Phone Data Can Be Stolen: ડિજિટલ યુગમાં સ્માર્ટફોન આપણી જિંદગીનો અભિન્ન હિસ્સો બની ગયો છે, પરંતુ તેની સુરક્ષાને લઈને એક ચિંતાજનક સમાચાર સામે આવ્યા છે. ભારત સરકારની નોડલ સાયબર સુરક્ષા એજન્સી, CERT-In (ઇન્ડિયન કમ્પ્યુટર ઇમરજન્સી રિસ્પોન્સ ટીમ) એ ક્વાલકોમ (Qualcomm) સ્નેપડ્રેગન ચિપસેટમાં એક અત્યંત ગંભીર સુરક્ષા ખામીની પુષ્ટિ કરી છે. આ ખામી એટલી જોખમી છે કે તે હેકર્સ માટે તમારા ઉપકરણની સંપૂર્ણ ઍક્સેસ મેળવવાનો માર્ગ મોકળો કરી શકે છે. સરકારે દેશના લાખો સ્માર્ટફોન યુઝર્સને તાત્કાલિક ધોરણે સાવધ રહેવા અને સુરક્ષાના પગલાં ભરવા આદેશ આપ્યો છે.

સ્માર્ટફોન યુઝર્સ સાયબર જોખમોના નિશાના પર

ભારતમાં હાલમાં લાખો એન્ડ્રોઇડ સ્માર્ટફોન યુઝર્સ સાયબર જોખમોના નિશાના પર છે. CERT-In ની એડવાઇઝરી મુજબ, ક્વાલકોમ ચિપસેટની આ નબળાઈ હેકર્સને ફોનમાં દૂર બેઠા ઘૂસણખોરી કરવાની, ખાનગી ડેટાની ચોરી કરવાની, એપ્લિકેશનોને ક્રૅશ કરવાની અને સમગ્ર સિસ્ટમ કંટ્રોલ પર કબજો મેળવવાની પરવાનગી આપે છે. આ જોખમ માત્ર મોંઘા કે ફ્લેગશિપ ફોન પૂરતું મર્યાદિત નથી, પરંતુ બજારમાં મળતા મિડ-રેન્જ અને બજેટ સ્માર્ટફોન્સ પણ તેની ચપેટમાં છે, જે આ બાબતને વધુ ગંભીર બનાવે છે.

સ્નેપડ્રેગન પ્રોસેસર્સમાં આ ખામી

CERT-In દ્વારા બહાર પાડવામાં આવેલી યાદી મુજબ, ક્વાલકોમના અનેક લોકપ્રિય સ્નેપડ્રેગન પ્રોસેસર્સમાં આ ખામી જોવા મળી છે. જેમાં સ્નેપડ્રેગન 8 જેન (Gen) સીરીઝ, 7 સીરીઝ, 6 સીરીઝ અને 4 જેન સીરીઝના પ્રોસેસર્સ સામેલ છે. આ ઉપરાંત, અગાઉના લોકપ્રિય પ્રોસેસર સ્નેપડ્રેગન 888 માં પણ આ ખામીની પુષ્ટિ થઈ છે. ટેકનિકલ ભાષામાં સમજીએ તો, સાયબર અપરાધીઓ ‘રિમોટ કોડ એક્ઝિક્યુશન’ અને ‘મેમરી કરપ્શન’ જેવી પદ્ધતિઓનો ઉપયોગ કરીને સિસ્ટમમાં ઘૂસી શકે છે. આનો અર્થ એ છે કે હેકર દુનિયાના કોઈપણ ખૂણે બેસીને તમારા ફોનની અંદરના સંવેદનશીલ ડેટા સુધી પહોંચી શકે છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સુરક્ષા ખામીના પરિણામો અત્યંત ભયાનક હોઈ શકે

આ સુરક્ષા ખામીના પરિણામો અત્યંત ભયાનક હોઈ શકે છે. રિપોર્ટ અનુસાર, હેકર્સ આ નબળાઈનો લાભ ઉઠાવીને ફોનમાં રહેલી બેંકિંગ વિગતો, ખાનગી ફોટા, પાસવર્ડ અને અન્ય મહત્વપૂર્ણ દસ્તાવેજો ચોરી શકે છે. આ સમસ્યા મુખ્યત્વે મેમરી કરપ્શન, બફર ઓવરફ્લો અને ઇનપુટ વેલિડેશન જેવી ટેકનિકલ ક્ષતિઓને કારણે ઉભી થઈ છે. ચિંતાજનક બાબત એ છે કે આ જોખમ માત્ર સ્માર્ટફોન પૂરતું સીમિત નથી; તે ટેબલેટ, વાયરલેસ ડિવાઇસ, નેટવર્કિંગ પ્રોડક્ટ્સ અને આધુનિક કારોમાં વપરાતી ઓટોમોટિવ સિસ્ટમ્સ (IoT ડિવાઇસ) ને પણ અસર કરી શકે છે.

તાત્કાલિક ‘સિક્યુરીટી અપડેટ્સ’ ઇન્સ્ટોલ કરવાની સલાહ

પોતાના ડિવાઇસને સુરક્ષિત રાખવા માટે CERT-In એ યુઝર્સને તાત્કાલિક ‘સિક્યુરીટી અપડેટ્સ’ ઇન્સ્ટોલ કરવાની સલાહ આપી છે. સ્માર્ટફોન ઉત્પાદક કંપનીઓ હાલમાં આ ખામીને સુધારવા માટે સોફ્ટવેર પેચ રિલીઝ કરી રહી છે. યુઝર્સે પોતાના ફોનના સેટિંગ્સમાં જઈને ‘સોફ્ટવેર અપડેટ’ ચેક કરવું જોઈએ અને જો કોઈ અપડેટ ઉપલબ્ધ હોય તો તેને તરત ડાઉનલોડ કરવું જોઈએ. આ ઉપરાંત, કોઈ પણ અજાણી વેબસાઇટ કે થર્ડ-પાર્ટી સોર્સ પરથી એપ્લિકેશન્સ ડાઉનલોડ કરવાનું ટાળવું જોઈએ, કારણ કે આવી એપ્સ વાયરસ અથવા માલવેર ફેલાવવાનું માધ્યમ બની શકે છે.

જૂના સ્માર્ટફોન્સ સૌથી વધુ જોખમમાં

સાયબર એક્સપર્ટ્સનું માનવું છે કે જૂના સ્માર્ટફોન્સ, જેમાં કંપનીઓ દ્વારા સિક્યુરીટી અપડેટ્સ આપવાનું બંધ કરી દેવામાં આવ્યું છે, તે સૌથી વધુ જોખમમાં છે. જો તમારો ફોન અચાનક ધીમો પડી જાય, એપ્સ આપમેળે બંધ થઈ જાય અથવા બેટરી અસામાન્ય રીતે ઝડપથી સમાપ્ત થવા લાગે, તો સાવધ થઈ જવું જોઈએ. આ લક્ષણો સાયબર હુમલાના હોઈ શકે છે. વર્તમાન સમયમાં સાયબર સુરક્ષા પ્રત્યેની જાગૃતિ જ તમને મોટા નાણાકીય કે વ્યક્તિગત નુકસાનથી બચાવી શકે છે.

આ પણ વાંચો: પ્રેમનો વિજય: હાઈકોર્ટના કડક વલણ બાદ અમદાવાદમાં હાઈ-વોલ્ટેજ ડ્રામા વચ્ચે આંતરધર્મીય લગ્ન સંપન્ન