વેનેઝુએલામાં ડબલ ભૂકંપ; USGSએ મહાવિનાશ પાછળનું કારણ જણાવ્યું

Double earthquake in Venezuela: વેનેઝુએલાની રાજધાની કારાકાસમાં આવેલા શક્તિશાળી ભૂકંપે ભારે વિનાશ મચાવ્યો છે. અમેરિકાની ભૂગર્ભીય સંસ્થા USGSના જણાવ્યા અનુસાર આ ભૂકંપ સામાન્ય નહોતો. પહેલા 7.2 તીવ્રતાનો ભૂકંપ આવ્યો અને માત્ર 39 સેકન્ડ બાદ 7.5 તીવ્રતાનો વધુ શક્તિશાળી ઝટકો આવ્યો હતો. બીજા ભૂકંપને મુખ્ય ભૂકંપ એટલે કે ‘મેનશોક’ માનવામાં આવી રહ્યો છે.

વિજ્ઞાનીઓના જણાવ્યા મુજબ આ વિનાશનું સૌથી મોટું કારણ ભૂકંપની ખૂબ ઓછી ઊંડાઈ છે. બંને ભૂકંપ જમીનની સપાટીથી માત્ર 10થી 13 કિલોમીટર નીચે આવ્યા હતા. ભૂકંપ વિજ્ઞાન અનુસાર આ ખૂબ ઓછી ઊંડાઈ ગણાય છે.

ઓછી ઊંડાઈના કારણે ભૂકંપની ઊર્જા જમીનની સપાટી સુધી ખૂબ જ ઝડપથી અને સંપૂર્ણ તાકાત સાથે પહોંચી જાય છે. પરિણામે કારાકાસ અને આસપાસના વિસ્તારોમાં ભારે ઝટકા અનુભવાયા હતા. અનેક ઇમારતો હચમચી ઉઠી હતી જ્યારે કેટલીક ઇમારતો ધરાશાયી પણ થઈ ગઈ હતી.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

અધિકારીઓએ ચેતવણી આપી છે કે આગામી દિવસોમાં આફ્ટરશોક્સ એટલે કે બાદના ઝટકા આવી શકે છે. કેટલાક ઝટકા વધુ તીવ્ર પણ હોઈ શકે છે. તેથી લોકોને સુરક્ષિત સ્થળે રહેવાની અને સતર્ક રહેવાની સલાહ આપવામાં આવી છે.

વેનેઝુએલામાં રાષ્ટ્રીય આપાતકાલ જાહેર

શક્તિશાળી ભૂકંપ બાદ વેનેઝુએલામાં રાષ્ટ્રીય આપાતકાલ જાહેર કરવામાં આવ્યો છે. કાર્યકારી રાષ્ટ્રપતિ ડેલ્સી રોડ્રિગેઝે ટેલિવિઝન સંબોધનમાં આ જાહેરાત કરી હતી. તેમણે ભૂકંપમાં પોતાના પ્રિયજનો ગુમાવનાર લોકો પ્રત્યે શોક વ્યક્ત કર્યો હતો.

રાજધાની કારાકાસમાં ભૂકંપથી સૌથી વધુ નુકસાન નોંધાયું છે. અહીં 22 માળની એક ઇમારત સંપૂર્ણપણે ધરાશાયી થઈ ગઈ હતી અને મલબામાં ફેરવાઈ ગઈ હતી. હાલ બચાવકર્મીઓ મલબો હટાવવાની કામગીરીમાં વ્યસ્ત છે.

અધિકારીઓને આશંકા છે કે મલબાની નીચે હજુ પણ અનેક લોકો ફસાયેલા હોઈ શકે છે. સરકાર દ્વારા રાહત અને બચાવ કામગીરી ઝડપી બનાવવામાં આવી છે અને અસરગ્રસ્ત લોકોને સુરક્ષિત બહાર કાઢવાના પ્રયાસો ચાલી રહ્યા છે.

આ પણ વાંચો : અમદાવાદના કાલુપુર સ્ટેશને નકલી IPS અધિકારીએ અસલી પોલીસને ધમકી આપી ભાગી ગયો