Diwali Muhurat Trading 2026: દેશમાં દિવાળીના પાવન અવસરે આયોજિત મુહૂર્ત ટ્રેડિંગ 2026 દરમિયાન કમોડિટી માર્કેટમાંથી ઉત્સાહવર્ધક સમાચાર સામે આવ્યા છે. દેશના પ્રમુખ વાયદા બજાર એવા મલ્ટી-કોમોડિટી એક્સચેન્જ (MCX) પર સોના અને ચાંદીના ભાવમાં શાનદાર વધારો જોવા મળ્યો છે. સત્ર દરમિયાન સોના અને ચાંદી બંને કિંમતી ધાતુઓમાં રૂ. 500 થી વધુનો જબરદસ્ત ઉછાળો નોંધાયો હતો. રવિવાર હોવાના કારણે વૈશ્વિક બજારો બંધ રહ્યા હોવા છતાં, ભારતીય બજારમાં દિવાળીના તહેવારને લીધે રહેલી મજબૂત સ્થાનિક માંગને કારણે કિંમતો ઊંચી સપાટી પર ટ્રેડ થઈ રહી છે. નિષ્ણાતોનું માનવું છે કે મધ્ય પૂર્વમાં ચાલી રહેલા તણાવ અને યુદ્ધના અંતની અટકળો વચ્ચે રોકાણકારો માટે આ આકર્ષક તક બની છે.

સોનાના ભાવમાં મોટો ઉછાળો

મલ્ટી કોમોડિટી એક્સચેન્જ (MCX) પર સોનાના વાયદા ભાવમાં સતત તેજી જોવા મળી રહી છે. આંકડાઓ અનુસાર, મુહૂર્ત ટ્રેડિંગ સેશન દરમિયાન સોનાના ભાવમાં રૂ. 533 નો વધારો થતાં તે વધીને રૂ. 1,42,700 પ્રતિ 10 ગ્રામ સુધી પહોંચી ગયા હતા. અગાઉ શુક્રવારે બજાર બંધ થયું ત્યારે સોનું રૂ. 1,42,167 પ્રતિ 10 ગ્રામ પર હતું, જ્યારે આજે વાયદા બજારમાં તેની શરૂઆત રૂ. 1,42,163 ના સ્તરે ફ્લેટ થઈ હતી. બપોરના સુમારે સોનું મજબૂત બઢત સાથે કારોબાર કરી રહ્યું હતું. બજારના વિશેષજ્ઞોના મતે આગામી દિવસોમાં પણ સોનાની ચાલ સાવચેતીભરેલી પરંતુ સધ્ધર રહી શકે છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ચાંદીના ભાવે રચ્યો નવો ઇતિહાસ

સોનાની સાથે-સાથે ચાંદીમાં પણ રોકાણકારો દ્વારા ભારે ઉત્સાહ જોવા મળ્યો હતો. મુહૂર્ત ટ્રેડિંગ દરમિયાન વાયદા બજારમાં ચાંદીનો ભાવ રૂ. 1.85 લાખની ઐતિહાસિક સપાટીને પાર કરી ગયો હતો. ટ્રેડિંગ સેશનમાં ચાંદી પ્રતિ કિલો રૂ. 552 ના ઉછાળા સાથે રૂ. 1,85,339 ની ઊંચી સપાટી સુધી પહોંચી હતી. શુક્રવારે ચાંદી રૂ. 1,84,787 પર બંધ થઈ હતી અને આજે સવારે પણ ઉછાળા સાથે જ ખુલી હતી. દિવસ દરમિયાન ઉતાર-ચઢાવ આવ્યા છતાં ચાંદીનું વલણ મજબૂત રહ્યું છે, જે દિવાળીના દિવસે વેપારીઓ અને રોકાણકારો માટે શુભ સંકેત સમાન છે.

આ પણ વાંચો: મુહૂર્ત ટ્રેડિંગ પર ગગડ્યું શેરબજાર: ઘટાડા છતાં રોકાણકારોએ કરી ₹2 લાખ કરોડની કમાણી