દુબઈની માફક અમદાવાદમાં બનશે 175 મીટર ઊંચો ‘સિટી સ્ક્વેર’! ₹570 કરોડના ખર્ચે સિંધુ ભવન રોડ પર બનશે આઈકોનિક ટાવર

Ahmedabad Iconic Tower : ગુજરાતના સૌથી મોટા શહેર અમદાવાદની સ્કાયલાઈન હવે એક નવી ઓળખ મેળવવા જઈ રહી છે. દુબઈની ભવ્ય સ્કાયલાઈનની તર્જ પર અમદાવાદ મ્યુનિસિપલ કોર્પોરેશન (AMC) દ્વારા સિંધુ ભવન રોડ પર અંદાજે ₹570 કરોડના ખર્ચે ‘અમદાવાદ સિટી સ્ક્વેર’ વિકસાવવાની યોજના તૈયાર કરવામાં આવી છે. આ પ્રોજેક્ટ હેઠળ 175 મીટર (લગભગ 574 ફૂટ) ઊંચો આઈકોનિક ટાવર બનાવવામાં આવશે. જેમાં રેસ્ટોરન્ટ, કેફે, સ્કાય ડેક, સ્કાય વોક અને વ્યુ ગેલેરી જેવી આકર્ષક સુવિધાઓ ઊભી કરાશે. આ ઉપરાંત શોપિંગ, મનોરંજન, સાંસ્કૃતિક કાર્યક્રમો અને જાહેર સુવિધાઓ માટે પણ વિશાળ જગ્યા વિકસાવવામાં આવશે.

175 મીટર ઊંચો ટાવર બનશે અમદાવાદનું નવું આકર્ષણ

અમદાવાદ સિટી સ્ક્વેર પ્રોજેક્ટનું મુખ્ય આકર્ષણ 175 મીટર ઊંચો આઈકોનિક ટાવર હશે. આ ટાવરમાં અંદાજે 40 મીટરની ઊંચાઈએ બે માળનું વિશાળ રેસ્ટોરન્ટ બનાવવામાં આવશે. અહીં એકસાથે આશરે 1,200 લોકો બેસી શકે તેવી વ્યવસ્થા ઊભી કરાશે.

રેસ્ટોરન્ટની ઉપર ટેરેસ ડેક કેફે બનાવવામાં આવશે, જેમાં લગભગ 200 લોકો માટે બેઠક વ્યવસ્થા હશે. આ સમગ્ર સુવિધા માટે આશરે 6,485 ચોરસ મીટરનું બાંધકામ કરવામાં આવશે.

175 મીટરની ઊંચાઈએથી નિહાળી શકાશે અમદાવાદનો નજારો

ટાવરની ટોચે આશરે 175 મીટરની ઊંચાઈએ સ્કાય ડેક અને સ્કાય વોક વિકસાવવામાં આવશે. અહીંથી લોકો અમદાવાદ શહેરનો મનમોહક પેનોરેમિક નજારો નિહાળી શકશે.

સ્કાય ડેક પર એકસાથે આશરે 75 લોકો ઊભા રહી શકે તેવી વ્યુ ગેલેરી બનાવવામાં આવશે. આ ઉપરાંત ટાવરના 40 મીટરથી 175 મીટરની ઊંચાઈ વચ્ચે વિશાળ ડિજિટલ સ્ક્રીન લગાવવામાં આવશે, જેના પર ડિજિટલ જાહેરાતો પ્રદર્શિત કરી શકાશે.

310 લોકોની બેઠક ક્ષમતાવાળું એમ્ફીથિયેટર

આ પ્રોજેક્ટમાં માત્ર ઊંચો ટાવર જ નહીં, પરંતુ જાહેર મનોરંજન અને સાંસ્કૃતિક પ્રવૃત્તિઓ માટે પણ વિશેષ આયોજન કરવામાં આવ્યું છે.

ગ્રાઉન્ડ લેવલની નીચે લોઅર ગ્રાઉન્ડ વિકસાવવામાં આવશે, જ્યાં શોપ્સ અને આર્ટ ગેલેરી બનાવવામાં આવશે. તેના દ્વારા કોમર્શિયલ અને સાંસ્કૃતિક પ્રવૃત્તિઓને પ્રોત્સાહન મળશે.

અપર ગ્રાઉન્ડ પર ચારેય ખૂણામાં ફૂડ કિઓસ્ક, ગાર્ડન, ફૂડ કોર્ટ અને વોટર ફાઉન્ટેન સાથે વિશાળ અર્બન પ્લાઝા બનાવવામાં આવશે. અહીં 310 લોકોની બેઠક ક્ષમતા ધરાવતું એમ્ફીથિયેટર પણ વિકસાવવામાં આવશે, જ્યાં વિવિધ સાંસ્કૃતિક કાર્યક્રમો અને મનોરંજનના કાર્યક્રમો યોજી શકાશે.

ત્રણ બેઝમેન્ટમાં 1,950 વાહનોનું પાર્કિંગ

સિટી સ્ક્વેરમાં આવનારા લોકો માટે પાર્કિંગની પણ વિશાળ વ્યવસ્થા કરવામાં આવશે. ગ્રાઉન્ડ લેવલથી આશરે 15 મીટર ઊંડાઈએ ત્રણ બેઝમેન્ટ બનાવવામાં આવશે, જેમાં કુલ 1,500 વાહનો પાર્ક થઈ શકશે.

આ ઉપરાંત નજીકના કોર્પોરેશનના પ્લોટમાં વધારાનું પાર્કિંગ ઊભું કરવામાં આવશે, જેમાં વધુ 450 વાહનો પાર્ક કરી શકાશે. આમ, સમગ્ર પ્રોજેક્ટમાં કુલ 1,950 વાહનો માટે પાર્કિંગની સુવિધા ઉપલબ્ધ કરાવવાનું આયોજન છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

25 ઓક્ટોબરે ટેન્ડર બહાર પડ્યું, સાડા ત્રણ વર્ષમાં કામ પૂર્ણ કરવાનો લક્ષ્યાંક

અમદાવાદ મ્યુનિસિપલ કોર્પોરેશન દ્વારા આ મહત્વાકાંક્ષી પ્રોજેક્ટ માટે 25 ઓક્ટોબર, 2026ના રોજ ટેન્ડર બહાર પાડવામાં આવ્યું છે. પ્રોજેક્ટની કામગીરી શરૂ કરતાં પહેલાં કોન્ટ્રાક્ટરો માટે ઓરિએન્ટેશન મીટિંગ યોજવામાં આવશે, જેમાં પ્રોજેક્ટની ટેકનિકલ અને અન્ય વિગતો સમજાવવામાં આવશે.

ટેન્ડર પ્રક્રિયા પૂર્ણ કરતાં પહેલાં બે પ્રિ-બિડ મીટિંગ પણ યોજવાનું આયોજન છે, જેથી પ્રોજેક્ટ માટે યોગ્ય કોન્ટ્રાક્ટરની પસંદગી થઈ શકે.

કોન્ટ્રાક્ટરને કામ સોંપ્યા બાદ પ્રોજેક્ટ પૂર્ણ કરવા માટે 42 મહિના એટલે કે સાડા ત્રણ વર્ષનો સમયગાળો નક્કી કરવામાં આવ્યો છે.

અમદાવાદની સ્કાયલાઈનને મળશે નવી ઓળખ

₹570 કરોડના અંદાજિત ખર્ચે તૈયાર થનારો અમદાવાદ સિટી સ્ક્વેર શહેરના શહેરી વિકાસમાં એક મહત્ત્વપૂર્ણ પ્રોજેક્ટ બની શકે છે. આધુનિક આર્કિટેક્ચર, ઊંચો ટાવર, સ્કાય વોક, રેસ્ટોરન્ટ, ફૂડ કોર્ટ, આર્ટ ગેલેરી અને એમ્ફીથિયેટર જેવી સુવિધાઓના કારણે આ સ્થળ ભવિષ્યમાં અમદાવાદના નવા પ્રવાસન અને મનોરંજન કેન્દ્ર તરીકે વિકસાવવાની યોજના છે.

હવે આ પ્રોજેક્ટની ટેન્ડર પ્રક્રિયા અને ત્યારબાદ શરૂ થનારી બાંધકામ કામગીરી પર સૌની નજર રહેશે. પ્રોજેક્ટ પૂર્ણ થયા બાદ સિંધુ ભવન રોડ પર અમદાવાદને એક નવું આઈકોનિક લેન્ડમાર્ક મળવાની અપેક્ષા છે.

આ પણ વાંચો: કરવાચોથના દિવસે પતિને બદલે પ્રેમીને મળવા પહોંચી પત્ની! પતિએ રંગેહાથ પકડી, રસ્તા પર દેવરાણી-જેઠાણીએ ઢીબી નાખી