Gullak Season 5 Trailer: ટીવીએફ (TVF) ની અત્યંત લોકપ્રિય અને દર્શકોની મનપસંદ વેબ સિરીઝ “ગુલ્લક” ની પાંચમી સીઝનનું ધમાકેદાર ટ્રેલર રિલીઝ થઈ ગયું છે. એક મધ્યમ વર્ગીય પરિવારની ખાટી-મીઠી યાદો અને વાસ્તવિક સંઘર્ષોને પડદા પર લાવનારો મિશ્રા પરિવાર ફરી એકવાર દર્શકોના દિલ જીતવા માટે તૈયાર છે. આ નવી સીઝનમાં સંતોષ મિશ્રા (જમીલ ખાન) અને તેમનો પરિવાર જીવનના એક એવા મોડ પર આવીને ઊભો છે, જ્યાં તેમના સંબંધો અને પરિસ્થિતિઓમાં મોટા ફેરફારો જોવા મળી રહ્યા છે. ટ્રેલરમાં મિશ્રા પરિવારનું જૂનું ઘર જર્જરિત હાલતમાં દેખાય છે, જેનું સમારકામ ચાલી રહ્યું છે. આ ઘરની રંગાતી દીવાલો માત્ર ઘરને નવો દેખાવ નથી આપી રહી, પરંતુ પરિવારના ચાર સભ્યો વચ્ચેની અનોખી કેમિસ્ટ્રી અને આંતરિક બદલાવોને પણ ઉજાગર કરે છે.

ઘરના નવનિર્માણની સાથે સંબંધોની કસોટી

આ વખતે વાર્તામાં ઘરના નવનિર્માણની સાથે સંબંધોની કસોટી થતી જોવા મળશે. અન્નુની માતા (ગીતાંજલી કુલકર્ણી) ઈચ્છે છે કે તેમના બંને દીકરાઓ, અન્નુ અને અમન (હર્ષ માયર), પિતા સાથે મળીને પૈસા ભેગા કરે અને હોમ લોન લઈને ઘરનું સમારકામ કરાવે. જો કે, વાર્તામાં મોટો વળાંક ત્યારે આવે છે જ્યારે માતા-પિતા પોતાના બાળકોના જીવનના કેટલાક છૂપા પાસાઓથી અજાણ હોય છે. અન્નુ હવે ઘરની ચાર દીવાલોથી બહાર નીકળીને પોતાની અલગ ઓળખ અને મુક્ત જીવન જીવવાની ઈચ્છા રાખે છે. શું આ પરિવાર સાથે મળીને પોતાનું આશિયાનું ફરીથી બનાવી શકશે, કે પછી ઘરની જર્જરિત દીવાલોની જેમ તેમના સંબંધોમાં પણ તિરાડ પડશે? આ સસ્પેન્સ આગામી સીઝનમાં ખુલશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

અનંત જોશીની એન્ટ્રી

પરંતુ, આ સીઝન ચાહકો માટે માત્ર ખુશી જ નહીં, પણ એક મોટો આંચકો અને આશ્ચર્ય પણ લઈને આવી છે. “ગુલ્લક” માં અત્યાર સુધી આનંદ મિશ્રા ઉર્ફે ‘અન્નુ ભૈયા’ તરીકે દર્શકોના દિલ પર રાજ કરનાર અભિનેતા વૈભવ રાજ ગુપ્તા આ સીઝનમાં જોવા મળશે નહીં. તેમના સ્થાને હવે સુપરહિટ ફિલ્મ “12મી ફેઇલ” અને વેબ સિરીઝ “મામલા લીગલ હૈ” થી જાણીતા બનેલા પ્રતિભાશાળી અભિનેતા અનંત જોશીની એન્ટ્રી થઈ છે. અન્નુ ભૈયાના પાત્રમાં આટલો મોટો ફેરફાર ચાહકો માટે સ્વીકારવો મુશ્કેલ છે, પરંતુ મેકર્સને આશા છે કે અનંત જોશીને પણ દર્શકો તરફથી એટલો જ પ્રેમ અને આવકાર મળશે.

ક્યારે થશે રિલીઝ?

નોંધનીય છે કે “ગુલ્લક” ની અગાઉની ચારેય સીઝન સુપરહિટ રહી છે અને જમીલ ખાન, ગીતાંજલી કુલકર્ણી, હર્ષ માયર તથા સુનિતા રાજવારના અભિનયને ભારે પ્રશંસા મળી છે. મધ્યમ વર્ગના રોજબરોજના પ્રશ્નોને હળવાશથી રજૂ કરતી આ સિરીઝની નવી સીઝન આગામી 5 જૂને ઓટીટી પ્લેટફોર્મ પર સ્ટ્રીમ થવા માટે સંપૂર્ણ તૈયાર છે. દર્શકો ફરી એકવાર આ પારિવારિક ડ્રામા માણવા માટે આતુર છે.

આ પણ વાંચો: Twisha Sharma case: બીજા પોસ્ટમોર્ટમ પર કોર્ટની ના, હવે 8 દિવસથી રાખેલા મૃતદેહનું શું થશે?