હોર્મુઝ જળમાર્ગ મુદ્દે અમેરિકા-ઈરાન તણાવ વધ્યો, ઓમાનને ટ્રમ્પની કડક ચેતવણી

Hormuz waterway issue: અમેરિકા અને ઈરાન વચ્ચે હોર્મુઝ જળમાર્ગને લઈને તણાવ વધુ વધી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પ અને ટ્રેઝરી સચિવ સ્કોટ બેસેન્ટે ઓમાનને ચેતવણી આપી છે કે જો તે ઈરાન સાથે મળીને હોર્મુઝ જળમાર્ગમાં ટોલ સિસ્ટમ લાગુ કરવામાં મદદ કરશે તો અમેરિકા કડક કાર્યવાહી કરશે.
અમેરિકાના ટ્રેઝરી સચિવ સ્કોટ બેસેન્ટે સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે અમેરિકા હોર્મુઝ જળમાર્ગમાં કોઈપણ પ્રકારની ટોલ વસૂલાતને સહન નહીં કરે. તેમણે ખાસ કરીને ઓમાનનું નામ લઈને કહ્યું કે જે કોઈપણ વ્યક્તિ અથવા સંસ્થા સીધી કે પરોક્ષ રીતે આ યોજનામાં સામેલ હશે તેના સામે અમેરિકી ટ્રેઝરી આક્રમક કાર્યવાહી કરશે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
બેસેન્ટે ઈરાન પર વૈશ્વિક સમુદ્રી વેપારને ખોરવવાનો આરોપ લગાવતા કહ્યું કે તેહરાન હવે દુનિયાને ડરાવવાની નીતિ છોડે. તેમણે તમામ દેશોને ઈરાન દ્વારા વૈશ્વિક વેપારના મુક્ત પ્રવાહમાં વિક્ષેપ લાવવાના પ્રયાસોનો વિરોધ કરવા અપીલ કરી.
આ નિવેદન પહેલા ડોનાલ્ડ ટ્રમ્પે પણ ઓમાનને કડક શબ્દોમાં ચેતવણી આપી હતી. કેમ્પ ડેવિડ ખાતે પત્રકારો સાથે વાતચીત દરમિયાન ટ્રમ્પે કહ્યું હતું કે ઓમાનને અન્ય દેશોની જેમ વર્તવું પડશે, નહીં તો ગંભીર પરિણામોનો સામનો કરવો પડશે.
હોર્મુઝ જળમાર્ગ વિશ્વ માટે અત્યંત મહત્વપૂર્ણ છે કારણ કે વિશ્વના મોટા ભાગનું તેલ અને ગેસ આ જળમાર્ગ મારફતે પસાર થાય છે. આ કારણે અહીં વધતો તણાવ વૈશ્વિક ઊર્જા બજાર અને આંતરરાષ્ટ્રીય વેપાર માટે ચિંતાનો વિષય બની ગયો છે.
ઈરાનના વિદેશ મંત્રાલયના પ્રવક્તા ઇસ્માઈલ બાઘાઈએ જણાવ્યું હતું કે ઈરાન અને ઓમાન મળીને જહાજોની સુરક્ષિત અવરજવર માટે નવી વ્યવસ્થા વિકસાવી રહ્યા છે. તેમણે આ પગલાને જવાબદાર પહેલ ગણાવી અને કહ્યું કે સમુદ્રી સુરક્ષા અને પર્યાવરણ સંરક્ષણ માટે કેટલીક ફી વસૂલવી સ્વાભાવિક બાબત છે.
આ વચ્ચે ઈરાને “પર્શિયન ગલ્ફ સ્ટ્રેટ ઓથોરિટી” (PGSA) નામની નવી સંસ્થા શરૂ કરી છે. આ સંસ્થા હોર્મુઝ જળમાર્ગમાં જહાજોની અવરજવરનું સંચાલન અને મોનિટરિંગ કરશે. જોકે અમેરિકાએ આ સંસ્થા પર પ્રતિબંધો લગાવ્યા છે અને આરોપ લગાવ્યો છે કે PGSA અને ઈસ્લામિક રેવોલ્યુશનરી ગાર્ડ કોર્પ્સ (IRGC) મળીને આંતરરાષ્ટ્રીય જહાજો પાસેથી ગેરકાયદેસર ટોલ વસૂલવાની યોજના બનાવી રહ્યા છે.
વિશ્વભરના દેશો હવે હોર્મુઝ જળમાર્ગમાં વધતા આ તણાવ પર નજીકથી નજર રાખી રહ્યા છે કારણ કે અહીંનો કોઈપણ વિવાદ વૈશ્વિક અર્થતંત્ર અને તેલના ભાવ પર સીધી અસર કરી શકે છે.
આ પણ વાંચો : Shimla Travel Guide: જૂન મહિનામાં કરો શિમલાની સફર, પરિવાર સાથે અદ્ભૂત સમય વિતાવો












