અમદાવાદીઓ દર મિનિટે રોંગસાઈડમાં વાહન ચલાવવા બદલ ચૂકવે છે આટલા હજાર રૂપિયા

અમદાવાદ, તા. 20 જુલાઈ, 2025: ગુજરાત હાઇકોર્ટના આદેશ બાદ અમદાવાદ ટ્રાફિક પોલીસે શહેરમાં રોંગ સાઇડમાં વાહન ચલાવતા લોકોને પકડીને દંડ ફટકારી રહી છે. ટાઈમ્સ ઓફ ઈન્ડિયાના રિપોર્ટ પ્રમાણે, દર મિનિટે રોંગ સાઈડમાં વાહન ચલાવતો એક વ્યક્તિ પકડાય છે અને દર મિનિટે રૂપિયા 2236નો દંડ વસૂલવામાં આવલે છે. છેલ્લા 59 કલાકમાં દંડની રકમ રૂપિયા 79 લાખને વટાવી ગઈ છે. નો-એન્ટ્રીના નિયમોના ભંગ બદલ વધુ રૂ 3.27 લાખનો દંડ થયો હતો. અમદાવાદ ટ્રાફિક પોલીસે બેફામ ડ્રાઇવિંગ કરનારાઓ સામે અત્યાર સુધીની સૌથી મોટી ઝુંબેશ શરૂ કરી છે. દંડમાં થયેલો આ વધારો કાયદાનું કડક અમલીકરણ થઈ રહ્યું હોવાનું દર્શાવે છે. જોકે ટ્રાફિલ પોલીસના અવરનેસ કેમ્પેન અને ટાયર કિલર જેવા અટકાયતી પગલાં હોવા છતાં વાહનચાલકો કેટલી બેદરકારીથી નિયમોનો ભંગ કરે છે તે પણ ઉજાગર કરે છે.

શહેર પોલીસે જણાવ્યું કે આવા ઉલ્લંઘનો માટેના મુખ્ય સ્થળોમાં ચાંદખેડા, માધવપુરા, રાણીપ, સાબરમતી, કરંજ અને શાહપુરનો સમાવેશ થાય છે, જેમાં ફક્ત આ વિસ્તારોમાંથી જ ₹5.03 લાખનો દંડ વસૂલવામાં આવ્યો હતો. રસપ્રદ વાત એ છે કે, કેન્દ્રીય માર્ગ પરિવહન મંત્રાલયના 2022ના છેલ્લા ડેટા મુજબ અમદાવાદ શહેરમાં ખોટી દિશામાં ડ્રાઇવિંગને કારણે 109 અકસ્માતો થયા હતા, તેમ છતાં અમદાવાદીઓ સુરક્ષાને બદલે શોર્ટકટ અપનાવવાનું પસંદ કરતા હોય તેવું લાગે છે.

ટ્રાફિક પોલીસના છેલ્લા ત્રણ દિવસના ડેટા અનુસાર, ખોટી દિશામાં ડ્રાઇવિંગના 4,697 કેસ નોંધાયા હતા અને ₹77.51 લાખનો દંડ વસૂલવામાં આવ્યો હતો. SG-1 અને SG-2 પોલીસ સ્ટેશન દ્વારા દેખરેખ રખાતા SG હાઈવે પર 1,144 કેસ નોંધાયા હતા અને ₹18.19 લાખનો દંડ વસૂલવામાં આવ્યો હતો.

ગયા વર્ષે આઠ દિવસમાં 1,800 વાહનચાલકો સામે રોંગ સાઈડમાં વાહન ચલાવવા બદલ કાર્યવાહી કરવામાં આવી હતી, જ્યારે આ વર્ષે માત્ર ત્રણ દિવસમાં 180 ટકા વધુ દંડ કરવામાં આવ્યો હતો.

ટાયર કિલર ડ્રાઇવર સ્પાઇક સ્ટ્રીપ્સ (ખોટી દિશામાં આવતા વાહનોના ટાયર પંચર કરવા માટે રચાયેલ) ના ઇન્સ્ટોલેશન જેવા પ્રયાસો પણ ઉલ્લંઘન કરનારાઓને રોકવામાં નિષ્ફળ રહ્યા છે. ચાણક્યપુરી બ્રિજ નીચે આવી એક ટાયર કિલર લગાવવામાં આવી હતી. પણ તે બિનઅસરકારક સાબિત થઈ હતી. વાહનચાલકોએ તેનો પણ રસ્તો શોધી કાઢ્યો હતો.

અમલીકરણ અભિયાનમાં સામેલ એક અધિકારીએ જણાવ્યું કે ઘણા ઉલ્લંઘન કરનારાઓ, ખાસ કરીને કાર માલિકો, શરૂઆતમાં બહાના બનાવે છે પરંતુ સામાન્ય રીતે વિરોધ કર્યા વિના દંડ ભરી દે છે. સેક્ટર 1ના ડેટાની સરખામણી સેક્ટર 2 સાથે કરતા જણાયું કે 16 જુલાઈથી 18 જુલાઈ દરમિયાન શહેર પોલીસે (ટ્રાફિક પોલીસના દંડ સિવાય) રૂપિયા 13.80 લાખ વસૂલ્યા હતા, જેમાં શહેરના પશ્ચિમ ભાગમાંથી રૂપિયા 10.41 લાખ અથવા કુલના 78 ટકા દંડ વસૂલવામાં આવ્યો હતો.

આ પણ વાંચોઃ ગુજરાતમાં એક દાયકામાં વરસાદની પેટર્નમાં થયો મોટો ફેરફાર