ટ્રેન્ડિંગનેશનલમીડિયા

તાહિર હુસૈન દોષિત જાહેર, અંકિત શર્મા હત્યા કેસમાં છ આરોપીઓ નિર્દોષ છૂટ્યા

Tahir Hussain Convicted : કોર્ટે પાંચેય આરોપીઓને ભારતીય દંડ સંહિતાની કલમ 302 (હત્યા), 149 (ગેરકાયદેસર ટોળાનો ગુનો), 148 (ઘાતક હથિયાર સાથે રમખાણ), 147 (રમખાણ), 188 (સરકારી આદેશનો ભંગ) અને 365 (અપહરણ) હેઠળ દોષિત જાહેર કર્યા છે. સજાની જાહેરાત અંગે કોર્ટ બંને પક્ષોની દલીલો સાંભળ્યા બાદ અલગથી નિર્ણય કરશે.

ચુકાદા બાદ તાહિર હુસૈન ભાવુક બન્યા

ચુકાદો સંભળાયા બાદ તાહિર હુસૈન કોર્ટરૂમમાં ભાવુક થઈ ગયા હતા. તેમણે પોતાને નિર્દોષ ગણાવતા કહ્યું કે, “હું બેકસૂર છું, મારી સાથે ન્યાય થયો નથી.”

છ આરોપીઓને કેમ મળી રાહત?

કોર્ટે મુન્તઝિર ઉર્ફે મૂસા, શોએબ આલમ, હસીન, સમીર, ગુલફામ અને ફિરોઝને પુરાવાના અભાવે નિર્દોષ જાહેર કર્યા છે. કોર્ટે જણાવ્યું કે તેમની વિરુદ્ધ પૂરતા અને વિશ્વસનીય પુરાવા રજૂ ન થતાં તેમને દોષિત ઠેરવી શકાય નહીં.

અંકિત શર્માની હત્યા કેવી રીતે થઈ હતી?

25 ફેબ્રુઆરી, 2020ના રોજ CAA વિરોધ પ્રદર્શન દરમિયાન ઉત્તર-પૂર્વ દિલ્હીના ચાંદ બાગ વિસ્તારમાં IBના સિક્યોરિટી આસિસ્ટન્ટ અંકિત શર્માની હત્યા કરવામાં આવી હતી. બીજા દિવસે તેમનો મૃતદેહ નજીકના નાળામાંથી મળી આવ્યો હતો. ત્યારબાદ તેમના પિતા રવિન્દ્ર કુમારે દયાલપુર પોલીસ સ્ટેશનમાં ફરિયાદ નોંધાવી હતી.

648 પાનાની ચાર્જશીટ દાખલ કરવામાં આવી હતી

આ કેસની તપાસ દિલ્હી પોલીસની ક્રાઇમ બ્રાંચે હાથ ધરી હતી. તપાસ દરમિયાન તાહિર હુસૈન સહિત કુલ 11 આરોપીઓની ધરપકડ કરવામાં આવી હતી. પોલીસે 3 જૂન, 2020ના રોજ 648 પાનાની મુખ્ય ચાર્જશીટ દાખલ કરી હતી અને ત્યારબાદ તપાસ દરમિયાન વધુ છ પૂરક ચાર્જશીટ પણ કોર્ટમાં રજૂ કરવામાં આવી હતી.

દિલ્હી પોલીસનું નિવેદન

દિલ્હી પોલીસ કમિશનર સતીશ ગોલછાએ જણાવ્યું કે તપાસ દરમિયાન કાયદો અને વ્યવસ્થા જાળવી રાખવાની સાથે નિષ્પક્ષ અને પુરાવા આધારિત તપાસ કરવામાં આવી હતી. તેમણે કહ્યું કે કોર્ટના ચુકાદાથી તપાસ ટીમની મહેનત અને વ્યાવસાયિક કાર્યપદ્ધતિને માન્યતા મળી છે અને રમખાણોમાં સામેલ તમામ જવાબદાર લોકોને કાયદા મુજબ સજા અપાવવા માટે પોલીસ પ્રતિબદ્ધ છે.

Back to top button