TRAI New Rules 2026: મોબાઇલ રિચાર્જ કરાવતા પહેલાં હવે ગ્રાહકો માટે પોતાની જરૂરિયાત પ્રમાણે પ્લાન પસંદ કરવાનું વધુ સરળ બની શકે છે. ખાસ કરીને જે લોકો પોતાના મોબાઇલ ફોનનો ઉપયોગ મુખ્યત્વે કોલિંગ અને SMS માટે કરે છે અને જેમને મોબાઇલ ડેટરની ખાસ જરૂર પડતી નથી, તેમના માટે ટેલિકોમ કંપનીઓને અલગ અને વધુ યોગ્ય કિંમતવાળા રિચાર્જ પ્લાન ઉપલબ્ધ કરાવવા પડશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) દ્વારા Telecom Consumer Protection (13th Amendment) Regulations, 2026 જાહેર કરવામાં આવ્યા છે. નવા નિયમો હેઠળ ટેલિકોમ કંપનીઓએ Voice અને SMS-only Special Tariff Voucher (STV) ઉપલબ્ધ કરાવવાના રહેશે.

આ નિયમો ખાસ કરીને એવા ગ્રાહકો માટે મહત્વપૂર્ણ બની શકે છે, જેમને ઇન્ટરનેટ ડેટાની જરૂર નથી પરંતુ માત્ર ફોન કોલ અને SMS માટે મોબાઇલ રિચાર્જ કરાવવો પડે છે.

હવે માત્ર કોલ અને SMS માટે અલગ રિચાર્જ મળશે

TRAIના નવા નિયમો અનુસાર ટેલિકોમ કંપનીઓએ Voice અને SMS-only Special Tariff Voucher ઉપલબ્ધ કરાવવાના રહેશે. હાલમાં ઘણા રિચાર્જ પ્લાનમાં કોલિંગ અને SMSની સાથે ડેટા પણ સામેલ હોય છે. પરંતુ જે ગ્રાહકોને મોબાઇલ ડેટાની જરૂર નથી, તેમના માટે ડેટા સહિતનો મોંઘો પ્લાન લેવો જરૂરી ન બને તે માટે અલગ વિકલ્પ ઉપલબ્ધ કરાવવાનો નિયમ કરવામાં આવ્યો છે. આ Voice-SMS-only પ્લાનની કિંમત પણ ડેટા ધરાવતા પ્લાનની સરખામણીએ યોગ્ય રીતે ઓછી રાખવાની રહેશે.

30 દિવસ કે તેનાથી ઓછી વેલિડિટીવાળા પ્લાન માટે પણ વિકલ્પ

નવા નિયમોમાં માત્ર લાંબી વેલિડિટીના પ્લાન જ નહીં, પરંતુ 30 દિવસ અથવા તેનાથી ઓછી વેલિડિટી ધરાવતા STV માટે પણ Voice-SMS-only વિકલ્પ ઉપલબ્ધ કરાવવાની વ્યવસ્થા કરવામાં આવી છે. આનો ફાયદો એવા ગ્રાહકોને થઈ શકે છે, જેઓ લાંબી વેલિડિટીવાળો રિચાર્જ કરાવવા માંગતા નથી અને ઓછા સમય માટે સસ્તો પ્લાન પસંદ કરવા માંગે છે. અર્થાત, ગ્રાહકો પોતાની જરૂરિયાત પ્રમાણે ઓછા સમય માટે પણ માત્ર કોલ અને SMSની સુવિધા ધરાવતો પ્લાન પસંદ કરી શકશે.

દર મહિને એક જ તારીખે થશે રિચાર્જનું રિન્યુઅલ

TRAIએ માસિક રિચાર્જ કરાવતા ગ્રાહકો માટે પણ ખાસ વ્યવસ્થા કરી છે. ટેલિકોમ કંપનીઓએ એવો વિકલ્પ ઉપલબ્ધ કરાવવાનો રહેશે જેમાં પ્લાન દર મહિને એક જ તારીખે રિન્યૂ થઈ શકે.

આ પણ વાંચોઃ Amazon, Swiggy Instamart સહિત 5 પ્લેટફોર્મ પર FSSAIની મોટી કાર્યવાહી

ઉદાહરણ તરીકે, જો કોઈ ગ્રાહક દર મહિને 15 તારીખે રિચાર્જ રિન્યૂ કરાવે છે, તો પ્લાનને દર મહિને 15 તારીખે જ રિન્યૂ કરવાની વ્યવસ્થા હોવી જોઈએ. જો કોઈ મહિને એ તારીખ કેલેન્ડરમાં ઉપલબ્ધ ન હોય, તો તે મહિનાની છેલ્લી તારીખે રિન્યૂઅલ કરવામાં આવશે.

30 દિવસથી વધુ વેલિડિટીના STVમાં પણ મળશે વિકલ્પ

TRAIના નવા નિયમો માત્ર 30 દિવસ કે તેનાથી ઓછી વેલિડિટી ધરાવતા પ્લાન પૂરતા મર્યાદિત નથી. 30 દિવસથી વધુ વેલિડિટી ધરાવતા Special Tariff Voucherમાં પણ ઓછામાં ઓછો એક Voice-SMS-only વિકલ્પ ઉપલબ્ધ કરાવવો પડશે. આનાથી લાંબી વેલિડિટીવાળો રિચાર્જ ઇચ્છતા પરંતુ મોબાઇલ ડેટાની જરૂર ન હોય તેવા ગ્રાહકોને પણ ડેટા વગરનો વિકલ્પ મળી શકશે.

TRAIએ શા માટે કર્યા નવા નિયમોમાં ફેરફાર?

TRAIના જણાવ્યા અનુસાર બજારમાં અગાઉથી કેટલાક Voice-SMS-only પ્લાન ઉપલબ્ધ હતા, પરંતુ આવા પ્લાનની સંખ્યા મર્યાદિત હતી. આ ઉપરાંત ઉપલબ્ધ વિકલ્પોમાં મોટા ભાગના પ્લાન લાંબી વેલિડિટી ધરાવતા હતા. તેના કારણે ખાસ કરીને ઓછી આવક ધરાવતા ગ્રાહકો માટે ઓછા સમયગાળાનો સસ્તો Voice-SMS-only રિચાર્જ પસંદ કરવાના વિકલ્પો મર્યાદિત હતા. નવા નિયમોનો હેતુ ગ્રાહકોને તેમની જરૂરિયાત અને બજેટ પ્રમાણે ટેલિકોમ પ્લાન પસંદ કરવાનો વધુ વિકલ્પ આપવાનો છે.

એપ્રિલ 2026માં આવ્યો હતો ડ્રાફ્ટ

આ નિયમો લાગુ કરતા પહેલાં TRAIએ એપ્રિલ 2026માં પ્રસ્તાવિત નિયમોનો ડ્રાફ્ટ જાહેર કર્યો હતો. આ ડ્રાફ્ટ અંગે ટેલિકોમ કંપનીઓ અને અન્ય સંબંધિત પક્ષકારો પાસેથી સૂચનો અને પ્રતિસાદ મંગાવવામાં આવ્યા હતા. આ પ્રક્રિયા દરમિયાન TRAIને કુલ 1,132 સૂચનો અને પ્રતિભાવો મળ્યા હતા.

ત્યારબાદ 15 જૂન 2026ના રોજ Open House Discussionનું પણ આયોજન કરવામાં આવ્યું હતું. આ ચર્ચા અને મળેલા પ્રતિસાદોને ધ્યાનમાં લીધા બાદ હવે TRAI દ્વારા નવા નિયમો જાહેર કરવામાં આવ્યા છે.

કોને થશે સૌથી વધુ ફાયદો?

TRAIના આ નવા નિયમો ખાસ કરીને એવા મોબાઇલ ગ્રાહકો માટે ઉપયોગી બની શકે છે, જેમને સ્માર્ટફોન હોવા છતાં મોબાઇલ ડેટરની જરૂર ઓછી હોય છે.

ઉદાહરણ તરીકે, કોઈ વ્યક્તિ મોબાઇલનો ઉપયોગ મુખ્યત્વે ફોન કોલ, SMS અથવા બેંકિંગ સંબંધિત SMS માટે કરતી હોય અને ઇન્ટરનેટ માટે Wi-Fiનો ઉપયોગ કરતી હોય, તો તેને ડેટા સહિતનો મોંઘો રિચાર્જ લેવાની જરૂરિયાત ઓછી થઈ શકે છે.

હવે આવા ગ્રાહકો માટે તેમની જરૂરિયાત મુજબ Voice અને SMS-only રિચાર્જનો વિકલ્પ ઉપલબ્ધ કરાવવાનો માર્ગ TRAIએ નક્કી કર્યો છે.

ગ્રાહકો માટે શું બદલાશે?

સરળ ભાષામાં સમજીએ તો TRAIના નવા નિયમો બાદ ગ્રાહકો માટે રિચાર્જ પસંદ કરવાની પ્રક્રિયા વધુ જરૂરિયાત આધારિત બની શકે છે. માત્ર કોલ અને SMS જોઈએ તો Voice-SMS-only પ્લાન, જ્યારે ઇન્ટરનેટની જરૂર હોય તો ડેટા સહિતનો પ્લાન પસંદ કરી શકાશે.

આ રીતે જે ગ્રાહકોને ડેટાની જરૂર નથી, તેઓ અનાવશ્યક ડેટા માટે ચૂકવણી કર્યા વિના પોતાની જરૂરિયાત મુજબનો રિચાર્જ વિકલ્પ પસંદ કરી શકશે.

આ પણ વાંચોઃ Apple યુઝર્સ માટે મોટો સાયબર ખતરો, તાત્કાલિક સોફ્ટવેર અપડેટ કરવાની સરકારની સલાહ