અમદાવાદગુજરાતટોપ ન્યૂઝટ્રેન્ડિંગ
અમદાવાદમાં વીડિયો વાયરલ બાદ ડોમિનોઝ પિઝા એકમ સીલ
અમદાવાદ 17 જુલાઈ 2025: અમદાવાદના ઘાટલોડિયા વિસ્તારમાં જ્યુબિલી ફૂડ્સ ખાતે આવેલા ડોમિનોઝ પિઝા એકમને અમદાવાદ મ્યુનિસિપલ કોર્પોરેશન (AMC)ના ફૂડ વિભાગે સીલ કર્યું છે. આ કાર્યવાહી એક ગ્રાહકની ફરિયાદ બાદ કરવામાં આવી, જેમણે પિઝા સાથે આપવામાં આવેલી સોસની બોટલમાં ફૂગ અને સોસનો બદલાયેલો રંગ જોયો હતો.
ગ્રાહકે આ ઘટનાનો વીડિયો સોશિયલ મીડિયા પર શેર કર્યો, જે ઝડપથી વાયરલ થયો. વીડિયોમાં સોસની બોટલમાં ફૂગની હાજરી અને બદલાયેલો રંગ સ્પષ્ટ દેખાતો હતો. આ ઘટનાએ ખાદ્ય સુરક્ષા અને ગુણવત્તા અંગે ગંભીર સવાલો ઉભા કર્યા છે.
ફરિયાદના આધારે AMCના ફૂડ વિભાગે તાત્કાલિક તપાસ હાથ ધરી અને ડોમિનોઝ પિઝા એકમની તપાસ કરી. તપાસ દરમિયાન ખાદ્ય સુરક્ષાના ધોરણોનું ઉલ્લંઘન જણાતાં એકમને સીલ કરવાનો નિર્ણય લેવાયો. AMCના અધિકારીઓએ જણાવ્યું કે, ગ્રાહકોના આરોગ્ય સાથે કોઈ સમાધાન નહીં કરવામાં આવે અને આવા મામલામાં કડક કાર્યવાહી કરવામાં આવશે.
આ ઘટનાએ શહેરના નાગરિકોમાં ચર્ચાનો વિષય બન્યો છે, અને લોકો હવે ખાદ્ય પદાર્થોની ગુણવત્તા અંગે વધુ સજાગ થયા છે. ડોમિનોઝ પિઝા તરફથી હજુ સુધી આ મામલે કોઈ સત્તાવાર નિવેદન આવ્યું નથી.
