અમદાવાદમાં જામીનદારની ધોખાધડી, કોર્ટને ગેરમાર્ગે દોરવાનો પ્રયાસ, કારંજ પોલીસે ગુનો નોંધ્યો

અમદાવાદ 16 સપ્ટેમ્બર 2025:  અમદાવાદની સીટી સિવિલ કોર્ટમાં એક ચોંકાવનારો કેસ સામે આવ્યો છે, જેમાં જામીનદારે આરોપીને જામીન અપાવવા ખોટા દસ્તાવેજો અને પુરાવાઓ રજૂ કરીને કોર્ટને ગેરમાર્ગે દોરવાનો પ્રયાસ કર્યો હતો. આ ઘટનામાં કારંજ પોલીસે ગુનો નોંધીને વધુ તપાસ હાથ ધરી છે, જેના પરિણામે આરોપીઓ સામે કડક કાર્યવાહીની શક્યતા છે.

ઘટનાની વિગતો અનુસાર, વટવા અલફસા પાર્કમાં રહેતા ફૈઝાન શેખ નામના આરોપીને ઓગસ્ટ 2022માં શરતી જામીન મળ્યા હતા. જામીનદાર તરીકે ચાહરિયા રાઠવા નામની વ્યક્તિ રજૂ થઈ, જેની ઓળખ ખોટી હોવાનું બાદમાં બહાર આવ્યું. આ જામીનદારે ખોટી મિલ્કતની વિગતો દર્શાવીને સોગંદનામું રજૂ કર્યું હતું. આ માટે અસલ દસ્તાવેજોની જગ્યાએ રંગીન ફોટોકોપીઓનો ઉપયોગ કરીને કોર્ટને ગેરમાર્ગે દોરવાનો પ્રયાસ કરાયો. આ ધોખાધડીનો ખુલાસો ત્યારે થયો જ્યારે આરોપી ફૈઝાન શેખ કોર્ટમાં નિયમિત હાજરી (કોલ આઉટ) માટે ન આવ્યો.

આરોપીની ગેરહાજરીથી શંકા જાગતાં કોર્ટે જામીનદારને સમન્સ મોકલી, અને તપાસ દરમિયાન ખોટા દસ્તાવેજોની હકીકત બહાર આવી. છોટા ઉદેપુર જિલ્લાની સલંગ્ત કચેરીમાં ખરાઈ કરતાં સ્પષ્ટ થયું કે રજૂ કરાયેલા દસ્તાવેજો બનાવટી હતા. આ ઘટનાએ જામીન પ્રક્રિયાની પારદર્શિતા પર પ્રશ્નો ઉભા કર્યા છે.

કોર્ટના રજીસ્ટ્રાર હાર્દિકભાઈ દેસાઈની ફરિયાદના આધારે કારંજ પોલીસે જામીનદાર અને આરોપી વિરુદ્ધ ગુનો નોંધ્યો છે. પીઆઈ પી.ટી. ચૌધરીની આગેવાની હેઠળ પોલીસે ફૈઝાન શેખની ટ્રાન્સફર વોરંટના આધારે ધરપકડની તૈયારી કરી છે. આ ઉપરાંત, ખોટા પુરાવા રજૂ કરનાર જામીનદાર સામે પણ કડક કાર્યવાહીની શક્યતા છે.

પોલીસની પ્રાથમિક તપાસમાં આવા કૌભાંડોનું મોટું નેટવર્ક હોવાની આશંકા વ્યક્ત કરાઈ છે. આ ઘટના કોર્ટની કાર્યપ્રણાલીમાં દસ્તાવેજોની ચકાસણીની પ્રક્રિયાને વધુ મજબૂત કરવાની જરૂરિયાત દર્શાવે છે. હાલ પોલીસ વધુ તપાસ કરી રહી છે, અને આ મામલે નવા ખુલાસાઓની શક્યતા નકારી શકાય નહીં.

આ પણ વાંચો: ગુજરાતમાં પહેલીવાર લેન્ડ રીફોર્મ્સ નેશનલ કોન્ફરન્સ યોજાશે