અમદાવાદનો વિચિત્ર કિસ્સો: ટ્રાંસપોર્ટ કંપનીના ત્રણ કર્મચારી 1.03 કરોડના ટ્રક ટ્રેલર લઈને ફરાર થઈ ગયા
અમદાવાદની સનસ્કાય લોજિસ્ટિક્સ કંપનીના માલિકે પોતાના જ ત્રણ કર્મચારીઓ સામે આશરે ₹1.03 કરોડની કિંમતનાં બે ટ્રક ટ્રેલર પડાવી લેવાનો આરોપ લગાવી પોલીસ ફરિયાદ નોંધાવી છે. ફરિયાદ મુજબ, કંપનીમાં મેન્ટેનન્સ મેનેજર તરીકે કામ કરતા બે કર્મચારીઓ અને એક ડ્રાઇવરે માલિકની સૂચનાથી વિપરીત બંને વાહનોમાં અન્ય માલ ભરીને પરિવહન કર્યું હતું. ત્યારબાદ વાહનોની GPS સિસ્ટમ બંધ કરી દીધી અને કર્મચારીઓના મોબાઇલ ફોન પણ બંધ આવતાં સમગ્ર મામલો પોલીસ સુધી પહોંચ્યો છે.
આંધ્રપ્રદેશ અને ચેન્નઈ મોકલવામાં આવ્યાં હતાં ટ્રક ટ્રેલર
ફરિયાદી આકાશ અશોકકુમાર શાહ અમદાવાદમાં સનસ્કાય લોજિસ્ટિક્સ લિમિટેડ નામની ટ્રાન્સપોર્ટ કંપની ચલાવે છે, જેનું મુખ્ય સંચાલન ગાંધીધામથી થાય છે.
ફરિયાદમાં જણાવ્યા અનુસાર, પવનકુમાર પોકરરામ અને દલપતદાન ગઢવી કંપનીમાં ટ્રાન્સપોર્ટ મેન્ટેનન્સનું કામ સંભાળતા હતા, જ્યારે હનવન્તકુમાર ખેતારામ ડ્રાઇવર તરીકે નોકરી કરતો હતો.
5 ઓગસ્ટે આશરે ₹48.50 લાખની કિંમતનું એક ટ્રક ટ્રેલર આંધ્રપ્રદેશના ઈસ્ટ ગોદાવરી ખાતે માલ ખાલી કરવા મોકલવામાં આવ્યું હતું. જોકે, ડ્રાઇવરને પારિવારિક કટોકટી સર્જાતાં તે વાહન ત્યાં મૂકીને જતો રહ્યો હતો. આ ટ્રક પરત લાવવા માટે ફરિયાદીએ 2 સપ્ટેમ્બરે પવનકુમાર અને દલપતદાનને ઈસ્ટ ગોદાવરી મોકલ્યા હતા.
બીજી તરફ, આશરે ₹55 લાખની કિંમતનું બીજું ટ્રક ટ્રેલર 9 ઓગસ્ટે ડ્રાઇવર હનવન્તકુમાર ચેન્નઈ લઈ ગયો હતો. ફરિયાદીનો દાવો છે કે ત્રણેય કર્મચારીઓને બંને ખાલી ટ્રક ટ્રેલર લઈને ગાંધીધામ પરત આવવાની સૂચના આપવામાં આવી હતી.
માલિકની સૂચનાથી વિપરીત અન્ય માલનું પરિવહન કર્યું હોવાનો આરોપ
ફરિયાદ મુજબ, ત્રણેય કર્મચારીઓએ ગાંધીધામ પરત ફરવાને બદલે પરસ્પર મળીને બંને ટ્રક ટ્રેલરમાં 10 સપ્ટેમ્બરે વિશાખાપટ્ટનમથી ઔરંગાબાદ લઈ જવાનો નવો માલ ભર્યો હતો. ત્યારબાદ 14 સપ્ટેમ્બરે ઔરંગાબાદ ખાતે માલ ખાલી કરવામાં આવ્યો હતો.
ફરિયાદીનો આક્ષેપ છે કે માલ ખાલી કર્યા બાદ કર્મચારીઓએ બંને ખાલી ટ્રક ટ્રેલર ગાંધીધામ પરત લાવ્યાં નહોતાં. તેઓ વાહનો અંગે સંતોષકારક જવાબ પણ આપતા નહોતા.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
GPS બંધ થતાં માલિકને શંકા ગઈ
ફરિયાદમાં જણાવ્યા મુજબ, 15 સપ્ટેમ્બરની સાંજે બંને ટ્રક ટ્રેલરની GPS સિસ્ટમ બંધ થઈ ગઈ હતી. ત્યારબાદ ત્રણેય કર્મચારીઓનો સંપર્ક કરવાનો પ્રયાસ કરવામાં આવ્યો, પરંતુ તેમના મોબાઇલ ફોન પણ બંધ આવવા લાગ્યા હતા.
આ પરિસ્થિતિમાં કંપનીના માલિકને બંને વાહનો અંગે શંકા જતાં તેમણે પોલીસનો સંપર્ક કર્યો હતો. ફરિયાદમાં ત્રણેય કર્મચારીઓ સામે આશરે ₹1,03,50,000ની કિંમતનાં બંને ટ્રક ટ્રેલર પોતાની પાસે રાખી લેવાનો આરોપ મૂકવામાં આવ્યો છે.
પોલીસ ફરિયાદ બાદ તપાસનો વિષય
આ સમગ્ર મામલે કંપનીના માલિકે ત્રણેય કર્મચારીઓ સામે ફરિયાદ નોંધાવી છે. હવે બંને ટ્રક ટ્રેલર ક્યાં છે, કર્મચારીઓએ કયા હેતુથી વાહનોમાં અન્ય માલનું પરિવહન કર્યું હતું અને વાહનોનો કબજો કેવી રીતે મેળવવામાં આવ્યો હતો તે સહિતના મુદ્દાઓ તપાસનો વિષય બની શકે છે.
આ પણ વાંચો: વિરોધ પ્રદર્શનમાં સામેલ થશો તો સરકારી નોકરી નહીં મળે, યોગી સરકારના કડક નિયમ
