાન 0.5 ટકાથી વધુનો વધારો નોંધાયો હતો.
સુધારા પાછળનું કારણ
આ તેજી પાછળ એક મહત્ત્વપૂર્ણ કારણ યસ બેંક દ્વારા તાજેતરમાં જાહેર કરાયેલ વ્યાજદરનો સુધારો પણ માનવામાં આવી રહ્યો છે. રિઝર્વ બેંક ઓફ ઇન્ડિયા (RBI)ના તાજેતરના પગલાંનો લાભ લેવા માટે બેંકે પોતાના US Dollar Foreign Currency Non-Resident (FCNR-B) ડિપોઝિટ પર વ્યાજદરમાં ફેરફાર કર્યો છે. બેંકે મહત્તમ વ્યાજદર 6.60 ટકા પ્રતિ વર્ષ નક્કી કર્યો છે, જે 11 જૂન 2026થી અમલમાં આવી ગયો છે.
બજારના જાણકારોનું માનવું છે કે આકર્ષક વ્યાજદરના કારણે વિદેશી થાપણોમાં વધારો થઈ શકે છે, જે યસ બેંકની નાણાકીય સ્થિતિને વધુ મજબૂત બનાવશે. વધતા રોકાણ અને સકારાત્મક બજારભાવનાના કારણે આગામી દિવસોમાં પણ યસ બેંકના શેર પર રોકાણકારોની ખાસ નજર રહેવાની શક્યતા છે.
