અમદાવાદમાં હોર્ન વગાડવા મુદ્દે બબાલ, ભાજપ મહિલા કોર્પોરેટર સાથે અભદ્ર વર્તન; ત્રણની ધરપકડ
Ahmedabad : અમદાવાદમાં નવરાત્રિ દરમિયાન રોડ રેજની એક ગંભીર ઘટના સામે આવી છે. ઇસનપુર વિસ્તારનાં ભાજપનાં મહિલા કોર્પોરેટર અને તેમના પરિવાર સાથે ફતેવાડી વિસ્તારમાં વિવાદ સર્જાયો હતો. હોર્ન વગાડવા જેવી સામાન્ય બાબતે શરૂ થયેલો વિવાદ ઉગ્ર બનતાં મારામારીની સ્થિતિ સર્જાઈ હતી. આ દરમિયાન મહિલા કોર્પોરેટર સાથે અભદ્ર વર્તન કરવામાં આવ્યું હોવાનો આરોપ છે. પોલીસે આ મામલે શોએબ સમા સહિત ત્રણ આરોપીઓની ધરપકડ કરી છે.
મળતી માહિતી મુજબ, મહિલા કોર્પોરેટર અને તેમનો પરિવાર ગરબાના કાર્યક્રમમાં ભાગ લેવા માટે ઇસનપુરથી એસજી હાઈવે તરફ જઈ રહ્યો હતો. આ દરમિયાન જુહાપુરા નજીક ફતેવાડી વિસ્તારમાં બાઈક ચાલક સાથે હોર્ન વગાડવા મુદ્દે બોલાચાલી થઈ હતી. શરૂઆતમાં સામાન્ય લાગતો આ વિવાદ જોતજોતામાં ઉગ્ર બન્યો હતો.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
કાર રોકીને હુમલાનો પ્રયાસ કર્યાનો આરોપ
પ્રાથમિક અહેવાલો અનુસાર, બાઈક ચાલક અને તેની સાથે આવેલા કેટલાક લોકોએ કોર્પોરેટરની કાર અટકાવી હતી. પરિસ્થિતિ વણસતાં કારમાં સવાર પરિવારે સુરક્ષાને ધ્યાનમાં રાખીને બહાર નીકળવાનું ટાળ્યું હતું. આરોપ છે કે કેટલાક લોકોએ કારના મિરર અને કાચ તોડવાનો પ્રયાસ કર્યો હતો. આ ઉપરાંત, મહિલા કોર્પોરેટર સાથે બિભત્સ ચેનચાળા અને અભદ્ર વર્તન કરવામાં આવ્યું હોવાનો પણ ગંભીર આરોપ છે. કેટલાક લોકોએ અશોભનીય ઇશારા કર્યા હોવાની માહિતી પણ સામે આવી છે.
પુત્રએ 112 પર ફોન કરતાં પોલીસ દોડી આવી
ઘટના દરમિયાન પરિસ્થિતિ વધુ બગડે નહીં તે માટે મહિલા કોર્પોરેટરના પુત્રએ તાત્કાલિક પોલીસ કંટ્રોલ રૂમના ઇમરજન્સી નંબર 112 પર જાણ કરી હતી. નવરાત્રિ દરમિયાન પોલીસ એલર્ટ હોવાથી ગણતરીની મિનિટોમાં પોલીસની ટીમ ઘટનાસ્થળે પહોંચી ગઈ હતી. પોલીસે દરમિયાનગીરી કરીને પરિસ્થિતિ કાબૂમાં લીધી હતી અને વધુ ઘર્ષણ અટકાવ્યું હતું.
આ પણ વાંચો:“મારા નિર્ણયનો અર્થ લોકો નથી જાણતા”, રશિયાને રાહત આપ્યા બાદ ટ્રમ્પનું મોટું નિવેદન
શોએબ સમા સહિત ત્રણ આરોપીઓની ધરપકડ
આ મામલે પોલીસે તાત્કાલિક કાર્યવાહી કરીને શોએબ સમા સહિત ત્રણ આરોપીઓની ધરપકડ કરી છે. હાલ પોલીસ સમગ્ર ઘટનાની તપાસ કરી રહી છે અને વિવાદ પાછળનાં સંજોગો અંગે વધુ વિગતો એકત્રિત કરવામાં આવી રહી છે.
મહિલાઓની સુરક્ષાને લઈને ફરી સવાલો
નવરાત્રિ જેવા તહેવાર દરમિયાન બનેલી આ ઘટનાએ જાહેર સ્થળોએ મહિલાઓની સુરક્ષા અને કાયદો-વ્યવસ્થાને લઈને ચિંતા ઊભી કરી છે. હોર્ન વગાડવા જેવી બાબતે શરૂ થયેલો વિવાદ આટલો ઉગ્ર બનતાં સ્થાનિક સ્તરે પણ ચર્ચા શરૂ થઈ છે.
પોલીસે આરોપીઓ સામે કાર્યવાહી કરી છે, પરંતુ આવી ઘટનાઓનું પુનરાવર્તન અટકાવવા માટે જાહેર સ્થળોએ સઘન પેટ્રોલિંગ અને કાયદાનું કડક પાલન જરૂરી છે. હાલ આ કેસમાં તપાસ ચાલુ છે. આરોપીઓ સામેના આક્ષેપો કોર્ટમાં સાબિત થાય ત્યાં સુધી તેમને દોષિત માનવામાં આવતા નથી.
