500% ટેરિફની ધમકીથી ભારતીય શેરબજાર કકડભૂસ થયું, સેન્સેક્સ 750 પોઈન્ટ તૂટીને બંધ

• સેન્સેક્સ લગભગ 200 પોઈન્ટના ઘટાડા સાથે ખુલ્યો અને વેચાણના દબાણે ધીમે ધીમે બજારને કબજે કર્યું. બપોરે 3:15 વાગ્યે સેન્સેક્સ લગભગ 750 પોઈન્ટ ઘટીને 84,200 પર ટ્રેડ કરી રહ્યો હતો

HD ન્યુઝ ડેસ્કઃ ભારતીય શેરબજારમાં ઉથલપાથલ ચાલી રહી છે, સતત ચોથા દિવસે પણ ઘટાડાનો દોર જોવા મળી રહ્યો છે. રોકાણકારોની ચિંતા વધી રહી છે. આખરે શું કારણ છે કે બજાર સરખું ચાલી રહ્યું નથી. ગુરુવારનું બજાર પણ ઘટાડા સાથે ખુલ્યું હતું. સેન્સેક્સ લગભગ 200 પોઈન્ટના ઘટાડા સાથે ખુલ્યો અને વેચાણના દબાણે ધીમે ધીમે બજારને કબજે કર્યું. બપોરે 3:15 વાગ્યે સેન્સેક્સ લગભગ 750 પોઈન્ટ ઘટીને 84,200 પર ટ્રેડ કરી રહ્યો હતો, જ્યારે નિફ્ટી 260 પોઈન્ટથી વધુ ઘટીને 25,900 ની નીચે સરકી ગયો હતો.

તેલ અને મેટલ કંપનીઓના શેરમાં મહત્તમ દબાણ જોવા મળી રહ્યું છે, હિન્ડાલ્કોના શેરમાં 3.77 ટકા, ONGCના શેરમાં 3.12 ટકા અને Jio Financeના શેરમાં 3 ટકાનો ઘટાડો જોવા મળ્યો હતો. આ ઘટાડા પાછળ ઘણા કારણો છે, પરંતુ નિષ્ણાતો તેને મુખ્યત્વે અમેરિકા સાથે જોડી રહ્યા છે.

ભારત રશિયન તેલનો મુખ્ય ખરીદદાર રહ્યો છે, જે ક્રૂડ ઓઇલની આયાતમાં 30% થી વધુ હિસ્સો ધરાવે છે. આ દરમિયાન, યુએસમાં એક નવું બિલ, Sanctioning Russia Act of 2025 રજૂ કરવામાં આવ્યું છે અને તેને રાષ્ટ્રપ્રમુખ ડોનાલ્ડ ટ્રમ્પ દ્વારા એક મુખ્ય પગલા તરીકે વર્ણવવામાં આવી રહ્યું છે. આ બિલનો હેતુ રશિયા પર આર્થિક દબાણ વધારવાનો છે.

ટ્રમ્પની ટેરિફ ધમકીથી કોને નુકસાન?

આ અંતર્ગત રશિયા પાસેથી તેલ, ગેસ અથવા અન્ય ઉર્જા ખરીદતા દેશો પર ભારે ટેરિફ લાદવામાં આવી શકે છે. અહેવાલો સૂચવે છે કે ટેરિફ 500% tariff સુધી પહોંચી શકે છે. આ મુખ્યત્વે ભારત, ચીન અને બ્રાઝિલને અસર કરી શકે છે. હવે જો અમેરિકા 500% ટેરિફ લાદે છે, તો તેનો અર્થ એ થઈ શકે છે કે અમેરિકામાં ભારતીય નિકાસ પર ભારે ટેક્સ લાદવામાં આવશે, જેનાથી અમેરિકામાં ભારતીય ઉત્પાદનોની કિંમતમાં વધારો થશે અને વેપારને નુકસાન થશે. જોકે ભારત સરકારે હજુ સુધી આ મુદ્દા પર કોઈ પ્રતિક્રિયા આપી નથી.

વિદેશી રોકાણકારોની વેચવાલી પણ એક મોટું કારણ

અન્ય મુખ્ય વૈશ્વિક બજારો પણ નબળા પ્રદર્શન કરી રહ્યા છે. જાપાનના નિક્કી 225 અને હોંગકોંગના હેંગ સેંગમાં નોંધપાત્ર ઘટાડો જોવા મળી રહ્યો છે. બુધવારે યુએસ બજારો પણ નીચા સ્તરે બંધ થયા, જે વૈશ્વિક પડકારોમાં વધારો સૂચવે છે. ત્રીજું મુખ્ય કારણ વિદેશી પોર્ટફોલિયો રોકાણકારો (FPIs) દ્વારા શેરનું સતત વેચાવાલી છે. ફક્ત જાન્યુઆરીના શરૂઆતના દિવસોમાં જ વિદેશી રોકાણકારોએ હજારો કરોડ રૂપિયાના શેર વેચી દીધા છે. આનાથી ભારતીય બજાર પર દબાણ વધ્યું છે અને એકંદરે રોકાણકારોનું મનોબળ નબળું પડ્યું છે. જોકે થોડા દિવસોમાં, ભારતીય કંપનીઓ તેમના ત્રીજા ક્વાર્ટરના પરિણામો જાહેર કરવાનું શરૂ કરશે, જે બજારનો માહોલ બદલી શકે છે.

આ પણ વાંચોઃ Jio–Airtel નહીં, BSNL તેના પ્લાન્સમાં આપી રહી છે ફ્રી એક્સ્ટ્રા ડેટાનો લાભ