વૈભવ સૂર્યવંશીના અંડર-19 રમવા પર WV રમણ નારાજ, કહ્યું- “આનાથી તેના વિકાસમાં અવરોધ આવશે”

નવી દિલ્હીઃ 16 જાન્યુઆરી, 2026: ભારતીય ક્રિકેટના ઉભરતા સિતારા વૈભવ સૂર્યવંશીએ નાની ઉંમરમાં જ મોટી સિદ્ધિઓ હાંસલ કરી લીધી છે. હાલમાં તે ICC મેન્સ અંડર-19 વર્લ્ડ કપ 2026માં ભારતનું પ્રતિનિધિત્વ કરી રહ્યો છે. જોકે, તેની પ્રતિભાને જોતા પૂર્વ કોચ WV રમણે એક મહત્વનું નિવેદન આપીને ચર્ચા જગાવી છે.

શું છે WV રમણની ચિંતા?

ભારતીય મહિલા ટીમના પૂર્વ કોચ WV રમણે સોશિયલ મીડિયા પ્લેટફોર્મ ‘X’ પર ચિંતા વ્યક્ત કરતા લખ્યું કે, “વૈભવ સૂર્યવંશીએ ઈન્ડિયા-એ અને IPL જેવી મોટી ટૂર્નામેન્ટમાં શાનદાર પ્રદર્શન કર્યું છે. તેને ફરીથી અંડર-19 લેવલ પર રમાડવો એ તેના વિકાસ માટે નુકસાનકારક સાબિત થઈ શકે છે. તે મેચ જીતાડી શકે છે તેમાં કોઈ શંકા નથી, પરંતુ આપણે હંમેશા મોટા લક્ષ્ય પર ધ્યાન આપવું જોઈએ.” તેમનું માનવું છે કે જે ખેલાડી ઉચ્ચ સ્તરે રમી ચૂક્યો હોય, તેને નીચેના સ્તરે પાછા લાવવાથી તેની પ્રગતિ ધીમી પડી શકે છે.

IPLમાં મચાવી હતી ધૂમ

વૈભવ સૂર્યવંશીએ ગત વર્ષે રાજસ્થાન રોયલ્સ તરફથી IPLમાં ડેબ્યૂ કર્યું હતું. તેણે ગુજરાત ટાઇટન્સ સામે માત્ર 35 બોલમાં સદી ફટકારીને સૌને ચોંકાવી દીધા હતા. ત્યારબાદ તેણે ઓસ્ટ્રેલિયા અને ઇંગ્લેન્ડ પ્રવાસ પર પણ રનનો પહાડ સર્જ્યો હતો. તેની આક્રમક બેટિંગને કારણે જ તેને રાઇઝિંગ સ્ટાર્સ એશિયા કપ 2025 માટે ઇન્ડિયા-એ ટીમમાં સ્થાન મળ્યું હતું.

અમેરિકા સામેનું પ્રદર્શન અને ભારતની જીત અંડર-19 વર્લ્ડ કપની પ્રથમ મેચમાં યુએસએ સામે વૈભવનું બેટ શાંત રહ્યું હતું અને તે માત્ર 2 રન બનાવી આઉટ થયો હતો. જોકે, વોર્મ-અપ મેચમાં તેણે સ્કોટલેન્ડ સામે 50 બોલમાં 96 રન ફટકાર્યા હતા.

યુએસએ સામેની મેચની વાત કરીએ તો, હેનિલ પટેલે તરખાટ મચાવતા 5 વિકેટ ઝડપી હતી, જેના કારણે યુએસએ 107 રનમાં ઓલઆઉટ થયું હતું. ભારતે અભિજ્ઞાન કુંડુ અને કનિષ્ક ચૌહાણની મદદથી આ મેચ આસાનીથી 6 વિકેટે જીતી લીધી હતી.

હવે પછીની મેચ

ભારતીય ટીમ હવે શનિવારે બાંગ્લાદેશ સામે ટકરાશે અને ત્યારબાદ 24 જાન્યુઆરીએ ન્યૂઝીલેન્ડ સામે ગ્રુપ સ્ટેજની છેલ્લી મેચ રમશે.