અમદાવાદમાં ભારે વરસાદના પગલે શાળા-કોલેજમાં શનિ-રવિની રજા
અમદાવાદ: ગુજરાતના મોટાભાગના વિસ્તારોમાં ભારેથી અતિભારે વરસાદી માહોલ છે. 31 જુલાઈએ રેડ એલર્ટને પગલે અમદાવાદ સહિતના શાળા-કોલેજોમાં રજા જાહેર કરવામાં આવી હતી. હવામાન વિભાગે શનિવારે (1 ઓગસ્ટ) અમદાવાદ, સુરેન્દ્રનગર સહિત કુલ 6 જિલ્લામાં રેડ એલર્ટ જાહેર કર્યું છે. આને પગલે 1 ઓગસ્ટે અમદાવાદની તમામ સ્કૂલ-કોલેજોમાં રજા જાહેર કરવામાં આવી છે.
1 ઓગસ્ટે તમામ સ્કૂલ-કોલેજોમાં રજા
હવામાન વિભાગ દ્વારા અમદાવાદ શહેરમાં ભારે વરસાદની આગાહી સાથે રેડ એલર્ટ જાહેર કરવામાં આવતાં, વિદ્યાર્થીઓની સુરક્ષાને પ્રાથમિકતા આપતા જિલ્લા કલેક્ટરની સૂચના અનુસાર 1 ઓગસ્ટ 2026ના રોજ અમદાવાદ શહેરના પૂર્વ અને પશ્ચિમ વિસ્તારની તમામ સરકારી, અનુદાનિત (ગ્રાન્ટેડ) અને સ્વનિર્ભર (ખાનગી) પ્રાથમિક, માધ્યમિક, ઉચ્ચતર માધ્યમિક શાળાઓ, અધ્યાપન મંદિરો તેમજ કૉલેજોમાં શૈક્ષણિક કામગીરી સંપૂર્ણપણે બંધ રાખી રજા જાહેર કરવામાં આવી છે.
વાલીઓ અને વિદ્યાર્થીઓને તાત્કાલિક માહિતી
જિલ્લા વહીવટીતંત્ર દ્વારા તમામ શૈક્ષણિક સંસ્થાઓના આચાર્યો અને સંચાલકોને આ અંગે વાલીઓ, શિક્ષકો અને વિદ્યાર્થીઓને WhatsApp, SMS કે અન્ય માધ્યમો દ્વારા તાત્કાલિક માહિતગાર કરવા તથા આગામી સમયમાં માત્ર અધિકૃત સૂચનાઓનું જ ચુસ્તપણે પાલન કરવા DEO દ્વારા આદેશ આપવામાં આવ્યો છે.
વિદ્યાર્થીઓની સુરક્ષાને ધ્યાનમાં રાખીને આ નિર્ણય લેવામાં આવ્યો છે. નાગરિકોએ હવામાન વિભાગ અને જિલ્લા વહીવટીતંત્રની અધિકૃત સૂચનાઓનું પાલન કરવું જરૂરી છે.
આ પણ વાંચો: સાધુના વેશમાં પ્રદર્શન કરતા સાંસદ પપ્પુ યાદવ વિરુદ્ધ ફરિયાદ નોંધાઈ
