Diwali 2026 Flight Ticket Price: દિવાળીના તહેવારોમાં પરિવાર સાથે બહાર ફરવા જવાનું આયોજન કરી રહેલા લોકો માટે હવાઈ મુસાફરી મોંઘી બની રહી છે. અમદાવાદથી મુંબઈ, દિલ્હી, ગોવા, બેંગલુરુ અને જબલપુર સહિતનાં શહેરોની ફ્લાઈટનાં ભાડાંમાં ભારે વધારો જોવા મળ્યો છે. છેલ્લા 10 દિવસમાં અનેક લોકપ્રિય સ્થાનિક હવાઈ માર્ગો પર ભાડાંમાં 15થી 20 ટકાનો વધારો થયો હોવાનું સામે આવ્યું છે. બીજી તરફ ટ્રેનની કન્ફર્મ ટિકિટ મેળવવી મુશ્કેલ બનતાં મુસાફરોને મોંઘી ફ્લાઈટ બુક કરવાની ફરજ પડી રહી છે.

મુંબઈનું રિટર્ન ભાડું ₹15 હજાર, દિલ્હીનું ₹28 હજાર

દિવાળીના વેકેશન દરમિયાન 9થી 16 નવેમ્બર વચ્ચે પ્રવાસનું આયોજન કરનારા મુસાફરો માટે હવાઈ ભાડાંમાં મોટો ઉછાળો જોવા મળી રહ્યો છે. સામાન્ય દિવસોમાં અમદાવાદથી મુંબઈની રિટર્ન ફ્લાઈટ ટિકિટ અંદાજે ₹7,000માં મળતી હતી, જે હવે વધીને ₹15,000ની આસપાસ પહોંચી ગઈ છે. દિલ્હીની રિટર્ન ટિકિટનું ભાડું ₹28,000 અને બેંગલુરુનું ₹25,000 સુધી પહોંચી ગયું છે. ગુજરાતી પ્રવાસીઓના લોકપ્રિય સ્થળ ગોવા માટે પણ રિટર્ન ફ્લાઈટનું ભાડું અંદાજે ₹35,000 થઈ ગયું છે. આ કારણે દિવાળીના વેકેશનનું આયોજન કરનારા પરિવારોને અગાઉ કરતાં વધુ ખર્ચ કરવો પડી રહ્યો છે.

અમદાવાદથી જબલપુરનું ભાડું ₹50 હજાર સુધી પહોંચ્યું

હવાઈ ભાડાંમાં થયેલા મોટા વધારાનું ઉદાહરણ અમદાવાદથી જબલપુરની ફ્લાઈટ છે. ઓક્ટોબર દરમિયાન આ રૂટ પર રિટર્ન ટિકિટ અંદાજે ₹10,000થી ₹12,000માં મળતી હતી, જ્યારે હવે તેનું ભાડું વધીને ₹45,000થી ₹50,000 સુધી પહોંચી ગયું છે. આ રીતે કેટલાક રૂટ પર ભાડાંમાં સામાન્ય 15થી 20 ટકાના વધારા કરતાં અનેકગણો ઉછાળો જોવા મળી રહ્યો છે. ખાસ કરીને છેલ્લી ઘડીએ ટિકિટ બુક કરાવનારા મુસાફરોને વધુ રકમ ચૂકવવી પડી રહી છે.

બાગડોગરાનું ભાડું ₹70 હજાર સુધી પહોંચ્યું

ઉત્તર-પૂર્વ ભારતનાં પ્રવાસન સ્થળોની વધતી લોકપ્રિયતા વચ્ચે બાગડોગરા જવા માટે પણ હવાઈ મુસાફરી મોંઘી બની છે. અમદાવાદથી બાગડોગરાની કનેક્ટિંગ ફ્લાઈટનું રિટર્ન ભાડું અંદાજે ₹45,000 સુધી પહોંચી ગયું છે, જ્યારે સીધી ફ્લાઈટ માટે ₹70,000 સુધીની રકમ ચૂકવવી પડી રહી છે. બાગડોગરા એરપોર્ટ મારફતે દાર્જિલિંગ અને ગંગટોક જેવા લોકપ્રિય પ્રવાસન સ્થળોએ પહોંચી શકાય છે. દિવાળીના વેકેશનમાં આ સ્થળોની મુલાકાત લેવાનું આયોજન કરનારા પ્રવાસીઓને હવાઈ મુસાફરી માટે વધુ બજેટ ફાળવવું પડી રહ્યું છે.

દહેરાદૂન અને ચેન્નઈની ફ્લાઈટ પણ મોંઘી

અમદાવાદથી દહેરાદૂનની કનેક્ટિંગ ફ્લાઈટનું રિટર્ન ભાડું ₹32,000 અને સીધી ફ્લાઈટનું ભાડું ₹45,000 સુધી પહોંચી ગયું છે. ચેન્નઈ માટે કનેક્ટિંગ ફ્લાઈટનું ભાડું ₹23,000 અને સીધી ફ્લાઈટનું ભાડું ₹41,000 સુધી નોંધાઈ રહ્યું છે. અગાઉ અમદાવાદથી ચેન્નઈની રિટર્ન ટિકિટ અંદાજે ₹10,000થી ₹12,000માં મળતી હતી, જે હવે કેટલાક વિકલ્પોમાં ₹35,000થી ₹40,000ની આસપાસ પહોંચી ગઈ છે.

ચાર સભ્યોના પરિવારનું બજેટ ખોરવાયું

દિવાળીના તહેવારોમાં પરિવાર સાથે ફરવા જવાનું આયોજન કરનારા લોકો માટે વધતાં હવાઈ ભાડાં આર્થિક ભારણ બની રહ્યાં છે. જો ચાર સભ્યોનો પરિવાર અમદાવાદથી ગોવા જવા માટે વ્યક્તિદીઠ ₹35,000ની રિટર્ન ટિકિટ બુક કરાવે તો માત્ર હવાઈ મુસાફરી પાછળ જ ₹1.40 લાખનો ખર્ચ થઈ શકે છે. આ ઉપરાંત હોટલ, સ્થાનિક પરિવહન, ભોજન અને અન્ય પ્રવાસ ખર્ચ અલગથી ચૂકવવો પડે છે. પરિણામે અનેક પરિવારો માટે દિવાળીના વેકેશનનું કુલ બજેટ વધી રહ્યું છે.

ટ્રેનની કન્ફર્મ ટિકિટ ન મળતાં ફ્લાઈટની માગ વધી

દિવાળીના તહેવારો દરમિયાન ગુજરાતમાંથી મોટી સંખ્યામાં લોકો પોતાના વતન અથવા પ્રવાસન સ્થળોએ જતાં હોય છે. આ વખતે લોકપ્રિય ટ્રેનોમાં કન્ફર્મ ટિકિટ મેળવવી મુશ્કેલ બનતાં મુસાફરો હવાઈ મુસાફરી તરફ વળી રહ્યા છે. તહેવારો દરમિયાન વધતી માગ, ઉપલબ્ધ બેઠકો અને બુકિંગના સમયને આધારે એરલાઈન્સનાં ભાડાં બદલાતાં હોવાથી છેલ્લી ઘડીએ ટિકિટ બુક કરાવનારા મુસાફરોને વધુ રકમ ચૂકવવી પડી રહી છે.

મોંઘી ફ્લાઈટ છતાં ઉત્તર-પૂર્વ ભારતનો ક્રેઝ યથાવત્

હવાઈ ભાડાંમાં ભારે વધારો થયો હોવા છતાં ગુજરાતી પ્રવાસીઓમાં ઉત્તર-પૂર્વ ભારતનાં પ્રવાસન સ્થળોનું આકર્ષણ યથાવત્ છે. ગંગટોક, દાર્જિલિંગ અને શિલોંગ જેવા સ્થળો ઉપરાંત મધ્યપ્રદેશના બાંધવગઢ, કાન્હા અને પંચમઢી જેવા વાઈલ્ડલાઈફ ટૂરિઝમ ડેસ્ટિનેશન માટે પણ પ્રવાસીઓ રસ દાખવી રહ્યા છે. આ ઉપરાંત ઉત્તરાખંડ, કાશ્મીર અને હિમાચલ પ્રદેશ પણ દિવાળીના વેકેશન માટે પ્રવાસીઓની પસંદગીમાં છે. જોકે વધતાં હવાઈ ભાડાંને કારણે પ્રવાસીઓ માટે વહેલું બુકિંગ કરાવવું અને વિવિધ ફ્લાઈટ વિકલ્પોની સરખામણી કરવી વધુ જરૂરી બની છે.

આ પણ વાંચોઃ દિવાળી પહેલાં મહારાષ્ટ્રમાં FDAની મોટી કાર્યવાહી, 9 કરોડ રૂપિયાનો ખાદ્ય જથ્થો જપ્ત, પતંજલિના ઘી પર પણ સકંજો