Stock Market ફરી ક્રેશ, 73700ની નીચે આવ્યો સેન્સેક્સ, રોકાણકારોના 14 લાખ કરોડ સ્વાહા

• સેન્સેક્સ 1,836.57 પોઈન્ટ અથવા 2.46 ટકા ઘટીને 72,696.39 પર અને નિફ્ટી 601.85 પોઈન્ટ અથવા 2.60 ટકા ઘટીને 22,512.65 પર બંધ થયો

Stock Market: સોમવારે ભારતીય ઇક્વિટી ઈન્ડેક્સ નીચા સ્તરે બંધ થયો હતો. વિવિધ ક્ષેત્રોમાં વેચવાલી થવાને કારણે નિફ્ટી આજે 23 માર્ચે 22,500ની નજીક બંધ થયો હતો. બજાર બંધ થવા પર, સેન્સેક્સ 1,836.57 પોઈન્ટ અથવા 2.46 ટકા ઘટીને 72,696.39 પર અને નિફ્ટી 601.85 પોઈન્ટ અથવા 2.60 ટકા ઘટીને 22,512.65 પર બંધ થયો. આજના ઘટાડાને કારણે રોકાણકારોની સંપત્તિમાં 14 લાખ કરોડ રૂપિયાથી વધુનો ઘટાડો થયો છે. નિફ્ટીમાં સૌથી વધુ પડનારા શેરોમાં શ્રીરામ ફાઇનાન્સ, ટ્રેન્ટ, અલ્ટ્રાટેક સિમેન્ટ, ટાઇટન કંપની, જિયો ફાઇનાન્સિયલ સામેલ રહ્યા હતા, જ્યારે સૌથી વધુ વધનારા શેરમાં HCL ટેક્નોલોજીસ, ONGC, પાવર ગ્રીડ કોર્પ અને ઇન્ફોસિસ સામેલ હતા.

બધા સેક્ટોરલ ઈન્ડેક્સ લાલ નિશાનમાં બંધ થયા હતા, જેમાં રિયલ્ટી, કેપિટલ ગુડ્સ, કન્ઝ્યુમર ડ્યુરેબલ્સ, મેટલ્સ, ટેલિકોમ અને PSU બેંકોમાં 4-5%નો ઘટાડો થયો, જ્યારે ઓટો, એનર્જી, મીડિયા, ખાનગી બેંકો અને ઓઇલ અને ગેસમાં 3%નો ઘટાડો થયો. નિફ્ટી મિડકેપ અને સ્મોલકેપ સૂચકાંકો લગભગ 4% ઘટ્યા હતા.

મધ્ય પૂર્વમાં યુદ્ધના કારણે સ્થિતિ તંગ બની ગઈ છે. જેની સીધી અસર શેર બજાર બાદ સોના ચાંદીના માર્કેટ પર પડી છે. આજ સવારથી જ ચાંદીના ભાવમાં સતત ઘટાડો જોવા મળી રહ્યો છે. આ દરમિયાન MCX પર 1 કિલો ચાંદીનો ભાવ 2 લાખ રૂપિયાની નીચે પહોંચી ગયો છે. MCXમાં 1 કિલો ચાંદીની કિંમત 1,99,643 રૂપિયા સુધી ગગડી હતી ત્યાર બાદ થોડો સુધારો થતાં બપોરે 3.29 કલાકે 1 કિલો ચાંદીનો ભાવ 2,05,180 રૂપિયાની આસપાસ કારોબાર કરી રહ્યો છે. જેમાં પ્રતિ કિલોએ 9 ટકા એટલે કે 21 હજાર રૂપિયાથી વધુનો મોટો ઘટાડો નોંધાયો છે.

ઓલ ટાઈમ હાઈથી સોનું 63,000 સસ્તું થયું

સોનાએ 29 જાન્યુઆરીના રોજ 1,93,000 રૂપિયાના સ્તરે પહોંચીને ઓલ ટાઈમ હાઈનો રેકોર્ડ બનાવ્યો હતો, પરંતુ તેના બીજા જ દિવસથી સોનાના ભાવમાં ઘટાડો શરૂ થયો છે. MCX પર સોનું આજે 1.30 લાખ રૂપિયાની નીચે પણ ટ્રેડ થઈ રહ્યું છે. એટલે કે જો ઓલ ટાઈમ હાઈ અને આજના નીચલા સ્તરની સરખામણી કરવામાં આવે તો છેલ્લા 53 દિવસમાં સોનું 63,000 રૂપિયાથી પણ વધુ સસ્તું થઈ ગયું છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

છેલ્લા 40 વર્ષમાં સૌથી મોટો ઘટાડો

કોમેક્સ પર સોનાની કિંમત આશરે 3% ઘટીને 4,462 ડોલર પ્રતિ ઔંસ પર આવી ગઈ. ઉલ્લેખનીય છે કે આ પહેલા ગત સપ્તાહે સોનું લગભગ 11% તૂટ્યું હતું, જે 1983 પછીનો તેનો સૌથી મોટો સાપ્તાહિક ઘટાડો માનવામાં આવે છે. બીજી તરફ એશિયન કારોબાર દરમિયાન ચાંદીની કિંમત પણ આશરે 3% ઘટીને 67.5 ડોલર પ્રતિ ઔંસ સુધી આવી ગઈ. સોનાની કિંમતમાં થયેલો સાપ્તાહિક ઘટાડો છેલ્લા 40 વર્ષમાં સૌથી મોટો છે.

આ પણ વાંચોઃ  લાંબા સમય સુધી અસર રહેશે, કોરોનાની જેમ તૈયાર રહોઃ PM મોદીએ આપી ચેતવણી