Dairy Election Postponed  :  સાબરકાંઠાની સાબર ડેરીમાં ચેરમેન પદને લઈને ચાલી રહેલી રાજકીય ખેંચતાણ વચ્ચે મોટો નિર્ણય લેવામાં આવ્યો છે. આવતીકાલે શુક્રવારે યોજાનારી ચેરમેન પદની ચૂંટણી હાલ પૂરતી મોકૂફ રાખવામાં આવી છે. ચૂંટણી મોકૂફ થતાં સહકારી ક્ષેત્રમાં ફરી ચર્ચાઓ તેજ બની છે. સાબર ડેરીના ચેરમેન પદ માટે છેલ્લા કેટલાક સમયથી દાવેદારો વચ્ચે ભારે સ્પર્ધા ચાલી રહી હતી. સત્તાના સમીકરણો પોતાના પક્ષમાં કરવા માટે વિવિધ સ્તરે પ્રયાસો થઈ રહ્યા હોવાની ચર્ચાઓ પણ સામે આવી હતી. ચૂંટણી પહેલાં ડિરેક્ટરોની હિલચાલ અને તેમની ભૂમિકાને લઈને અનેક સવાલો ઊભા થયા હતા.

હોર્સ ટ્રેડિંગના આક્ષેપોથી સહકારી રાજકારણમાં ખળભળાટ

ચૂંટણી પહેલાં ડિરેક્ટરોના હોર્સ ટ્રેડિંગ (Horse Trading) અંગેના આક્ષેપોએ સમગ્ર મામલાને વધુ ચર્ચાસ્પદ બનાવ્યો હતો. આ મુદ્દે સાબર ડેરીના વહીવટ અને ચૂંટણી પ્રક્રિયા અંગે સવાલો ઉઠાવવામાં આવ્યા હતા. ડિરેક્ટરોની ખરીદ-વેચાણના આક્ષેપો અને સંબંધિત અહેવાલો બાદ ડેરીના રાજકારણમાં હલચલ વધી હતી. આ ઉપરાંત સાબર ડેરી સાથે જોડાયેલા પશુપાલકોની સમસ્યાઓ અને તેમની મુશ્કેલીઓને પણ સામે લાવવામાં આવી હતી. ડેરીના વહીવટને લઈને ઊભા થયેલા સવાલો વચ્ચે હવે ચૂંટણી મોકૂફ રાખવાના નિર્ણયથી સમગ્ર ઘટનાક્રમમાં નવો વળાંક આવ્યો છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

હવે ચેરમેનની ચૂંટણી ક્યારે યોજાશે?

સાબર ડેરી માત્ર સહકારી સંસ્થા નહીં, પરંતુ હજારો પશુપાલકોની આજીવિકાનો આધાર છે. આવી સ્થિતિમાં ડેરીના વહીવટ અને ચેરમેન પદની ચૂંટણીને લઈને ઊભી થયેલી અનિશ્ચિતતા પશુપાલકો માટે પણ મહત્વ ધરાવે છે.

હાલ ચૂંટણી મોકૂફ રાખવામાં આવતા હવે નવી ચૂંટણી તારીખ ક્યારે જાહેર થશે અને ચેરમેન પદ માટેના રાજકીય સમીકરણોમાં શું ફેરફાર થશે તેના પર સૌની નજર છે. ચૂંટણી મોકૂફ રાખવા પાછળનું સત્તાવાર કારણ જાહેર થયા બાદ સમગ્ર મામલે વધુ સ્પષ્ટતા થવાની શક્યતા છે.

આ પણ વાંચો : PoKમાં પાકિસ્તાની સેનાની કાર્યવાહીથી હિંસા ભડકી, 18નાં મોતનો દાવો