ચૈતર વસાવાની ધરપકડનો મુદ્દો દિલ્હીમાં ગુંજ્યોઃ કેજરીવાલે કર્યા ભાજપ પર પ્રહાર

નવી દિલ્હીઃ  5 જુલાઈ, 2025: Kejriwal Reaction on Chaitar Vasava Arrest: ગુજરાતનું રાજકારણ ફરી એકવાર ગરમાયું છે. આમ આદમી પાર્ટીના ધારાસભ્ય ચૈતર વસાવાની ધરપકડથી દેડિયાપાડાથી દિલ્હી સુધી રાજકીય ઘમાસાણ શરૂ થયું છે. ખુદ અરવિંદ કેજરીવાલે આના પર આકરા પ્રહારો કર્યા છે. તેમણે કહ્યું, ‘જો તેઓ એવું વિચારે છે કે આવી ધરપકડોથી AAP ડરી જશે, તો આ તેમની સૌથી મોટી ભૂલ છે.’

શું હતી ઘટના?

આ ઘટના દેડિયાપાડા તાલુકા સંકલન સમિતિની બેઠક દરમિયાન બની હતી, જ્યાં AAP ધારાસભ્ય ચૈતર વસાવા અને ભાજપ નેતા તાલુકા પંચાયત પ્રમુખ સંજય વસાવા વચ્ચેનો ઝઘડો એટલો વધી ગયો કે, મામલો પોલીસ સુધી પહોંચ્યો. આરોપ છે કે ચૈતર વસાવાએ મહિલા પ્રમુખ ચંપાબહેન વસાવા સાથે દુર્વ્યવહાર કર્યો હતો અને ધમકી આપી હતી. તેમણે કથિત રીતે કહ્યું હતું કે, “હું કહું તેમ કરો, હું ધારાસભ્ય છું.”

જ્યારે સંજય વસાવાએ આનો વિરોધ કર્યો ત્યારે ધારાસભ્ય પર તેમની સાથે પણ દુર્વ્યવહાર કરવાનો આરોપ મૂકવામાં આવ્યો હતો. આ સમગ્ર ઘટનાએ રાજકીય વર્તુળોમાં ચર્ચા જગાવી છે.

કેજરીવાલે શું કહ્યું?

આમ આદમી પાર્ટી (AAP) ના કન્વીનર અરવિંદ કેજરીવાલે X પર આ મુદ્દા પર પોસ્ટ કરી છે. તેમણે પોતાની પોસ્ટમાં કહ્યું છે કે, ગુજરાતમાં AAPના ધારાસભ્ય ચૈતર વસાવાની ભાજપ દ્વારા ધરપકડ કરવામાં આવી છે. વિસાવદર પેટાચૂંટણીમાં AAP સામે હાર્યા બાદ ભાજપ ગુસ્સે છે. જો તેઓ એવું વિચારે છે કે, AAP આવી ધરપકડોથી ડરી જશે, તો આ તેમની સૌથી મોટી ભૂલ છે. ગુજરાતના લોકો હવે ભાજપના કુશાસન, ભાજપની ગુંડાગીરી અને સરમુખત્યારશાહીથી કંટાળી ગયા છે, હવે ગુજરાતના લોકો ભાજપને જવાબ આપશે.

કોણ છે ચૈતર વસાવા?

ચૈતર વસાવા આમ આદમી પાર્ટીના ધારાસભ્ય છે. તેમની છબી આક્રમક નેતાની છે. તેઓ ઘણીવાર વિવાદોમાં ફસાયેલા રહ્યા છે. પોલીસ ફરજમાં અવરોધ ઊભો કરવા અને જીવ જોખમમાં નાખવાના આરોપમાં ઘણી વખત ફરિયાદો દાખલ કરવામાં આવી હતી. ગેરકાયદે પ્રવેશ અને ઉશ્કેરણીના કેસોમાં પણ તેમનું નામ સામે આવ્યું હતું, જેમાં તેમના પર પરવાનગી વિના ઔદ્યોગિક એકમમાં પ્રવેશવાનો અને અધિકારીઓને અવરોધ ઊભો કરવાનો આરોપ હતો. ઉલ્લેખનીય છે કે, ભરૂચના અંકલેશ્વર GIDCમાં બોઈલર વિસ્ફોટથી 4 કામદારોના મૃત્યુ બાદ, વસાવા સામે ટોળાને ઉશ્કેરવા અને સરકારી કામમાં અવરોધ ઊભો કરવાનો કેસ નોંધવામાં આવ્યો હતો.

આ પણ વાંચોઃ તમિલનાડુના મુખ્યમંત્રીએ કર્યુ ઠાકરે બંધુનું સમર્થનઃ કહ્યું- ‘હિન્દી થોપવાના વિરોધમાં એકજૂટ…‘

આ પણ વાંચોઃ Cocktail 2માં સૈફ-દીપિકા અને ડાયનાની જગ્યાએ આ કલાકારો જોવા મળશે