રશિયાનો યુક્રેન પર કાળજું કંપાવી દેતો હુમલો! રાહત સામગ્રી લેવા આવેલા નાગરિકો પર બે વાર બોમ્બમારો, 40નાં મોત

મોસ્કો/કીવ: રશિયા અને યુક્રેન વચ્ચે ચાલી રહેલા ભીષણ યુદ્ધમાં વધુ એક હૃદયદ્રાવક ઘટના સામે આવી છે. યુક્રેનના જાપોરિજ્જિયા વિસ્તારમાં આવેલા કમિશુવાખા ગામમાં સોમવાર, 2 નવેમ્બરના રોજ રશિયન હવાઈ હુમલાએ ભારે તબાહી મચાવી હતી. રશિયન વાયુસેના દ્વારા એક બંધ સ્કૂલની ઇમારતને નિશાન બનાવીને કરવામાં આવેલા એરસ્ટ્રાઇકમાં 40 લોકોનાં મોત થયાનો દાવો કરવામાં આવ્યો છે, જ્યારે અનેક લોકો હજુ પણ લાપતા હોવાનું જાણવા મળ્યું છે. આ હુમલાને ચાલુ વર્ષ દરમિયાન યુક્રેનના નાગરિકો પર થયેલા સૌથી ઘાતક હુમલાઓમાંનો એક ગણાવવામાં આવી રહ્યો છે.

રાહત સામગ્રી લેવા આવેલા નાગરિકો પર બે વખત બોમ્બમારો

યુક્રેનના રાષ્ટ્રપતિ વોલોદિમીર ઝેલેન્સ્કીએ હુમલાની વિગતો આપતાં જણાવ્યું હતું કે, જે સ્કૂલ પર હુમલો કરવામાં આવ્યો તે યુદ્ધ ક્ષેત્રની નજીક હોવાથી લાંબા સમયથી બંધ હતી. જોકે, દર સોમવારે આ સ્થળે સ્થાનિક જરૂરિયાતમંદ નાગરિકોને રાહત સામગ્રીનું વિતરણ કરવામાં આવતું હતું. કેટલાક લોકો આ સ્થળનો આશ્રયસ્થાન તરીકે પણ ઉપયોગ કરતા હતા.

સોમવારે પણ મોટી સંખ્યામાં નાગરિકો રાહત સામગ્રી મેળવવા માટે અહીં એકઠા થયા હતા. તે દરમિયાન રશિયન સેનાએ સ્કૂલની ઇમારત પર હવાઈ હુમલો કર્યો હતો. સૌથી ચોંકાવનારી બાબત એ છે કે પ્રાથમિક હુમલા બાદ જ્યારે બચાવ કામગીરી શરૂ કરવામાં આવી ત્યારે રશિયન સેનાએ ફરી એકવાર એ જ સ્થળને નિશાન બનાવીને બીજો બોમ્બમારો કર્યો હોવાનો યુક્રેન દ્વારા આક્ષેપ કરવામાં આવ્યો છે.

બચાવ ટુકડીના બે સભ્યો અને ચાર પોલીસકર્મીઓનાં પણ મોત

યુક્રેનની ઇમરજન્સી સેવાઓના જણાવ્યા અનુસાર, આ હુમલામાં બચાવ ટુકડીના બે સભ્યો અને ચાર પોલીસકર્મીઓએ પણ જીવ ગુમાવ્યો છે. હુમલાને કારણે સ્કૂલની ઇમારત ધરાશાયી થતાં અનેક લોકો કાટમાળ નીચે દટાઈ ગયા હતા.

હુમલાના બે દિવસ બાદ પણ ઘટનાસ્થળે બચાવ કામગીરી ચાલુ રાખવામાં આવી હતી. ભારે મશીનરીની મદદથી કાટમાળ હટાવવામાં આવી રહ્યો છે. સૈનિકો અને રાહતકર્મીઓ હજુ પણ કોઈ વ્યક્તિ જીવિત મળી આવે તેવી આશા સાથે સતત શોધખોળ કરી રહ્યા છે. બચાવ કામગીરી દરમિયાન રશિયન ડ્રોનના સંભવિત ખતરાને ધ્યાનમાં રાખીને આકાશ પર પણ સતત નજર રાખવામાં આવી રહી છે.

રશિયાનો દાવો: યુક્રેનનાં સૈન્ય ઠેકાણાંને બનાવ્યાં નિશાન

આ હુમલા અંગે રશિયાના સંરક્ષણ મંત્રાલયે અલગ જ દાવો કર્યો છે. રશિયાના જણાવ્યા અનુસાર, તેની સેનાએ કમિશુવાખા અને આસપાસના વિસ્તારોમાં આવેલા યુક્રેનનાં સૈન્ય ઠેકાણાં પર ટાર્ગેટેડ હુમલો કર્યો હતો. આ કાર્યવાહીમાં યુક્રેનના 25 સૈનિકો માર્યા ગયા હોવાનો દાવો પણ કરવામાં આવ્યો છે.

બીજી તરફ, યુક્રેને રશિયાના આ દાવાને નકારી કાઢતાં આક્ષેપ કર્યો છે કે રશિયન સેનાએ જાણીજોઈને નિર્દોષ નાગરિકો અને રાહત વિતરણ કેન્દ્રને નિશાન બનાવ્યું હતું. આ ઘટનાને લઈને બંને દેશો વચ્ચે આરોપ-પ્રત્યારોપનો દોર શરૂ થયો છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ઇઝરાયલે હુમલાની આકરી નિંદા કરી

કમિશુવાખામાં થયેલા આ ભયાનક હુમલા અંગે ઇઝરાયલના વિદેશ મંત્રાલયે પણ ઊંડા દુઃખની લાગણી વ્યક્ત કરી છે. સોશિયલ મીડિયા પર સત્તાવાર નિવેદન જાહેર કરીને ઇઝરાયલે 40 લોકોનાં મોતની ઘટના અંગે શોક વ્યક્ત કર્યો હતો અને હુમલાની આકરા શબ્દોમાં નિંદા કરી હતી.

સાથે જ મૃતકોના પરિવારજનો પ્રત્યે સંવેદના વ્યક્ત કરી હતી અને ઇજાગ્રસ્તો ઝડપથી સાજા થાય તેવી પ્રાર્થના કરી હતી.

યુદ્ધની સૌથી મોટી કિંમત નિર્દોષ નાગરિકો ચૂકવી રહ્યા છે

રશિયા અને યુક્રેન વચ્ચે લાંબા સમયથી ચાલી રહેલા યુદ્ધમાં સૈન્ય ઠેકાણાં ઉપરાંત સામાન્ય નાગરિકોની સુરક્ષા પણ મોટો પ્રશ્ન બની રહી છે. કમિશુવાખાની આ ઘટના ફરી એકવાર દર્શાવે છે કે યુદ્ધની સૌથી ભયાનક અસર નિર્દોષ લોકો, બાળકો અને જરૂરિયાતમંદ પરિવારો પર પડે છે. રાહત સામગ્રી મેળવવા માટે એકઠા થયેલા લોકો પર થયેલા આ હુમલાએ સમગ્ર વિશ્વમાં માનવતાને લઈને ગંભીર સવાલો ઊભા કર્યા છે.

આ પણ વાંચો: અમદાવાદીઓ સાવધાન: રસ્તા પર ફરતા 15 વર્ષ જૂના વાહનો સીઝ થશે