ચંદીગઢમાં ₹590 કરોડનું બેંક કૌભાંડ: સરકારી નાણાં ઉચાપત કેસમાં EDની એન્ટ્રી, 11ની ધરપકડ અને લક્ઝરી કાર જપ્ત

IDFC First Bank Chandigarh Scam: ચંદીગઢ સ્થિત આઈડીએફસી ફર્સ્ટ બેંકની બ્રાન્ચમાં થયેલા ₹590 કરોડના મસમોટા કૌભાંડે ખળભળાટ મચાવ્યો છે. તપાસમાં બહાર આવ્યું છે કે મુખ્ય આરોપીઓએ અનેક બોગસ કંપનીઓ બનાવીને સરકારી વિભાગોના નાણાં ગેરકાયદેસર રીતે ટ્રાન્સફર કર્યા હતા. આ મામલે હવે એન્ફોર્સમેન્ટ ડિરેક્ટોરેટ (ED) એ પણ એન્ટ્રી કરી છે અને અનેક સ્થળોએ દરોડા પાડ્યા છે.

બોગસ કંપનીઓ દ્વારા નાણાંની હેરફેર

રાજ્ય સતર્કતા અને ભ્રષ્ટાચાર વિરોધી બ્યુરોના એડીજીપી ચારુ બાલીએ જણાવ્યું કે આરોપીઓ સરકારી ખાતાઓમાંથી ‘આરએસ ટ્રેડર્સ’, ‘કેપકો ફિન્ટેક સર્વિસીસ’ જેવી નકલી કંપનીઓના ખાતામાં નાણાં ટ્રાન્સફર કરતા હતા.

• 8 વિભાગોના 12 બેંક ખાતા: તપાસમાં 8 સરકારી વિભાગોના 12 બેંક ખાતાઓની સંડોવણી ખુલી છે.
• મોડસ ઓપરેન્ડી: બેંક રેકોર્ડમાં નકલી ડેબિટ મેમો અને ખોટા બેંક સ્ટેટમેન્ટ તૈયાર કરીને વ્યવહારો કરવામાં આવતા હતા.

11 આરોપીઓની ધરપકડ અને મિલકતો જપ્ત

આ કેસમાં અત્યાર સુધીમાં 11 લોકોની ધરપકડ કરવામાં આવી છે, જેમાં 6 બેંક કર્મચારીઓ, 4 ખાનગી વ્યક્તિઓ અને 1 સરકારી કર્મચારીનો સમાવેશ થાય છે.

• જપ્ત કરાયેલો મુદ્દામાલ: 3 ફોર્ચ્યુનર, 2 ઈનોવા અને 1 મર્સિડીઝ સહિત 6 લક્ઝરી વાહનો જપ્ત કરાયા છે.
• ડિજિટલ પુરાવા: 25 થી વધુ મોબાઈલ અને લેપટોપ જપ્ત કરી સાયબર ફોરેન્સિક લેબમાં મોકલાયા છે.
• બેંક ખાતા ફ્રીઝ: 100 થી વધુ બેંક ખાતાઓ પર ડેબિટ ફ્રીઝ લગાવવા વિનંતી કરવામાં આવી છે.

EDની કાર્યવાહી અને રિયલ એસ્ટેટ કનેક્શન

બુધવારે EDની ચંદીગઢ ઝોનલ ટીમે 19 સ્થળોએ સર્ચ ઓપરેશન હાથ ધર્યું હતું. ચંદીગઢના હોટલ અને રિયલ એસ્ટેટ બિઝનેસમેન વિક્રમ વાધવાનું નામ આ કૌભાંડમાં ઉછળ્યું છે, જે હાલ ફરાર છે. ED પૂર્વ બેંક અધિકારીઓ અને આ કૌભાંડના લાભાર્થીઓના ડિજિટલ રેકોર્ડ અને દસ્તાવેજોની તપાસ કરી રહી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X