35 વર્ષની Kriti Sanon લગ્ન કરશે? બોયફ્રેન્ડ કબીર બહિયા સાથે વેડિંગની ચર્ચા, જીજાજી સ્ટેબિન બેને મૌન તોડ્યું
Entertainment News: બોલિવૂડ અભિનેત્રી કૃતિ સેનન ફરી એકવાર પોતાની પર્સનલ લાઈફને લઈને ચર્ચામાં આવી છે. તાજેતરમાં તેમની ફિલ્મ ‘કોકટેલ 2’ રિલીઝ થઈ છે, જેને દર્શકો અને ક્રિટિક્સ તરફથી સારો પ્રતિસાદ મળ્યો છે. આ વચ્ચે કૃતિ પોતાના લાંબા સમયથી ચર્ચામાં રહેલા બોયફ્રેન્ડ કબીર બહિયા સાથે લગ્ન કરશે તેવી અટકળોએ જોર પકડ્યું છે. આ અફવાઓ પર હવે કૃતિ સેનનની બહેન નૂપુર સેનનના પતિ અને જાણીતા ગાયક સ્ટેબિન બેને પ્રથમ વખત પ્રતિક્રિયા આપી છે.
લગ્ન માટે કોઈ ઉતાવળ નથી
એક ઈન્ટરવ્યૂ દરમિયાન સ્ટેબિન બેને કહ્યું કે નૂપુર સેનનના લગ્ન બાદ લોકો સતત કૃતિના લગ્ન વિશે સવાલો પૂછવા લાગ્યા છે. તેમણે સ્પષ્ટ કર્યું કે જીવનનો એટલો મોટો નિર્ણય માત્ર સમાજની અપેક્ષા પૂરી કરવા માટે ઉતાવળમાં લેવો જોઈએ નહીં.
સ્ટેબિન બેને કૃતિના વખાણ કરતાં કહ્યું કે તેમણે પોતાની મહેનત અને પ્રતિભાના બળ પર ફિલ્મ ઈન્ડસ્ટ્રીમાં અલગ ઓળખ બનાવી છે. તેથી માત્ર ઉંમર કે સમાજના દબાણને કારણે લગ્ન કરવાનો કોઈ પ્રશ્ન જ ઊભો થતો નથી.
કબીર બહિયા કોણ છે?
મીડિયા રિપોર્ટ્સ અનુસાર કૃતિ સેનન છેલ્લા કેટલાક વર્ષોથી યુકે સ્થિત ઉદ્યોગપતિ કબીર બહિયાને ડેટ કરી રહી છે. કબીરના પિતા કુલજિંદર બહિયા બ્રિટનની જાણીતી ટ્રાવેલ કંપની Southall Travelના માલિક છે, જ્યારે કબીર Worldwide Aviation and Tourism Limitedમાં મેનેજિંગ ડિરેક્ટર તરીકે કાર્યરત છે.
કબીર બહિયા ભારતીય ક્રિકેટર મહેન્દ્ર સિંહ ધોનીના પરિવાર સાથે પણ નજીકના સંબંધો ધરાવે છે અને અનેક પ્રસંગોએ તેમની સાથે જોવા મળ્યા છે.
શું ખરેખર થશે લગ્ન?
કૃતિ અને કબીરે હજુ સુધી પોતાના સંબંધને સત્તાવાર રીતે જાહેર કર્યો નથી. જોકે બંને અનેક પાર્ટીઓ અને જાહેર કાર્યક્રમોમાં સાથે જોવા મળ્યા છે અને સોશિયલ મીડિયા પર પણ એકબીજા સાથેની તસવીરો શેર કરતા રહે છે. તેમ છતાં હાલ તેમના લગ્ન અંગે કોઈ સત્તાવાર જાહેરાત કરવામાં આવી નથી.
સ્ટેબિન બેનના નિવેદન બાદ સ્પષ્ટ થાય છે કે હાલ કૃતિના લગ્નને લઈને ચાલી રહેલી ચર્ચાઓ માત્ર અટકળો છે અને આ અંગે કોઈ પુષ્ટિ થઈ નથી.
