Surat Child Abuse Case: સુરતના ચોકબજાર વિસ્તારમાં વર્ષ 2024માં બનેલી એક અત્યંત કમકમાટીભરી અને હૃદયદ્રાવક ઘટનામાં ન્યાયાલયે ઐતિહાસિક અને કડક ચુકાદો સંભળાવ્યો છે. 4 વર્ષની નિર્દોષ માસૂમ બાળકીને ચોકલેટની લાલચ આપી અપહરણ કર્યા બાદ તેના પર બર્બરતાપૂર્વક પાશવી દુષ્કર્મ આચરવાના ગુનામાં કૉર્ટે આરોપી અંકિત ગૌતમને તકસીરવાન ઠેરવીને ‘અંતિમ શ્વાસ સુધીની આજીવન કેદ’ની આકરી સજા ફટકારી છે. આ સાથે જ સ્પેશિયલ કોર્ટે નરાધમ આરોપીને રૂપિયા 60 હજારનો દંડ અને પીડિત માસૂમ બાળકીના પુનર્વસન માટે રૂપિયા 10 લાખનું વળતર ચૂકવવાનો સ્પષ્ટ આદેશ કર્યો છે. કૉર્ટના આ આકરા અને કડક વલણથી સમાજમાં એક મજબૂત સંદેશ ગયો છે કે માસૂમ બાળકો પર અત્યાચાર ગુજારનારા નરાધમોને કાયદાના શિકંજામાંથી કોઈ પણ સંજોગોમાં બક્ષવામાં આવશે નહીં.

ચોકલેટની લાલચ આપી માસૂમનું અપહરણ કરાયું હતું

આ હૃદય કંપાવી દેનારી ઘટનાની વિગતો અનુસાર, વર્ષ 2024ની એક રાત્રે સાડા આઠ વાગ્યાના અરસામાં સુરતના પંડોળ વિસ્તારમાં રહેતી એક ચાર વર્ષની બાળકી પોતાના ઘરની બહાર નિર્દોષભાવે રમી રહી હતી. તે જ સમયે ત્યાંથી પસાર થઈ રહેલો ૨૭ વર્ષીય વિકૃત અંકિત ઓમપ્રકાશ ગૌતમ ત્યાં આવી પહોંચ્યો હતો. તેણે બાળકીની માસૂમિયતનો લાભ ઉઠાવી, તેને ચોકલેટ આપવાની લાલચ આપીને ચૂપચાપ ત્યાંથી અપહરણ કરી લીધું હતું. મોડી રાત સુધી બાળકી ઘરે પરત ન ફરતા અને આસપાસ ક્યાંય ન દેખાતા પરિવારજનો ભારે ચિંતામાં મુકાયા હતા. પરિવારે બાળકીની શોધખોળ શરૂ કરી પરંતુ તેનો કોઈ પત્તો ન મળતા આખરે પોલીસનો સંપર્ક કરવામાં આવ્યો હતો.

લોહીલુહાણ હાલતમાં માસૂમ મળી આવી

બાળકીનું અપહરણ કર્યા બાદ નરાધમ અંકિત તેને એકાંત સ્થળે લઈ ગયો હતો અને તેના પર રાક્ષસી રીતે બર્બર અત્યાચાર ગુજાર્યો હતો. રાત્રે આશરે 11 વાગ્યાની આસપાસ વેડરોડ પર આવેલી અખંડ આનંદ કોલેજ નજીક રસ્તા પરથી આ માસૂમ બાળકી અત્યંત લાચાર અને દયનીય સ્થિતિમાં મળી આવી હતી. બાળકી સંપૂર્ણપણે નગ્ન અને તેના ગુપ્ત ભાગોમાંથી અતિશય રક્તસ્ત્રાવ થઈ રહ્યો હતો. લોહીલુહાણ અવસ્થામાં પીડાથી કણસતી બાળકીને જોઈને સમગ્ર વિસ્તારના લોકોમાં ભારે આક્રોશ અને અરેરાટી વ્યાપી ગઈ હતી. ઘટનાની ગંભીરતાને જોઈને તાત્કાલિક ચોકબજાર પોલીસને જાણ કરવામાં આવી હતી. પોલીસે બિલકુલ સમય બગાડ્યા વિના પીડિત બાળકીને સારવાર માટે હોસ્પિટલ ખસેડીને અજાણ્યા શખ્સ વિરૂદ્ધ ગુનો નોંધી તપાસના ચક્રો ગતિમાન કર્યા હતા.

SITની સરાહનીય કામગીરી

ઘટનાની સંવેદનશીલતાને ધ્યાનમાં રાખીને તત્કાલીન પોલીસ ઈન્સ્પેક્ટર વિશાલ વાગડીયા અને તેમની ટીમે તાત્કાલિક એક ખાસ તપાસ સમિતિની રચના કરી હતી. પોલીસે આસપાસના તમામ સીસીટીવી કેમેરાના ફૂટેજ બારીકાઈથી તપાસવાનું શરૂ કર્યું હતું. ફૂટેજની આકરી તપાસ દરમિયાન એક શંકાસ્પદ યુવક પીળું ટીશર્ટ, કાળું પેન્ટ અને માથા પર ટોપી પહેરીને બાળકીને ઉપાડી જતો સ્પષ્ટ નજરે પડ્યો હતો. આ મહત્વની કડી મળતા જ પોલીસે પંડોળ વિસ્તારમાં સઘન કોમ્બિંગ હાથ ધરીને ગણતરીના કલાકોમાં જ હવસખોર આરોપી અંકિત ઓમપ્રકાશ ગૌતમને ઝડપી લીધો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સાયન્ટિફિક પુરાવો

આરોપીને કૉર્ટમાં કડક સજા અપાવવા માટે પોલીસે પરંપરાગત પુરાવાઓની સાથે આધુનિક સાયન્ટિફિક ટેક્નોલોજીનો આશરો લીધો હતો. સીસીટીવીમાં દેખાતો વ્યક્તિ જ પકડાયેલો આરોપી અંકિત છે તે વૈજ્ઞાનિક રીતે સાબિત કરવા માટે ગાંધીનગર FSLની મદદથી ‘ફેસ અને ગેટ એનાલિસિસ ટેસ્ટ’ કરાવવામાં આવ્યો હતો.

ગેટ એનાલિસિસ ટેસ્ટ એટલે શું?

ગેટ એનાલિસિસ એ વ્યક્તિના ચાલવાની પદ્ધતિ, શારીરિક હલનચલન અને હાવભાવનું ડિજિટલ અને વૈજ્ઞાનિક વિશ્લેષણ કરતી અદ્યતન ટેકનિક છે. દરેક માણસની ચાલવાની શૈલી અનન્ય (unique) હોય છે. આ ટેસ્ટના પોઝિટિવ રિપોર્ટે કૉર્ટમાં આરોપીની હાજરી સાબિત કરવામાં સૌથી મજબૂત કાયદાકીય પુરાવાનું કામ કર્યું હતું.

માત્ર 13 દિવસમાં 400 પાનાની ચાર્જશીટ

ભોગ બનનાર માસૂમ બાળકીને ઝડપી ન્યાય મળે તે માટે ચોકબજાર પોલીસે માત્ર 13 જ દિવસના ટૂંકા ગાળામાં કૉર્ટ સમક્ષ 400 પાનાની નક્કર ચાર્જશીટ રજૂ કરી દીધી હતી. આ ચાર્જશીટમાં ગેટ એનાલિસિસ ઉપરાંત આરોપીના ડીએનએ (DNA) રિપોર્ટ, સ્પર્મ રિપોર્ટ, બ્લડ સેમ્પલ અને અન્ય મહત્વના સાંયોગિક પુરાવાઓ જોડવામાં આવ્યા હતા. કૉર્ટમાં સરકારી વકીલ વિશાળ ફળદુ દ્વારા ધારદાર દલીલો રજૂ કરવામાં આવી હતી. નામદાર કૉર્ટે તમામ વૈજ્ઞાનિક પુરાવાઓ અને દલીલોને ગ્રાહ્ય રાખીને નરાધમ અંકિત ગૌતમને સમાજ માટે ખતરો ગણાવી, તેના અંતિમ શ્વાસ સુધી જેલમાં રાખવાનો ઐતિહાસિક ચુકાદો આપ્યો છે.

આ પણ વાંચો: શિક્ષકો વિરુદ્ધ વિવાદાસ્પદ નિવેદન આપી ફસાયેલા ગુજરાત સરકારના મંત્રીએ આખરે માફી માગી