Vadodara: અંબિકા એપાર્ટમેન્ટની બાલ્કની ધરાશાયી 6 પરિવારો ઘરમાં ફસાયા

Dipti Solanki વડોદરાLast Updated: માર્ચ 16, 2026

1 minute read

Vadodara News: વડોદરા શહેરના વાઘોડિયા રોડ વિસ્તારમાં આજે એક રહેણાંક એપાર્ટમેન્ટની બાલ્કની અચાનક ધરાશાયી થવાની ઘટના બનતા સમગ્ર વિસ્તારમાં અફરાતફરી મચી ગઈ હતી. અંબિકા એપાર્ટમેન્ટમાં બનેલી આ દુર્ઘટનાને પગલે બિલ્ડિંગમાં રહેતા લોકોમાં ભારે ભય અને ફફડાટ વ્યાપી ગયો હતો. બાલ્કનીનો ભાગ નીચે પડવાને કારણે અવરોધ સર્જાતા એપાર્ટમેન્ટમાં રહેતા 6 પરિવારો પોતાના ઘરમાં જ કેદ થઈ ગયા હતા, જેમને ફાયર બ્રિગેડની ટીમે ભારે જહેમત બાદ સલામત રીતે બહાર કાઢ્યા હતા.

અચાનક ધડાકા સાથે બાલ્કની પડી

મળતી વિગતો અનુસાર, વાઘોડિયા રોડ પર આવેલા અંબિકા એપાર્ટમેન્ટનો ઉપરના માળનો બાલ્કનીનો હિસ્સો અચાનક ધડાકાભેર તૂટી પડ્યો હતો. બાલ્કનીનો કાટમાળ પેસેજ અને નીચેના ભાગમાં પડવાને કારણે અવરજવરનો રસ્તો બંધ થઈ ગયો હતો. આ સમયે ઉપરના માળે રહેતા આશરે 6 પરિવારોના સભ્યો બહાર નીકળી શકે તેમ ન હોવાથી પોતાના ઘરમાં જ ફસાઈ ગયા હતા. ઘટનાને પગલે આસપાસના લોકો દોડી આવ્યા હતા અને તાત્કાલિક ફાયર બ્રિગેડને જાણ કરી હતી.

ફાયર બ્રિગેડની સમયસૂચકતા

ઘટનાની ગંભીરતાને જોઈ વડોદરા ફાયર બ્રિગેડની ટીમ તાત્કાલિક ઘટનાસ્થળે પહોંચી હતી. ફાયરના જવાનોએ યુદ્ધના ધોરણે બચાવ કામગીરી હાથ ધરી હતી. સીડીઓ અને અત્યાધુનિક રેસ્ક્યુ સાધનોની મદદથી ઘરમાં ફસાયેલા તમામ સભ્યોને, જેમાં બાળકો અને વૃદ્ધોનો પણ સમાવેશ થતો હતો, તેમને એક પછી એક સુરક્ષિત રીતે નીચે ઉતાર્યા હતા. સદનસીબે, બાલ્કની જ્યારે ધરાશાયી થઈ ત્યારે તેની નીચે કોઈ વ્યક્તિ હાજર ન હોવાથી એક મોટી જાનહાનિ ટળી હતી.

રહેવાસીઓમાં ભયનો માહોલ

આ ઘટનાને પગલે એપાર્ટમેન્ટના અન્ય રહેવાસીઓ પણ સુરક્ષાના કારણોસર ઘરની બહાર દોડી આવ્યા હતા. બિલ્ડિંગના જર્જરિત બાંધકામને કારણે આ દુર્ઘટના સર્જાઈ હોવાનું પ્રાથમિક દ્રષ્ટિએ જણાઈ રહ્યું છે. હાલમાં ફાયર બ્રિગેડ દ્વારા બાકી રહેલા જોખમી હિસ્સાને દૂર કરવાની અને કાટમાળ હટાવવાની કામગીરી ચાલુ છે. મહાનગરપાલિકા દ્વારા આ બિલ્ડિંગના સ્ટ્રક્ચરની તપાસ કરવામાં આવે તેવી માંગ પણ ઉઠી છે.