Fierce Battle for Chief Minister’s Post Continues in Kerala: કેરળ વિધાનસભા ચૂંટણીમાં કોંગ્રેસ પક્ષના શાનદાર વિજય બાદ હવે મુખ્યમંત્રીની પસંદગીને લઈને રાજકીય પેચ ફસાયો છે. રાષ્ટ્રીય રાજધાની દિલ્હીમાં કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને શનિવારે હાઈ-પ્રોફાઇલ બેઠક યોજાઈ હતી. લગભગ ત્રણ કલાક સુધી ચાલેલી આ ગહન ચર્ચા અને વિચાર-વિમર્શ બાદ પણ કોઈ એક નામ પર સર્વસંમતિ સાધી શકાઈ નથી, જેના કારણે સસ્પેન્સ હજુ પણ અકબંધ છે.

દિલ્હી દરબારમાં દિગ્ગજોનો જમાવડો

આ મહત્વપૂર્ણ બેઠકમાં કેરળ કોંગ્રેસના ત્રણેય દિગ્ગજ નેતાઓ – વી.ડી. સતીસન, કે.સી. વેણુગોપાલ અને રમેશ ચેન્નીથલા હાજર રહ્યા હતા. રાજ્યમાં સત્તા પર વાપસી બાદ નેતૃત્વની બાગડોર કોને સોંપવી તે મુદ્દે નેતાઓએ પોતપોતાના પક્ષ રજૂ કર્યા હતા. જોકે, આંતરિક વિખવાદ અને સમીકરણોને જોતા પક્ષે હાલમાં સત્તાવાર રીતે કોઈ ચહેરાની જાહેરાત કરી નથી. આખરે, મુખ્યમંત્રીની પસંદગીનો જટિલ મામલો હવે “દિલ્હી દરબાર” એટલે કે પક્ષના ટોચના નેતૃત્વને સોંપવાનો નિર્ણય લેવામાં આવ્યો છે.

ધારાસભ્યોનો ‘એક-લાઇન ઠરાવ’

કેરળમાં નવનિર્વાચિત ધારાસભ્યોએ પણ આ મામલે પોતાનું વલણ સ્પષ્ટ કરી દીધું છે. એઆઈસીસી (AICC) કેરળના ઇન્ચાર્જ દીપા દાસમુન્શીએ પુષ્ટિ આપી છે કે તમામ ધારાસભ્યોએ સામૂહિક રીતે “એક-લાઇન ઠરાવ” પસાર કર્યો છે. આ ઠરાવ દ્વારા ધારાસભ્યોએ મુખ્યમંત્રી પસંદ કરવાનો સંપૂર્ણ અધિકાર હાઈકમાન્ડને સોંપી દીધો છે. આ પગલાથી હવે ધારાસભ્ય પક્ષમાં કોઈ ખુલ્લો વિવાદ થવાની શક્યતા નહિવત બની છે અને દિલ્હીથી જે નામ આવશે તેને તમામે સ્વીકારવું પડશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ખડગે અને રાહુલ ગાંધી લેશે અંતિમ નિર્ણય

દીપા દાસમુન્શીએ પત્રકારો સાથેની વાતચીતમાં જણાવ્યું હતું કે, મુખ્યમંત્રીના નામ પર અંતિમ મહોર મલ્લિકાર્જુન ખડગે અને રાહુલ ગાંધી લગાવશે. પક્ષનું નેતૃત્વ રાજ્યની રાજકીય પરિસ્થિતિ અને તમામ પાસાઓનું મૂલ્યાંકન કરી રહ્યું છે. તેમણે ઉમેર્યું કે, “યોગ્ય સમયે” નામની જાહેરાત કરવામાં આવશે. ઉલ્લેખનીય છે કે, પક્ષ પાસે નિર્ણય લેવા માટે ૨૩ મે સુધીનો સમય છે, તેથી આગામી થોડા દિવસોમાં ગમે ત્યારે નવા મુખ્યમંત્રીનું નામ જાહેર થઈ શકે છે. રમેશ ચેન્નીથલાએ પણ સ્પષ્ટ કર્યું છે કે તમામ મુદ્દાઓ પર હાઈકમાન્ડ સાથે ચર્ચા પૂર્ણ થઈ ગઈ છે.

સમર્થકોનો વિરોધ અને પક્ષની ચેતવણી

બીજી તરફ, કેરળમાં મનપસંદ નેતાને મુખ્યમંત્રી બનાવવા માટે સમર્થકો રસ્તા પર ઉતરી આવ્યા છે. રાજ્યના અનેક સ્થળોએ સમર્થકો દ્વારા વિરોધ પ્રદર્શનો કરવામાં આવ્યા હતા, જેના પર હાઈકમાન્ડે લાલ આંખ કરી છે. દીપા દાસમુન્શીએ કડક શબ્દોમાં ચેતવણી આપી છે કે, આવી અનુશાસનહીનતા કોંગ્રેસની સંસ્કૃતિ નથી અને પક્ષની ગરિમા વિરુદ્ધ જનારાઓને સહન કરવામાં આવશે નહીં. વી.ડી. સતીસન અને કે.સી. વેણુગોપાલે પણ કાર્યકરોને સંયમ અને એકતા જાળવવા અપીલ કરી છે. હવે આખું કેરળ આતુરતાથી એ જાણવા માંગે છે કે રાજ્યની કમાન કોના હાથમાં જશે. શું અનુભવી રમેશ ચેન્નીથલા ફરી બાજી મારશે, કે પછી સતીસન કે વેણુગોપાલ પર પક્ષ પસંદગીનો કળશ ઢોળશે? આ પ્રશ્નનો ઉત્તર હવે સોનિયા ગાંધી, રાહુલ ગાંધી અને મલ્લિકાર્જુન ખડગેની અંતિમ મંજૂરી પર ટકેલો છે.

આ પણ વાંચો: તમિલનાડુમાં ‘થલાપતિ’ યુગનો પ્રારંભ: રવિવારે વિજય મુખ્યમંત્રી પદના શપથ લેશે, 120 ધારાસભ્યોનું મળ્યું સમર્થન