સરખેજમાં માનવતાને શરમાવે તેવી ઘટના: ઉજાલા સર્કલ પાસે પ્લાસ્ટિકની થેલીમાંથી નવજાતનો મૃતદેહ મળ્યો

Ahmedabad Sarkhej Newborn Baby Case: અમદાવાદના સરખેજ વિસ્તારમાં માનવતાને શરમાવે તેવી એક ચોંકાવનારી ઘટના સામે આવી છે. ઉજાલા સર્કલ નજીક આવેલા ખુલ્લા ખેતરમાંથી કાળા રંગની પ્લાસ્ટિકની થેલીમાં ત્યજી દેવાયેલી હાલતમાં તાજા જન્મેલા નવજાત બાળકનો મૃતદેહ મળી આવતા સમગ્ર વિસ્તારમાં ચકચાર મચી ગઈ છે.

પ્રાથમિક માહિતી મુજબ, કોઈ અજાણી વ્યક્તિ નવજાત બાળકને અહીં ત્યજીને ફરાર થઈ ગઈ હતી. બાળકને જીવતું અહીં મૂકવામાં આવ્યું હતું કે તેના મૃત્યુ બાદ મૃતદેહ ફેંકવામાં આવ્યો હતો તે અંગેની હકીકત તપાસ બાદ જ સ્પષ્ટ થશે.

મજૂર પરિવારના બાળકોની નજર પ્લાસ્ટિકની થેલી પર પડી

મળતી માહિતી પ્રમાણે સરખેજના ઉજાલા સર્કલ નજીક ખુલ્લા ખેતરમાં ઝૂંપડું બાંધીને રહેતા અને મજૂરીકામ કરતા 36 વર્ષીય ધુડાભાઈ લાલજીભાઈ ચૌહાણને આ ઘટનાની જાણ થઈ હતી.

ગત 10 ઓક્ટોબરના રોજ સાંજે આશરે 6થી 6:15 વાગ્યાની વચ્ચે તેમના નાના બાળકો ઝૂંપડાથી થોડે દૂર ખુલ્લી જગ્યામાં ગયા હતા. આ દરમિયાન બાળકોની નજર કાળા રંગની પ્લાસ્ટિકની થેલી પર પડી હતી.

બાળકોએ થેલીની નજીક જઈને જોતા તેમાં એક તાજું જન્મેલું બાળક પડેલું જોવા મળ્યું હતું. બાળક ચોકડીવાળા બરમુંડામાં લપેટાયેલું હતું. આ દ્રશ્ય જોઈ બાળકો ગભરાઈ ગયા હતા અને તાત્કાલિક પોતાના પિતાને સમગ્ર ઘટનાની જાણ કરી હતી.

108 અને પોલીસને તાત્કાલિક જાણ કરાઈ

ઘટનાની જાણ થતાં ધુડાભાઈએ સમય ગુમાવ્યા વિના 108 એમ્બ્યુલન્સ અને પોલીસ કંટ્રોલ રૂમને ફોન કરીને સમગ્ર મામલે જાણ કરી હતી.

માહિતી મળતાં જ સરખેજ પોલીસની ટીમ ઘટનાસ્થળે પહોંચી હતી. સાથે જ 108 એમ્બ્યુલન્સની ટીમ પણ સ્થળ પર પહોંચી હતી અને નવજાત બાળકની તપાસ કરી હતી.

મેડિકલ તપાસ દરમિયાન બાળક તાજું જન્મેલું છોકરું હોવાનું અને તેનું મૃત્યુ થઈ ચૂક્યું હોવાનું સામે આવ્યું હતું.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

અજાણ્યા વ્યક્તિ સામે ગુનો, CCTV તપાસ શરૂ

આ મામલે સરખેજ પોલીસે અજાણ્યા શખ્સ વિરુદ્ધ ગુનો નોંધીને તપાસ શરૂ કરી છે. પોલીસે આસપાસના વિસ્તારોમાં લગાવવામાં આવેલા CCTV કેમેરાના ફૂટેજની તપાસ હાથ ધરી છે.

પોલીસ હવે એ દિશામાં તપાસ કરી રહી છે કે નવજાત બાળકને અહીં કોણ અને કયા સંજોગોમાં મૂકી ગયું હતું. ઘટનાસ્થળની આસપાસની હિલચાલ તેમજ શંકાસ્પદ વ્યક્તિઓ અંગે પણ માહિતી એકત્ર કરવામાં આવી રહી છે.

નવજાત બાળકના મોત પાછળનું ચોક્કસ કારણ જાણવા માટે જરૂરી તબીબી તપાસ પણ હાથ ધરવામાં આવશે. સમગ્ર મામલે પોલીસની તપાસ આગળ વધ્યા બાદ જ ઘટનાની હકીકત અને જવાબદાર વ્યક્તિ અંગે વધુ વિગતો સામે આવી શકે છે.

આ પણ વાંચો: પહેલા જ નોરતે દિલ્હી- NCRમાં ધોધમાર વરસાદથી જળબંબાકાર, 24 રાજ્યોમાં એલર્ટ