દિલ્હીના જંતર-મંતર પર ફરીથી એકત્ર થયા ખેડૂતો, જાણો શું છે આ વખતનો એજન્ડા?

નવી દિલ્હી, 25 ઓગસ્ટ 2025: દેશભરના ખેડૂતો ફરી એકવાર રાજધાની દિલ્હીના જંતર-મંતર પર એકઠા થઈ રહ્યા છે. સંયુક્ત કિસાન મોરચા દ્વારા આયોજિત ‘કિસાન મહાપંચાયત’માં ભાગ લેવા માટે સોમવારે સવારથી જ ખેડૂતો પહોંચી રહ્યા છે. મહાપંચાયતમાં તમામ પાક માટે ન્યૂનતમ સમર્થન મૂલ્ય (MSP)ની કાયદેસર ગેરંટી, ખેતી, ડેરી, પોલ્ટ્રી અને મત્સ્ય ઉદ્યોગને અમેરિકા સાથેના કોઈપણ પ્રસ્તાવિત સમજૂતીમાંથી બાકાત રાખવા અને ખેતી કાયદાઓ (હવે રદ કરાયેલા) વિરુદ્ધ આંદોલન દરમિયાન ખેડૂતો પર નોંધાયેલા પોલીસ કેસો પાછા ખેંચવાની લાંબા સમયથી ચાલતી માંગ પર વિચારણા કરવામાં આવશે.
સંયુક્ત કિસાન મોરચા (SKM)એ જણાવ્યું કે આ બેઠક શાંતિપૂર્ણ રહેશે અને તેણે ખેડૂતો તેમજ સમર્થકોને મોટી સંખ્યામાં ભાગ લેવા અપીલ કરી છે. આ મહાપંચાયત 2020 અને 2021 દરમિયાન થયેલા ખેડૂત આંદોલનના લગભગ ચાર વર્ષ બાદ યોજાઈ રહી છે. તે સમયે હજારો લોકોએ ત્રણ ખેતી કાયદાઓ રદ કરવાની માંગ સાથે દિલ્હીની સરહદો પર ડેરા નાખ્યા હતા.
કેન્દ્ર સરકાર દ્વારા કાયદાઓ પાછા ખેંચવાની જાહેરાત બાદ આંદોલન સમાપ્ત થયું હતું. જોકે, ત્યારથી ઘણા ખેડૂત સંગઠનોએ સરકાર પર MSP પર કાયદો બનાવવા સહિતના અન્ય વચનો પૂરા ન કરવાનો આરોપ લગાવ્યો છે. પોલીસના એક વરિષ્ઠ અધિકારીએ જણાવ્યું, “અમે સ્થળ પર લગભગ 1,200 પોલીસકર્મીઓ તૈનાત કર્યા છે. અમે એ સુનિશ્ચિત કરીશું કે કોઈ અપ્રિય ઘટના ન બને અને કાયદો-વ્યવસ્થા ખોરવાય નહીં.”
પંજાબ અને હરિયાણાના ખેડૂતોએ શંભુ બોર્ડર પર ઘણા મહિનાઓ સુધી ડેરા નાખ્યા હતા. તેમને દિલ્હી આવવાની પરવાનગી આપવામાં આવી ન હતી. અહીં ખેડૂત નેતા જગજીત સિંહ ડલ્લેવાલે ચાર મહિનાથી વધુ સમય સુધી અનશન કર્યું હતું. કેન્દ્ર સરકાર સાથે ઘણા તબક્કાની વાતચીત પણ થઈ, પરંતુ ન્યૂનતમ સમર્થન મૂલ્યની ગેરંટીને લઈને કોઈ વાત સ્પષ્ટ થઈ શકી નથી. ખનૌરી બોર્ડર પર પણ મોટી સંખ્યામાં ખેડૂતોએ ડેરા નાખ્યા હતા, જેમને બળપૂર્વક હટાવી દેવામાં આવ્યા હતા.
આ મામલે સુનાવણી કરતી વખતે સુપ્રીમ કોર્ટે જગજીત સિંહ ડલ્લેવાલની પ્રશંસા કરી હતી અને તેમને સાચા ખેડૂત ગણાવ્યા હતા. સુપ્રીમ કોર્ટે કહ્યું હતું કે કેટલાક લોકો એવા છે જેઓ ફરિયાદોનું નિવારણ થવા દેવા નથી માંગતા. તેમનો રાજકીય એજન્ડા હોય છે. સુપ્રીમ કોર્ટે કહ્યું હતું કે હાઈવે દેશની જીવનરેખા છે, તેથી તેને બ્લોક ન કરી શકાય.
આ પણ વાંચો : પરિણીતિ ચોપડા અને રાઘવ ચઢ્ઢાના ઘરમાં કિલકારી ગુંજશે, કપલે પ્રેગનેન્સીની જાહેરાત કરી












