Adhik Maas 2026: ભગવાને અધિક મહિનો શા માટે બનાવવો પડ્યો હતો, જાણો પુરષોત્તમ માસનું મહત્ત્વ

Dharm News: હિન્દુ કેલેન્ડરમાં લગભગ દર ત્રણ વર્ષે એક વધારાનો મહિનો આવે છે, જેને અધિક માસ, મલમાસ અથવા પુરુષોત્તમ મહિના તરીકે ઓળખવામાં આવે છે. આ વર્ષે અધિક મહિનો જેઠ મહિનામાં આવી રહ્યો છે, જે 17 મે થી 15 જૂન, 2026 સુધી ચાલશે. આ 13માં મહિનાની ઉત્પત્તિ ભગવાન વિષ્ણુના નરસિંહ અવતાર અને રાક્ષસ રાજા હિરણ્યકશિપુના વધની પૌરાણિક કથા સાથે જોડાયેલી છે.

હિરણ્યકશિપુને વરદાન મળ્યું હતું

મહર્ષિ કશ્યપ અને અદિતિના પુત્ર હિરણ્યકશિપુએ ભગવાન બ્રહ્માને તેમની કઠોર તપસ્યાથી પ્રસન્ન કર્યા. તેમણે એવું વરદાન માંગ્યું જે તેમને લગભગ અમર બનાવી દે. તેમણે શરત મૂકી કે તેમને કોઈ પણ માનવ, પ્રાણી, દેવ કે રાક્ષસ ન મારી શકે. તે ન તો દિવસે કે ન તો રાત્રે મરે, ઘરની અંદર કે બહાર ક્યાંય પણ ન મરે, તે ન તો પૃથ્વી પર કે ન તો આકાશમાં, ન તો કોઈ શસ્ત્ર દ્વારા કે ન તો કોઈ અસ્ત્ર દ્વારા મરે, ન તો ભગવાન બ્રહ્માએ બનાવેલા બાર મહિનામાં તેનું મૃત્યું થાય. બ્રહ્માજીએ તથાસ્તુ કહી તો દીધું, પરંતુ વરદાન પ્રાપ્ત કર્યા પછી હિરણ્યકશિપુ ઘમંડી બની ગયો. તેણે સ્વર્ગ પર કબજો મેળવી લીધો અને પોતાને ભગવાન જાહેર કરી દીધો.

પ્રહલાદની અતૂટ ભક્તિ

હિરણ્યકશિપુનો પુત્ર પ્રહલાદ ભગવાન વિષ્ણુનો પરમ ભક્ત હતો. તેના પિતા આ સ્વીકારવા માટે બિલકુલ તૈયાર ન હતા. તેણે પ્રહલાદને મારવા માટે ઘણી ક્રૂર યાતનાઓ આપી અને તેને પર્વત પરથી ફેંકી દીધો, તેને ઝેર આપ્યું, તેને પાગલ હાથી દ્વારા કચડી નાખવાનો પ્રયાસ કરાયો અને તેને હોલિકા સાથે અગ્નિમાં બાળી નાખવાનો પ્રયાસ પણ કરવામાં આવ્યો,પરંતુ ભગવાન વિષ્ણુની કૃપાથી પ્રહલાદ હંમેશા બચી ગયો.

નરસિંહ અવતાર અને અધિક મહિનાની ઉત્પત્તિ

જ્યારે હિરણ્યકશિપુએ પ્રહલાદને મારવાનો પ્રયાસ કર્યો, ત્યારે ભગવાન વિષ્ણુએ નરસિંહનું રૂપ ધારણ કર્યું, જે અડધા માનવ અને અડધા સિંહનું સ્વરૂપ હતું. તેમણે હિરણ્યકશિપુને પોતાની જાંઘ પર બેસાડ્યો અને સાંજના સમયે તેના ઘરના દરવાજા પર એટલે કે ન અંદર ન બહાર, કોઈ હથિયાર નહિ, પરંતુ પોતાના નખથી મારી નાખ્યો.

હિરણ્યકશિપુનું વરદાન એટલું પ્રબળ હતું કે તેને 12 મહિનામાં મારી શકાય તેમ ન હતો, તેથી ભગવાન વિષ્ણુએ વર્ષનો એક વધારાનો 13મો મહિનો બનાવ્યો, જેને અધિક માસ કહેવામાં આવે છે. આ મહિનામાં નરસિંહ અવતારે હિરણ્યકશિપુનો વધ કર્યો હતો. ભગવાન વિષ્ણુએ તેમના ભક્તનું રક્ષણ કરવા માટે આ મહિનાની રચના કરી હોવાથી તેને પુરુષોત્તમ માસ પણ કહેવામાં આવે છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પુરુષોત્તમ માસનું મહત્ત્વ

પુરાણો અનુસાર અધિક માસ અત્યંત પવિત્ર છે. આ મહિનામાં કરવામાં આવતા ઉપવાસ, દાન, જપ અને સત્કર્મોનું લાખો ગણું ફળ મળે છે. આ વર્ષે અધિક માસ 17 મે થી 15 જૂન, 2026 સુધી ચાલી રહ્યો છે, જે ખાસ કરીને શુભ છે.

આ મહિનામાં ભગવાન વિષ્ણુ અને નરસિંહની પૂજા કરવાનું વિશેષ મહત્ત્વ છે. તુલસી, શાલિગ્રામ, અને શ્રીમદ્ ભાગવત કથાનું પઠન ખૂબ જ ફળદાયી છે. દાન, તીર્થયાત્રા અને આધ્યાત્મિક મેળાવડા પાપોનો નાશ કરવામાં મદદ કરે છે.

અધિક માસનો સંદેશ

અધિક માસની વાર્તા આપણને શીખવે છે કે જ્યારે અધર્મ ચરમસીમાએ પહોંચે છે, ત્યારે ભગવાન પોતે આપણું રક્ષણ કરવા માટે અવતાર લે છે. આ મહિનો આપણને યાદ અપાવે છે કે સાચી ભક્તિ અને સમર્પણ કોઈપણ અવરોધને દૂર કરી શકે છે. આ પવિત્ર મહિના દરમિયાન કરવામાં આવતી આધ્યાત્મિક પ્રથાઓ ફક્ત આ જીવનમાં જ નહીં, પરંતુ ભવિષ્યના જીવનમાં પણ શુભ પરિણામો લાવે છે.

આ પણ વાંચોઃ 11 મેથી શરૂ થશે આ રાશિઓનો સારો સમય, 45 દિવસ મંગળ આપશે શુભ ફળ