ઇબોલા વાયરસને લઈને ભારત સતર્ક: કેન્દ્રીય આરોગ્ય મંત્રી જેપી નડ્ડાએ કરી હાઈ લેવલ બેઠક

India alert regarding Ebola virus:    ઇબોલા વાયરસના વધતા વૈશ્વિક ખતરાને ધ્યાનમાં રાખીને ભારત સરકાર સંપૂર્ણ સતર્ક થઈ ગઈ છે. કેન્દ્રીય આરોગ્ય મંત્રી જેપી નડ્ડાએ દેશની તૈયારી અને દેખરેખની વ્યવસ્થાની સમીક્ષા કરવા માટે ઉચ્ચસ્તરીય બેઠક યોજી હતી. કેન્દ્ર સરકારે સ્પષ્ટ કર્યું છે કે હાલમાં ભારતમાં ઇબોલા વાયરસનો એકપણ કેસ નોંધાયો નથી, પરંતુ સંભવિત જોખમને ધ્યાનમાં રાખીને તમામ જરૂરી પગલાં લેવામાં આવી રહ્યા છે.

સત્તાવાર નિવેદન અનુસાર, આરોગ્ય મંત્રાલયના વરિષ્ઠ અધિકારીઓ સાથે યોજાયેલી બેઠકમાં દેશભરની આરોગ્ય વ્યવસ્થાઓની સમીક્ષા કરવામાં આવી હતી. મંત્રીએ અધિકારીઓને ઇબોલાના સંક્રમણને રોકવા માટેની તમામ વ્યવસ્થાઓ સંપૂર્ણપણે સક્રિય અને અસરકારક રાખવાના નિર્દેશ આપ્યા હતા.

જેપી નડ્ડાના નિર્દેશ બાદ કેન્દ્રીય આરોગ્ય સચિવે વિવિધ મંત્રાલયો અને સંબંધિત એજન્સીઓના અધિકારીઓ સાથે સંયુક્ત સમીક્ષા બેઠક યોજી હતી. બેઠકમાં સંકલન અને તૈયારીને વધુ મજબૂત બનાવવા પર ભાર મૂકવામાં આવ્યો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આરોગ્ય મંત્રીએ દેશના તમામ પ્રવેશ બિંદુઓ જેમ કે એરપોર્ટ, બંદરો અને જમીન માર્ગે આવેલી આંતરરાષ્ટ્રીય સરહદો પર ઇબોલા સ્ક્રીનિંગ વ્યવસ્થાને વધુ સજ્જ અને સતર્ક રાખવાના આદેશ આપ્યા છે. કોઈપણ શંકાસ્પદ મુસાફર અથવા સંક્રમણના કેસને ઝડપથી ઓળખી શકાય તે માટે દેખરેખ વધારવામાં આવી રહી છે.

સાથે જ ICMR અને NCDCને ઇબોલાના સંક્રમણની ઓળખ, તપાસ અને સતત મોનિટરિંગ માટેની તમામ વ્યવસ્થાઓ કાર્યરત રાખવા સૂચના આપવામાં આવી છે

આ દરમિયાન World Health Organization (WHO)એ ઇબોલાના પ્રકોપને “આંતરરાષ્ટ્રીય ચિંતાનો જાહેર આરોગ્ય ઇમરજન્સી” જાહેર કર્યો છે. ઉપરાંત Africa Centres for Disease Control and Preventionએ પણ તેને ખંડની સુરક્ષા માટે જાહેર આરોગ્ય ઇમરજન્સી તરીકે જાહેર કર્યું છે.

અધિકારીઓના જણાવ્યા અનુસાર, દેશના તમામ પ્રવેશ બિંદુઓ પર કડક નજર રાખવામાં આવી રહી છે અને વિવિધ એજન્સીઓ વચ્ચે સતત સંકલન જાળવવામાં આવી રહ્યું છે, જેથી કોઈપણ સંભવિત કેસ સામે આવે તો તાત્કાલિક કાર્યવાહી કરી શકાય.

આ પણ વાંચો : Horoscope 26th May: આ રાશિના લોકોને મહેનતનું ફળ મળશે, જુઓ આજનું રાશિ ભવિષ્ય