નવી દિલ્હી, 11 જુલાઇ, 2025: ભારત સરકાર હેલ્થ ઇન્સ્યોરન્સને લઇને વધુ સતર્ક બનવા જઇ રહી છે. મીડિયા રિપોર્ટ્સ અનુસાર વધી રહેલા ખર્ચને નિયંત્રિત કરવા માટે સરકાર મોટું પગલું ઉઠાવવાની યોજના બનાવી રહી છે. સરકારની યોજના અનુસાર પ્રવર્તમાન નેશનલ હેલ્થ ક્લેમ્સ એક્સચેંજ (NHCE) પોર્ટલને નાણાં મંત્રાલય અને વીમા રેગ્યુલેટર (IRDAI) હેઠળ લાવવામાં આવશે. નોંધનીય છે હાલમાં આ પોર્ટલ આરોગ્ય મત્રાલયના નેશનલ હેલ્થ ઓથોરિટી હેઠળ આવે છે.
હોસ્પિટલો વીમા કવરેજ ધરાવતા દર્દીઓ પાસેથી વધુ પૈસા વસૂલ કરી રહી છે
સમાચાર એજન્સી રોઇટર્સ પર સરકારી સૂત્રોના હવાલાથી પ્રકાશિત થયેલા અહેવાલ મુજબ, વીમા નિયમનકારી સંસ્થા અને સરકારે અનેક વિશ્લેષણ કર્યા છે. એવું જાણવા મળ્યું છે કે ઘણી ખાનગી હોસ્પિટલો વીમા ધરાવતા દર્દીઓ પાસેથી વધુ પૈસા વસૂલ કરી રહી છે. લાખો કે કરોડો રૂપિયાનો વીમા કવરેજ ધરાવતા દર્દીઓ પાસેથી વધુ પૈસા વસૂલવામાં આવી રહ્યા છે. આની સીધી અસર વીમા કંપનીઓના ખર્ચ પર પડી રહી છે. આના કારણે કંપનીઓ પ્રીમિયમ દર વધારી રહી છે. આનાથી ઘણા લોકો માટે આરોગ્ય વીમો લેવાનું મોંઘુ અથવા લગભગ અશક્ય બની ગયું છે.
સરકાર હવે ગાળીયો કડક કરવાનો પ્રયાસ કરી રહી છે
આ અહેવાલમાં વૈશ્વિક તબીબી વલણનો પણ ઉલ્લેખ કરવામાં આવ્યો છે. આ મુજબ, ભારતમાં આરોગ્ય સંભાળનો ખર્ચ 2025માં 13% વધવાનો અંદાજ છે, જે વૈશ્વિક સરેરાશ 10 ટકા કરતા વધુ છે. હોસ્પિટલોનો ખર્ચ 2024માં નોંધાયેલા 12 ટકા કરતા વધુ હોવાનું જાણવા મળ્યું છે, ત્યારબાદ કેન્દ્ર સરકાર હવે ફંદો કડક કરવાનો પ્રયાસ કરી રહી છે. વીમા પ્રીમિયમનો વધતો ખર્ચ ચિંતાનો વિષય છે
સૂત્રએ નામ ન આપવાની શરતે જણાવ્યું હતું કે દેશમાં આરોગ્ય વીમા પ્રીમિયમમાંથી થતી વાર્ષિક આવકમાં પણ ઘટાડો થયો છે. નાણાકીય વર્ષ 2024-25માં વૃદ્ધિ દર ઘટીને 9% થઈ ગયો છે, જ્યારે અગાઉ તે 20 ટકાથી વધુ હતો. વીમા પ્રીમિયમના વધતા ખર્ચને કારણે, લોકો તેમની પોલિસી રિન્યુ કરી શકતા નથી.
ભારત સરકાર તરફથી સત્તાવાર નિવેદનની રાહ
આ મામલે આરોગ્ય અને નાણાં મંત્રાલય તરફથી હજુ સુધી કોઈ સત્તાવાર નિવેદન આવ્યું નથી. જો કે, જો સરકાર આ પહેલ કરે છે, તો દેશમાં આસમાને પહોંચેલા હોસ્પિટલ ખર્ચ અને આરોગ્ય ખર્ચને પણ કાબુમાં લઈ શકાય છે. આ સાથે, તે વીમાના ઘટતા કવરેજને નિયંત્રિત કરવામાં પણ મદદ કરી શકે છે.
આ પણ વાંચોઃ 11 જુલાઈ, 2025, શુક્રવારઃ સિંહ રાશિના લોકોમાં આત્મવિશ્વાસ વધશે, અંગત અને વ્યાવસાયિક જીવનમાં બધું સારું રહેશે
