ગુજરાત યુનિવર્સિટીના દિલ્હી પ્રવાસ પર વિવાદ: મનન દાણીને સામેલ કરવા અને ખર્ચ મુદ્દે NSUI-કોંગ્રેસના ગંભીર આક્ષેપો

Gujarat University Controversy: ગુજરાત યુનિવર્સિટીના વાઈસ ચાન્સેલર ડો. નીરજા ગુપ્તાના નેતૃત્વમાં દિલ્હી ગયેલા ડેલીગેશનના ખર્ચ અને ભૂતપૂર્વ સિન્ડિકેટ સભ્ય મનન દાણીને સામેલ કરવામાં આવ્યા હોવાના મુદ્દે વિવાદ ઊભો થયો છે. NSUI અને ગુજરાત પ્રદેશ કોંગ્રેસ કમિટીએ આને વિદ્યાર્થીઓના પૈસાના દુરુપયોગ અને પારદર્શિતાના અભાવ તરીકે ગણાવ્યો છે.

પ્રવાસનો હેતુ અને વિવાદનું કારણ

યુનિવર્સિટીના 75 વર્ષ પૂર્ણ થવાના અવસરે તૈયાર કરવામાં આવેલી ‘પરસ પર્વ’ કોફી ટેબલ બુક કેન્દ્રીય યુવા બાબતો અને રમતગમત મંત્રી મનસુખ માંડવિયાને અર્પણ કરવા માટે કુલપતિ ડો. નીરજા ગુપ્તા અને સિન્ડિકેટ સભ્યોનું પ્રતિનિધિમંડળ દિલ્હી ગયું હતું. આ કોફી ટેબલ બુકનું કોન્સેપ્ટ અને તૈયાર કરવાની જવાબદારી મનન દાણીએ સંભાળી હતી.

જોકે, મનન દાણીનો સિન્ડિકેટ સભ્ય તરીકેનો કાર્યકાળ 5 મે, 2026ના રોજ પૂર્ણ થઈ ગયો હતો. તેમ છતાં તેમને આ સત્તાવાર પ્રવાસમાં સામેલ કરવામાં આવ્યા હોવાના આક્ષેપો સામે આવ્યા છે. વધુમાં, યુનિવર્સિટીના ફંડમાંથી તેમની ફ્લાઇટ ટિકિટ, હોટેલ રોકાણ અને વાહન વ્યવહાર સહિતના ખર્ચની ચુકવણી કરવામાં આવી હોવાનો પણ આરોપ છે.

આ મુદ્દે NSUIના ગુજરાત પ્રમુખ નરેન્દ્ર સોલંકીએ જણાવ્યું કે, “વિદ્યાર્થીઓની ફી અને યુનિવર્સિટીના નાણાંનો ઉપયોગ નિવૃત્ત થયેલા સભ્યોના પ્રવાસ માટે શા માટે કરવામાં આવ્યો? જ્યારે હોસ્ટેલ અને વિદ્યાર્થીઓ માટેની મૂળભૂત સુવિધાઓ માટે પૂરતા નાણાં ઉપલબ્ધ નથી, ત્યારે આવા ખર્ચને કેવી રીતે યોગ્ય ઠેરવી શકાય?” આ સમગ્ર મામલે યુનિવર્સિટીના નાણાકીય વહીવટ અને નિર્ણય પ્રક્રિયા અંગે પ્રશ્નો ઉભા થયા છે, જેના કારણે વિદ્યાર્થી સંગઠનો દ્વારા પારદર્શક તપાસની માંગ ઉઠી રહી છે.

કોંગ્રેસ અને NSUIના આક્ષેપ

આ સમગ્ર મુદ્દે ગુજરાત કોંગ્રેસ અને NSUIએ યુનિવર્સિટી તંત્ર સામે ગંભીર આક્ષેપો કર્યા છે. ગુજરાત કોંગ્રેસે પોતાની સત્તાવાર X પોસ્ટમાં સવાલ ઉઠાવતા જણાવ્યું કે, “શું ગુજરાત યુનિવર્સિટી કોઈની અંગત જાગીર છે? યુનિવર્સિટીમાં મોટા ગજાના કહેવાતા સિન્ડિકેટ સભ્ય મનન દાણીનો કાર્યકાળ પૂરો, છતાં તેમને દિલ્હી ફેરવવાનો ખર્ચ યુનિવર્સિટી કેમ ઉઠાવે? … સામાન્ય વિદ્યાર્થીઓની સુવિધાઓ માટે નાણાં નથી, પણ નિવૃત્ત થઈ ગયેલા લોકોને મોજ કરાવવા માટે યુનિવર્સિટી પાસે પૈસા ક્યાંથી આવે છે? આ તો પ્રજાના પૈસે દિવાળી જેવો ઘાટ છે!”

શું ગુજરાત યુનિવર્સિટી કોઈની અંગત જાગીર છે ?

યુનિવર્સિટીમાં મોટા ગજાના કહેવાતા સિન્ડિકેટ સભ્ય મનન દાણી નો કાર્યકાળ પૂરો , છતાં તેમને દિલ્હી ફેરવવાનો ખર્ચ યુનિવર્સિટી કેમ ઉઠાવે ?

મનહર દાણી અને અન્ય વ્યક્તિઓનો કાર્યકાળ પૂર્ણ હોવા છતાં, તેમના દિલ્હી પ્રવાસનો તમામ ખર્ચ જેમાં… pic.twitter.com/rMFlvAtqBj

— Gujarat Congress (@INCGujarat) May 30, 2026

NSUIએ માંગ કરી છે કે આ પ્રવાસના તમામ ખર્ચ સંબંધિત (ભૂતપૂર્વ) સભ્યો પાસેથી વસૂલ કરવામાં આવે અને યુનિવર્સિટીના નાણાં વિદ્યાર્થી કલ્યાણ, ઈન્ફ્રાસ્ટ્રક્ચર અને શૈક્ષણિક સુવિધાઓ માટે વાપરવામાં આવે.

કુલપતિએ આપી સ્પષ્ટતા

આ સમગ્ર વિવાદ અંગે કુલપતિ ડો. નીરજા ગુપ્તાએ સ્પષ્ટતા કરતાં જણાવ્યું હતું કે દિલ્હી ગયેલા પ્રતિનિધિમંડળમાં સ્કૂલ ઑફ સાયન્સના ડીન, વિવિધ વિભાગોના ડિરેક્ટરો તેમજ વર્તમાન એક્ઝિક્યુટિવ કાઉન્સિલના સભ્યોનો સમાવેશ કરવામાં આવ્યો હતો. આ પ્રવાસ દરમિયાન કેન્દ્રીય મંત્રીને ‘પરસ પર્વ’ કોફી ટેબલ બુક અર્પણ કરવા ઉપરાંત રશિયાની એક યુનિવર્સિટી સાથે શૈક્ષણિક સહયોગ અને એકેડેમિક ફેર સંબંધિત ચર્ચાઓ પણ કરવામાં આવી હતી.

વીસીના જણાવ્યા અનુસાર, મનન દાણીને ‘પરસ પર્વ’ કોફી ટેબલ બુકના કોન્સેપ્ટ, સંપાદન અને તૈયારીમાં તેમના વિશેષ યોગદાન તેમજ નિપુણતાને ધ્યાનમાં રાખીને પ્રતિનિધિમંડળમાં સામેલ કરવામાં આવ્યા હતા. જોકે, આ મુદ્દે વિવાદ વધ્યા બાદ યુનિવર્સિટી તંત્ર તરફથી પ્રવાસના ખર્ચ, મંજૂરી પ્રક્રિયા અને મનન દાણીને સત્તાવાર રીતે સામેલ કરવાના નિર્ણય અંગે હજુ સુધી કોઈ વિગતવાર સત્તાવાર સ્પષ્ટતા જાહેર કરવામાં આવી નથી. પરિણામે, સમગ્ર મામલે અનેક સવાલો યથાવત રહ્યા છે અને વિદ્યાર્થી સંગઠનો તેમજ વિરોધ પક્ષો દ્વારા વધુ પારદર્શિતા અને સ્પષ્ટ જવાબોની માંગ કરવામાં આવી રહી છે.

કોણ છે મનન દાણી?

મનન દાણી ભારતીય જનતા પાર્ટી (BJP)ના ગુજરાત સોશિયલ મીડિયા કો-કન્વીનર તરીકે જવાબદારી નિભાવી ચૂક્યા છે. તેઓ વિવિધ સામાજિક, શૈક્ષણિક અને સંગઠનાત્મક પ્રવૃત્તિઓમાં સક્રિય રહ્યા છે.

અગાઉ વર્ષ 2024માં પણ મનન દાણીનું નામ ચર્ચામાં આવ્યું હતું, જ્યારે ગુજરાત ચેમ્બર્સ ઑફ કોમર્સ એન્ડ ઈન્ડસ્ટ્રીઝ (GCCI)ના નોમિની તરીકે તેમની ગુજરાત યુનિવર્સિટીની એક્ઝિક્યુટિવ કાઉન્સિલમાં થયેલી નિમણૂકને લઈને પ્રોટોકોલ અને પ્રક્રિયાત્મક મુદ્દાઓ અંગે વિવાદ ઊભો થયો હતો. તે સમયે પણ તેમની નિમણૂક સંબંધિત નિયમો અને પ્રક્રિયાઓને લઈને વિવિધ સવાલો ઉઠાવવામાં આવ્યા હતા.

આગળ શું?

આ મુદ્દે વિદ્યાર્થી સંગઠનો અને વિપક્ષે પારદર્શિતા અને જવાબદેહીની માંગ ઊઠાવી છે. યુનિવર્સિટી વહીવટ તંત્ર પાસે હવે સ્પષ્ટ જવાબ આપવાની જવાબદારી છે કે ટર્મ પૂર્ણ થયા પછી પણ ભૂતપૂર્વ સભ્યોના પ્રવાસનો ખર્ચ યુનિવર્સિટીની તિજોરીમાંથી કેમ ચૂકવવામાં આવ્યો અને વિદ્યાર્થીઓના હિતમાં આવા નિર્ણયો કેટલા યોગ્ય છે.

આ પણ વાંચો: ચાલતી કારમાં અચાનક ભભૂકી આગ, ચાલકની સમયસૂચકતાથી મોટી દુર્ઘટના ટળી