દિલ્હીમાં પણ સેવન્થ ડે સ્કૂલ જેવો કિસ્સો: 15 વર્ષના વિદ્યાર્થીની છાતીમાં ચાકૂ મારી દીધું
નવી દિલ્હી, 06 સપ્ટેમ્બર 2025: રાજધાની દિલ્હીના પહાડગંજ વિસ્તારમાં સ્કૂલની બહાર 15 વર્ષના વિદ્યાર્થીને માર મારવાનો બદલો લેવા માટે છરીના ઘા મારવાનો કિસ્સો સામે આવ્યો છે. પોલીસે છરીના ઘા કરવાના આરોપમાં ત્રણ સગીર છોકરાઓની અટકાયત કરી છે. પકડાયેલા આ ત્રણ છોકરાઓની ઉંમર 15 અને 16 વર્ષની છે. પોલીસ તેમની પૂછપરછ કરીને આ મામલાની તપાસ કરી રહી છે.
પોલીસે શનિવારે એક સત્તાવાર નિવેદનમાં જણાવ્યું હતું કે આ ઘટના 4 સપ્ટેમ્બરના રોજ બની હતી, જ્યારે ઘાયલ છોકરો છાતીમાં છરી લઈને પહાડગંજ પોલીસ સ્ટેશન પહોંચ્યો હતો. તેને તાત્કાલિક નજીકની કલાવતી સરન હોસ્પિટલમાં લઈ જવામાં આવ્યો હતો અને બાદમાં RML હોસ્પિટલમાં રિફર કરવામાં આવ્યો હતો, જ્યાં ડોકટરોએ તેની છાતીમાં અટવાયેલી છરી સફળતાપૂર્વક કાઢી નાખી હતી.
પોલીસે જણાવ્યું હતું કે આ કેસની શરૂઆતી તપાસમાં જાણવા મળ્યું હતું કે લગભગ 10-15 દિવસ પહેલા, એક આરોપી સગીર છોકરાને કેટલાક છોકરાઓએ માર માર્યો હતો. તેમને શંકા હતી કે પીડિત વિદ્યાર્થીએ તે છોકરાઓને તેને મારવા માટે ઉશ્કેર્યા હતા.
પોલીસના જણાવ્યા અનુસાર, માર મારવાનો બદલો લેવા માટે, છોકરા અને તેના બે મિત્રોએ પીડિત વિદ્યાર્થી સાથે તેની શાળાના ગેટ પાસે ઝઘડો કર્યો અને પછી તેને છરી મારી.
ડીસીપી (સેન્ટ્રલ) નિધિન વલસને જણાવ્યું હતું કે, “એક સગીરે પીડિત વિદ્યાર્થી પર છરી વડે હુમલો કર્યો હતો, જ્યારે તેના બે મિત્રોએ તેને પકડી રાખ્યો હતો. છરી મારતા પહેલા, એક આરોપીએ તૂટેલી બીયરની બોટલ બતાવીને છોકરાને ધમકી પણ આપી હતી.”
આ કેસમાં પહાડગંજ પોલીસ સ્ટેશનમાં ભારતીય ન્યાય સંહિતા (BNS) અને શસ્ત્ર અધિનિયમ હેઠળ કેસ નોંધવામાં આવ્યો છે. પોલીસે જણાવ્યું હતું કે સ્થાનિક ગુપ્ત માહિતી અને તાત્કાલિક દરોડાની મદદથી, FIR નોંધાવ્યાના થોડા કલાકોમાં જ ત્રણેય આરોપી છોકરાઓને આરામ બાગ વિસ્તારમાંથી અટકાયતમાં લેવામાં આવ્યા હતા. પોલીસે ઘટનાસ્થળેથી છરી અને તૂટેલી બીયરની બોટલ પણ કબજે કરી છે.
આ પણ વાંચો: નાની બહેને મોટી બહેનના ઘરમાં ધાડ પાડી, ડુપ્લીકેટ ચાવીથી ઘર ખોલી 24 લાખના દાગીના ઉપાડી ગઈ
