રાજકોટમાં નિવૃત્ત શિક્ષકને જમીન બતાવવાના બહાને હનીટ્રેપમાં ફસાવ્યા, 12 લાખ પડાવનાર બે મહિલા સહિત ત્રણની ધરપકડ
Rajkot News: રાજકોટ શહેરના ‘એ’ ડિવિઝન પોલીસ સ્ટેશન વિસ્તારમાં રહેતા અને નિવૃત્ત જીવન ગાળતા એક પ્રતિષ્ઠિત શિક્ષકને પ્રેમજાળમાં ફસાવી, તેમનો અશ્લીલ વીડિયો બનાવી ૧૨ લાખ રૂપિયા પડાવનાર ટોળકીનો રાજકોટ ક્રાઈમ બ્રાન્ચે પર્દાફાશ કર્યો છે. સમાજમાં પ્રતિષ્ઠા ખરડાવાના ડરથી શિક્ષકે લાખો રૂપિયા ગુમાવ્યા હતા, પરંતુ અંતે કંટાળીને પોલીસના શરણે જતાં સમગ્ર કાવતરાનો પર્દાફાશ થયો છે.
પૂર્વ આયોજિત કાવતરું અને મજબૂરીનો ફાયદો
પોલીસ તપાસમાં બહાર આવેલી વિગતો મુજબ, આરોપીઓએ ખૂબ જ આયોજનબદ્ધ રીતે નિવૃત્ત શિક્ષકને પોતાનો શિકાર બનાવ્યા હતા. આરોપીઓએ સૌ પ્રથમ જમીનના સોદાના બહાને શિક્ષકનો સંપર્ક કર્યો હતો અને તેમને વિશ્વાસમાં લીધા હતા. ત્યારબાદ, પૂર્વ આયોજન મુજબ તેમને એકાંતમાં એક રૂમમાં લઈ જવામાં આવ્યા હતા. ત્યાં હાજર ટોળકીની એક મહિલા સભ્યએ શિક્ષક સાથે બળજબરી કરી અજુગતું વર્તન કરવાનું શરૂ કર્યું હતું, જ્યારે બીજી મહિલાએ છુપાઈને આ સમગ્ર ઘટનાનો વીડિયો પોતાના મોબાઈલ કેમેરામાં કેદ કરી લીધો હતો.
બદનામીનો ડર બતાવી શરૂ ઉઘાડી લૂંટ
જેવો વીડિયો શૂટ થઈ ગયો, કે તરત જ આરોપીઓએ પોતાનો અસલી ચહેરો બતાવ્યો હતો. તેમણે શિક્ષકને ધમકી આપી હતી કે જો તેઓ માગ્યા મુજબના પૈસા નહીં આપે તો આ અશ્લીલ વીડિયો સોશિયલ મીડિયા પર વાયરલ કરી દેવામાં આવશે અને તેમના પરિવારમાં તેમની બદનામી કરવામાં આવશે. વર્ષો સુધી શિક્ષણ ક્ષેત્રે સેવા આપીને કમાયેલી ઈજ્જત પળવારમાં ધૂળમાં મળી જશે તેવા ડરથી શિક્ષક આ ટોળકીના શરણે થઈ ગયા હતા. તેમણે ટુકડે-ટુકડે કરીને પોતાની જિંદગીની જમાપુંજીમાંથી ૧૨ લાખ રૂપિયા આ શખ્સોને આપી દીધા હતા.
ક્રાઈમ બ્રાન્ચની ગણતરીના કલાકોમાં કાર્યવાહી
પૈસા આપ્યા બાદ પણ આ ટોળકીની લાલચ અટકી નહોતી અને તેઓ સતત વધુ નાણાંની માંગણી કરીને માનસિક ત્રાસ આપતા હતા. અંતે કંટાળીને નિવૃત્ત શિક્ષકે એસીપી ભરત બસિયાનો સંપર્ક કરી પોતાની આપવીતી જણાવી હતી. ક્રાઈમ બ્રાન્ચની ટીમે ટેકનિકલ સોર્સ અને હ્યુમન ઇન્ટેલિજન્સના આધારે તાત્કાલિક તપાસના ચક્રો ગતિમાન કર્યા હતા અને ગણતરીના કલાકોમાં જ મુખ્ય સૂત્રધાર નિલેશ મૈયાભાઇ ઝુંઝા, પાયલ ભાવીનભાઇ પરસાણા અને તેજલ દિપકભાઇ ટિંડાણીને ઝડપી પાડ્યા હતા.
અન્ય લોકો પણ ભોગ બન્યા હોવાની આશંકા
પોલીસે આરોપીઓ પાસેથી ગુનામાં વપરાયેલો મોબાઈલ અને વીડિયો ફૂટેજ કબજે કર્યા છે. પ્રાથમિક પૂછપરછમાં પોલીસને શંકા છે કે આ ટોળકીએ અગાઉ પણ અનેક લોકોને આ જ રીતે હનીટ્રેપમાં ફસાવીને લાખો રૂપિયા પડાવ્યા હોઈ શકે છે. પોલીસ હવે એ દિશામાં તપાસ કરી રહી છે કે આ ટોળકીમાં અન્ય કોઈ સભ્યો સામેલ છે કે કેમ. આ ઘટનાએ નિવૃત્ત અને વરિષ્ઠ નાગરિકોને અજાણ્યા શખ્સો સાથેના વ્યવહારમાં સાવચેત રહેવાનો લાલબત્તી સમાન કિસ્સો પૂરો પાડ્યો છે.
આ પણ વાંચો: ચંદીગઢમાં ₹590 કરોડનું બેંક કૌભાંડ: સરકારી નાણાં ઉચાપત કેસમાં EDની એન્ટ્રી, 11ની ધરપકડ અને લક્ઝરી કાર જપ્ત
