ધંધુકા હત્યા કેસમાં SITની રચના, બે મુખ્ય આરોપી ઝડપાયા, 125થી વધુ લોકો સામે અલગથી ગુનો દાખલ
Dhandhuka News: અમદાવાદ જિલ્લાના ધંધુકા શહેરમાં 18 એપ્રિલ 2026 (શનિવાર)ના રોજ બાઇક ઓવરટેક કરવા જેવી નાની બાબતને લઈને થયેલા વિવાદમાં ભરવાડ સમાજના યુવક ધર્મેશ ગમારા (ઉંમર આશરે 30 વર્ષ)ની છરીના ઘા વાગતા હત્યા થઈ હતી. આ ઘટના બાદ શહેરમાં બે અલગ-અલગ સમુદાયો વચ્ચે તંગદિલી વધી, જેમાં ઉશ્કેરાયેલા ટોળાએ આગજની, તોડફોડ અને વાહનોને નુકસાન પહોંચાડ્યું હતું. પોલીસે ત્વરિત કાર્યવાહી કરતા બે મુખ્ય આરોપીઓને ઝડપી લીધા છે અને હિંસા સાથે સંકળાયેલા 125થી વધુ અજાણ્યા લોકો સામે અલગથી ગુનો નોંધ્યો છે. આ ઉપરાંત કેસની નિષ્પક્ષ તપાસ માટે SIT (સ્પેશિયલ ઇન્વેસ્ટિગેશન ટીમ)ની રચના કરવામાં આવી છે.
ઘટનાની વિગતો
ધર્મેશ ગમારા નસીબ સોસાયટી પાસેથી બાઇક પર પસાર થઈ રહ્યો હતો. ત્યારે સમીર નામના યુવકના બાઈક સાથે અથડાતા બંને વચ્ચે સામાન્ય બોલાચાલી થઈ હતી. બપોરે શરૂ થયેલો આ વિવાદ સાંજે વધુ ઉગ્ર બન્યો. સાંજના સમયે ધર્મેશ નસીબ સોસાયટી પાસે પહોંચ્યો, ત્યારે સમીર અને તેની સાથે રહેલા પરવેજ સહિતના કેટલાક શખ્સોએ ફરી માથાકૂટ શરૂ કરતા મામલો ફરી ઉગ્ર બન્યો હતો. બંને પક્ષ વચ્ચે ઘર્ષણ વધતાં ધર્મેશ ગમારા પર છરીથી હુમલો કરવામાં આવ્યો હતો, જેમાં ધર્મેશ ગમારાને પગના ભાગે છરી વાગતા વધુ લોહી વહી જવાના કારણે તેમનું મોત નિપજ્યું હતું.
પોલીસ કાર્યવાહી અને ધરપકડ
આ મામલામાં પોલીસે તાત્કાલિક કાર્યવાહી કરતા સમીર અને રિઝવાન (પરવેજ) નામના બે મુખ્ય આરોપીઓની ધરપકડ કરી છે. બંને સામે હત્યાનો ગુનો નોંધવામાં આવ્યો છે. હત્યાના વિરોધમાં ટોળાએ પાળીયાદ રોડ, ધંધુકા સર્કલ અને બજાર વિસ્તારમાં દુકાનો, વાહનો, લારી-ગલ્લા તેમજ ટાયરોમાં આગચંપી કરી હતી. આ દરમિયાન તોડફોડ અને પથ્થરમારો પણ થયો હતો. આગજની અને તોડફોડના કેસમાં પોલીસે 125થી વધુ અજાણ્યા લોકોના ટોળા સામે રાયોટિંગનો અલગ ગુનો દાખલ કર્યો છે. અત્યાર સુધીમાં હિંસામાં સંકળાયેલા આશરે 20થી 25 લોકોને અટકાયતમાં લેવામાં આવ્યા છે.
SITની રચના
ઘટનાની ગંભીરતા અને પરિવારની માંગણીને ધ્યાનમાં રાખીને પોલીસે ડીવાયએસપી પ્રકાશ પ્રજાપતિના નેતૃત્વમાં SITની રચના કરી છે. આ ટીમમાં નીચેના ચાર અધિકારીઓ સામેલ છે
– ડીવાયએસપી પ્રકાશ પ્રજાપતિ (અધ્યક્ષ)
– પી.આઈ. રઘુ કરમટીયા
– પી.આઈ. કરણ વિહોલ
– પી.એસ.આઈ. એસ.એચ. ઝાલા
SIT નિષ્પક્ષ અને ઊંડાણપૂર્વક તપાસ કરશે. દર અઠવાડિયે પ્રોગ્રેસ રિપોર્ટ જમા કરાવવાનું નક્કી કરવામાં આવ્યું છે. વિશેષ જાહેર વકીલની પણ નિમણૂક કરવામાં આવશે.
અમદાવાદ ગ્રામ્ય પોલીસ વડા એસપી ઓમપ્રકાશ જાટના નેતૃત્વમાં 200થી વધુ પોલીસ જવાનો તૈનાત કરવામાં આવ્યા છે. SOG, LCB અને અન્ય ટીમો સંવેદનશીલ વિસ્તારોમાં પેટ્રોલિંગ કરી રહી છે. શહેરના પ્રવેશ-નિર્ગમન પર સખત ચેકિંગ, હાઉસ-ટુ-હાઉસ તપાસ અને સોશ્યલ મીડિયા પર નજર રાખવામાં આવી રહી છે. મૃતકની અંતિમ યાત્રા પોલીસ બંદોબસ્ત વચ્ચે પૂર્ણ થઈ છે. હાલ સ્થિતિ કાબૂમાં છે, પરંતુ તંગદિલી યથાવત્ છે.
એસપી ઓમપ્રકાશ જાટે મૃતકના પરિવારને મળીને ન્યાયની ખાતરી આપી છે અને કહ્યું છે કે “કોઈ પણ દોષીને બક્ષવામાં નહીં આવે.” પોલીસે શહેરમાં અનધિકૃત કબજા દૂર કરવાની પણ કાર્યવાહી શરૂ કરી છે.
આ કેસને લઈને સમગ્ર ગુજરાતમાં ચર્ચા ચાલી રહી છે. SITની તપાસ બાદ વધુ વિગતો સામે આવવાની સંભાવના છે.
આ પણ વાંચો: સુરતના પાંડેસરામાં જમાઈએ સાસુને જીવતી સળગાવી, હોસ્પિટલમાં મોત
